Radiotochka.kz رەداكتسياسىنىڭ مالىمەتى بويىنشا، ءتىنتۋ جۇمىستارى ادۆوكاتتىڭ قاتىسۋىنسىز باستالعان، كەيىن كەلگەن زاڭگەر بيۋرو قىزمەتكەرلەرىنىڭ بۇل ارەكەتىنە شاعىمدانعان، ويتكەنى ولار اكەلگەن "وردەر ءتىنتۋ جۇمىسىنا قاتىسپاعان تەرگەۋشىنىڭ اتىنا راسىمدەلگەن" بولىپ شىقتى.

حابارلارعا قاراعاندا، تاڭەرتەڭ باستالعان ءتىنتۋ جۇمىستارى از ۋاقىتقا توقتاتىلىپ، كەيىن قايتا جالعاسقان. بيۋرو قىزمەتكەرلەرى رەداكتسيادان ەكى نوۋتبۋك تاركىلەگەن.

15 قاراشادا استانادا سىبايلاسقان جەمقورلىققا قارسى تۇرۋ جونىندەگى ۇلتتىق بيۋرو قىزمەتكەرلەرىCentral Asia Monitor گازەتىنىڭ باس رەداكتورى جانە Radiotochka.kz سايتىنىڭ باسپاگەرى بيگەلدى عابدۋلليندى بوپسالاۋمەن اينالىستى دەگەن كۇدىكپەن ۇستاعانى حابارلاندى. سىبايلاسقان جەمقورلىققا قارسى قىزمەت نۇسقاسى بويىنشا، 61 جاستاعى عابدۋللين "كەلەڭسىز ماتەريالدار جاريالاۋ ارقىلى مەملەكەتتىك ورگاندارعا اقپاراتتىق شابۋىل جاساپ، باسىلىمدارىنا مەملەكەتتىك تاپسىرىس الۋ ماقساتىندا شەنەۋنىكتەردى بوپسالاعان".

سىبايلاسقان جەمقورلىققا قارسى كۇرەس جانە مەملەكەتتىك قىزمەت ىستەرى جونىندەگى اگەنتتىكتىڭ توراعاسى قايرات قوجامجاروۆتىڭ حابارلاۋىنشا، عابدۋللينگە قاتىستى تەرگەۋ ەندى عانا باستالدى، سول سەبەپتى ول ءىستىڭ جاي-جاپسارىن بايانداپ بەرە المايدى.

Abai.kz