وقو-دا ءسۇتتى باعىتتاعى مال شارۋاشىلىعى ۋكراين تەحنولوگياسى بويىنشا داميتىن بولادى. بۇل تۋرالى ۋكراين دەلەگاتسياسىنىڭ وڭتۇستىك قازاقستانعا جاساعان ساپارى كەزىندە بەلگىلى بولدى. اتالعان ەلدىڭ «Dairy Global Experts»، «اگروكليمات ۋكراينا»، سونداي-اق، ۋكراينانىڭ گولشتينسكي قاۋىمداستىعى مەن ءسۇت وندىرۋشىلەر قاۋىمداستىعى سىندى ءىرى ۇيىمدارىنان كەلگەن ماماندار وڭتۇستىكقازاقستاندىق سالا جەتەكشىلەرىمەن تاجىريبە الماسىپ، جاڭا تەحنولوگيانى قولدانىسقا ەنگىزۋدىڭ تەتىكتەرىن قاراستىردى. مۇنان بولەك، كەزدەسۋدە تاۋارلى-ءسۇت فەرمالارىنىڭ بىرىڭعاي ورتالىعى مەن شارۋالاردى جەرگىلىكتى اسىل تۇقىمدى ءىرى قارالارمەن قامتاماسىز ەتەتىن كەشەننىڭ جۇمىسىن جۇيەلەۋگە باعىتتالعان كەڭەس بەرۋ ورتالىعىن اشۋ ماسەلەسى دە قارالدى. سونداي-اق، ۇجىمدىق ۇلگىدەگى وتباسىلىق شارۋاشىلىقتاردا ءسۇتتى باعىتتى دامىتۋدىڭ مەحانيزمدەرى تالقىلاندى. ءىس-شارا بارىسىندا دەلەگاتتار «ماكسيمۋم» ايو-نىڭ ۇيىمداستىرۋىمەن وتكەن كاسىپكەرلەرگە قىزمەت كورسەتۋ ورتالىعىنداعى سەمينار كەڭەسكە قاتىستى. وقو-دا ءسۇتتى باعىتتاعى مال شارۋاشىلىعىن دامىتۋ تاقىرىبىنا ارنالعان جيىندا ۋكرايندىق ماماندار تاۋارلى-ءسۇت فەرمالارىن قۇرۋ مەن ونى دامىتۋدىڭ قىر-سىرىمەن ءبولىستى. جيىن سوڭىندا ءسۇت شارۋاشىلىعى سالاسىنداعى الەۋەتتى جوبالاردى جۇزەگە اسىرۋ بويىنشا «ماكسيمۋم» ايو جانە «قازاگروقارجى» اق كومپانيالارىمەن بىرلەسىپ جۇمىس جاساۋ جولدارى تالقىلاندى.

شاردارا سۋ قويماسىنىڭ جانىندا جىلىنا 1200 توننا بالىق وڭدەيتىن ەكى زاۋىت ىسكە قوسىلادى. بۇل تۋرالى «حابار» اگەنتتىگىنىڭ تاراتقان سيۋجەتىنەن ءمالىم بولدى. كاسىپورىننىڭ ونىمدەرى ىشكى نارىقتان بولەك، سىرت ەلدەرگە دە ەكسپورتتالادى دەپ كۇتىلۋدە. شاردارانىڭ كوكسەركەسىنە، اسىرەسە، ەۋروپا ەلدەرىندە سۇرانىس جوعارى كورىنەدى. شاردارادا ءدال وسىنداي تاعى ەكى زاۋىت بۇرىننان جۇمىس ىستەپ كەلەدى. ولار جىلىنا شامامەن 3 مىڭ توننا بالىق وڭدەۋگە قاۋقارلى. دايىن بالىقتار، بۇگىنگى تاڭدا، تۇركيا مەن گەرمانيا ەلدەرىنە ەكسپورتتالىپ جاتىر. ەۋروپا ەلدەرىنە تاسىمالدانىپ جاتقان ونىمدەردى وڭدەي سالىسىمەن قاتتى مۇزداتپاي، توڭازىتقىشتا سالقىنداتادى. سول كەزدە ءدامى سول كۇيىندە ساقتالادى ەكەن. وسىلايشا وزىندىك قۇپياسى بار تەحنولوگيامەن وڭدەلەتىن شاردارانىڭ بالىعىنا الىس-جاقىن شەتەلدىكتەر قىزىعۋشىلىق تانىتۋدا.

وقو اكىمىنىڭ ءباسپاسوز قىزمەتى