وڭتۇستىك قازاقستان وبلىسىندا ساياق شەگىرتكەسىنە قارسى جۇمىستار 26,7 مىڭ گا جەرگە جۇرگىزىلىپ، بۇگىندە جۇمىستار تولىعىمەن اياقتالدى. ءۇيىرسىز ساياق شەگىرتكەسىنە قارسى كۇرەس جۇمىستارىنا وبلىستىق بيۋدجەتتەن 48 ملن تەڭگە قارجى قارالعان. بۇگىندە بۇل شەگىرتكە تۇرىنەن شارۋالارعا كەلەر قاۋىپ جوق.

بۇل تۋرالى وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆ ايماقتىق كوممۋنيكاتسيالار قىزمەتىندە وتكەن بريفينگتە مالىمدەدى.

باسشىنىڭ ايتۋىنشا، وبلىستا شەگىرتكەلەردىڭ 122 ءتۇرى بولسا، سونىڭ 4 تۇرىنە قارسى زالالسىزداندىرۋ جۇمىستارى جۇرگىزىلۋدە. قالعان تۇرىنەن شارۋالارعا كەلەر قاۋىپ جوق. ساياق شەگىرتكەلەردىڭ شىعۋ ورىندارىندا ماروككالىق شەگىرتكەلەردىڭ ارالاس بولۋىنا بايلانىستى وڭدەۋ جۇمىستارى «وسىمدىك قورعاۋ» مەكەمەسىمەن بىرگە جۇرگىزىلدى. وڭدەۋ جۇمىستارىنا 22 تەحنيكا جۇمىلدىرىلىپ، ناتيجەسىندە 26,7 مىڭ گا جەر زالالسىزداندىرىلدى.

سونداي-اق، ءباسپاسوز ءماسليحاتىندا وقو اۋماقتىق ينسپەكتسيا تاراپىنان 91,37 مىڭ گا جەرگە ماروككو شەگىرتكەسىنە قارسى حيميالىق وڭدەۋ جۇمىستارى جۇرگىزىلگەنى ايتىلدى. ال اۋىل شارۋاشىلىعى مينيسترلىگى اۋماقتىق ينسپەكتسيانىڭ وكىلى بيىل كوكتەم ايلارى وتە قولايسىز بولىپ، ءجيى جاۋعان جاڭبىر مەن ءشوپتىڭ بيىك ءوسۋى اسەرىنەن جۇرگىزىلگەن وڭدەۋ جۇمىستارى كۇتىلگەن ناتيجەنى بەرمەگەنىن ايتتى.

سونىڭ سالدارىنان ماروككولىق شەگىرتكەلەر 27,6 مىڭ گا دەيىنگى القاپقا جايىلىپ كەتكەن ۇلعايعان. بۇگىندە زيانكەستەردى جويۋ باعىتىنداعى جۇمىستار ەسەلەنىپ، رەسپۋبليكادان قوسىمشا قارجى ءبولىندى. ماماندار شەگىرتكەمەن كۇرەس جۇمىستارىن، اۋا رايى قولايلى بولىپ تۇرسا، 3-4 كۇننىڭ ىشىندە اياقتاۋدى جوسپارلاپ وتىر.