بۇگىن ۇكىمەت وتىرىسىندا پرەمەر-مينيستر باقىتجان ساعىنتاەۆ جىل سوڭىنا دەيىن اگروونەركاسىپ كەشەنىن جانە جاپپاي كاسىپكەرلىكتى دامىتۋ باعدارلامالارى اياسىندا ءتيىستى شەشىم قابىلداناتىنىن مالىمدەدى.

ايتا كەتەيىك، ۇكىمەت وتىرىسىندا 2017-2021 جىلدارعا ارنالعان اگروونەركاسىپ كەشەنىن دامىتۋ باعدارلاماسى مەن ناتيجەلى جۇمىس جانە جاپپاي كاسىپكەرلىكتى دامىتۋ باعدارلامالارى تانىستىرىلدى.

«ەكى باعدارلاما دا ءبىر-بىرىمەن بايلانىستى. ەگەر دە ءبىز ۋاقىتشا جۇمىس ورىندارىنا (داعدارىسقا قارسى شارالار اياسىندا) ەكپىن قويعان بولساق، ەندى تەك تۇراقتى جۇمىس ورىندارىنا نازار اۋدارىپ وتىرمىز. ەڭ باستىسى - جەكە ءىستى اشۋعا مۇمكىندىك بەرىلىپ، وسى ارقىلى جۇمىس ورىندارىن قۇرۋ ەسكەرىلەدى. وسى ورايدا جاۋاپتى مەملەكەتتىك ورگاندار ايقىندالدى، وكىلەتتىلىك ءوزارا ءبولىندى»، - دەپ اتاپ ءوتتى پرەمەر-مينيستر باقىتجان ساعىنتاەۆ.

بۇل تۇرعىدا ۇكىمەت باسشىسى ءوزىنىڭ ورىنباسارلارىنا باعدارلامالار اياسىنداعى جۇمىستاردى باقىلاۋعا الۋدى تاپسىردى. «جىل سوڭىنا دەيىن ءبىز ۇكىمەتتىڭ ءتيىستى شەشىمىن قابىلداۋ ءۇشىن 15 جەلتوقسانعا قاراي قوس باعدارلاما كەڭسەگە ەنگىزىلۋى قاجەت»،-دەدى پرەمەر-مينيستر.

ءوز كەزەگىندە ۇكىمەت باسشىسىنىڭ ورىنباسارى يمانعالي تاسماعامبەتوۆ اتالعان باعدارلامالاردى ءتيىستى دەڭگەيدە ناسيحاتتاۋ كەرەكتەگىن ۇسىندى.

وسى ورايدا بۇل باعىتتا جۇمىس ىستەپ جۇرگەن ۇكىمەتتىك ەمەس ۇيىمدار مۇمكىندىگىن پايدالانۋ كەرەك. «ەلباسىنىڭ تاپسىرماسىنا سايكەس، ناتيجەلى جۇمىس جانە جاپپاي كاسىپكەرلىكتى دامىتۋدى كوزدەيتىن ۇكىمەتتىڭ جاڭا باعدارلاماسىنىڭ جوباسىن نازارعا ۇسىنىپ وتىرمىز. باعدارلامانىڭ نەگىزگى ماقساتىنا توقتالاتىن بولساق، ازاماتتاردىڭ جۇمىسقا ورنالاسۋى نەمەسە ءوزىنىڭ ءىسىن اشۋ ءۇشىن قاجەتتى كاسىبي داعدىعا جاپپاي وقىتۋ مەن ۇيرەتۋ كوزدەلىپ وتىر.

ءبىز 2008 جىلدان باستاپ جۇمىسپەن قامتۋ باعدارلامالارىن ىسكە اسىرىپ كەلەمىز. وزدەرىڭىزگە بەلگىلى، بۇل باعدارلامالاردىڭ نەگىزگى باعىتى الەمدىك قارجى داعدارىسى جانە وعان جالعاسقان ەكونوميكالىق تۇراقسىزدىق كەزىندە جۇمىسسىزدار سانىن ارتتىرماۋ بولدى»،-دەدى قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا باعدارلامانى تانىستىرۋ بارىسىندا. ونىڭ سوزىنە قاراعاندا، اتقارىلعان شارالاردىڭ دەنى ۋاقىتشا جۇمىسقا تارتۋ، بوس ورىندارعا ورنالاستىرۋ، وقىتۋ جانە بەلگىلەنگەن جۇمىس بەرۋشىگە قىزمەتكە ورنالاستىرۋدى ەسكەردى. ارينە، بۇل شارالاردىڭ ءبارى داعدارىسقا قارسى قادامدار رەتىندە ءوز ناتيجەسىن بەردى. ء«بىز ەڭ قيىن كەزەڭدە ەڭبەك نارىعىنىڭ تۇراقتىلىعىن ساقتاپ قالدىق، بىراق بۇل شارالار ەڭبەك رەسۋرستارىنىڭ باسەكەلەستىگىن دامىتا العان جوق»،-دەدى مينيستر.

دەرەككوز: قازاقپارات