بالا ديماش العان باتا

ديمەكەڭ الماتىداعى №14 مەكتەپتە ءبىلىم العان. جوعارى سىنىپتا وقىپ جۇرگەن كەزىندەگى ءبىر وقيعانى ورىس ءتىلى پانىنەن بەرگەن اننا پاۆلوۆنا شۋروۆا دەگەن ۇستازىنىڭ ەستەلىگىنەن وقىدىم. ء«بىر كۇنى ديماش ساباققا ەكى ساعات كەشىگىپ كەلدى. سىنىپ جەتەكشىسى شىدامسىزدىقپەن ديماشتى ۇستازدار بولمەسىنە الىپ كەلدى. ديماش «ەكىنشى قايتالانبايدى» دەپ كەشىرىم سۇرادى دا، كەتىپ قالدى. ءبىر ايدان كەيىن ماكسيميليان كرۋتوۆ دەگەن ازامات سوعىسىنىڭ ارداگەرى كەلىپ: «سىزدەردە قوناەۆ دەگەن بالا وقي ما؟» - دەدى. «بىردەڭە ءبۇلدىرىپ قويدى ما؟» - دەپ ەلەڭ ەتە قالدىق. انا كىسى بولسا «سىزدەر جاقسى ازاماتتار تاربيەلەپ جۇرسىزدەر. مەن سىزدەرگە ريزاشىلىعىمدى بىلدىرۋگە كەلدىم. قوناەۆ مەنى اجالدان الىپ قالدى. تالمام ۇستاپ، وزەننىڭ جاعاسىندا قۇلاپ جاتقان جەرىمنەن ەمحاناعا الىپ باردى. ول بالا بولماسا، مەن سىزدەردىڭ الدارىڭىزدا بۇلبۇلشا سايراپ تۇرماس ەدىم. سول بالانى وسىندا الىپ كەلسەڭىزدەر»، - دەگەن ءوتىنىشىن ايتتى. كەلگەن سوڭ ديماشتى قۇشاقتاپ: «قۇداي ساعان دەنساۋلىق بەرسىن! سەن باقىتتى ادام بولاسىڭ»، - دەپ ماڭدايىنان ءسۇيدى. سول كەزدە ديمەكەڭ بار-جوعى 7-سىنىپ وقۋشىسى بولعان ەكەن.  

 دىنمۇحامەد قوناەۆتىڭ وكىنىشى

 ديمەكەڭنىڭ: ء«تۇستى مەتالدار ينستيتۋتىندا وقىپ جۇرگەنىمدە ورالداعى شاحتاعا بارىپ، پاۆەل ساۆەلەۆيچ دەگەن شيەتتەي بالا-شاعاسى بار كىسىنىڭ ۇيىندە جاتتىق. اشارشىلىق جىلدارى بولاتىن. سول كىسى ءبىر بولكە ناندى بالالارىنىڭ اۋزىنان جىرىپ بىزگە بەرگەن ەدى. العاشقى ەڭبەكاقىمدى السام، الگى كىسىنىڭ بالالارىنا تاماق، كيىم سالىپ جىبەرەم دەۋشى ەدىم. ارادا ەكى-ءۇش جىل وتكەننەن كەيىن، سالەمدەمە جاشىگىمەن كيىمدەر، تاماقتار سالىپ جىبەردىم. العان-الماعانى ماعان بەيمالىم، ول جاققا قايتا جولىم تۇسپەدى. بارىپ حال-احۋالىن بىلمەدىم، بالالارىنا ءبىر شاپاعاتىم تيمەدى. سوعان موينىمنىڭ جار بەرمەگەنىنە وكىنەمىن»، - دەپ جۇرەگى اۋىرۋشى ەدى.

قوناەۆتىڭ ناقىلعا اينالعان سوزدەرى:

بۇگىنگى كۇن – كەشەگى كۇننىڭ شاكىرتى.

 ***

جالادا شىندىق بولمايدى.

 ***

ساتىعا اياق سالماي جاتىپ، باسپالداقتان اتتاما.

 ***

قانمەن سىڭگەندى قاسيەتتەمەسەڭ، قادىرىڭ بولمايدى.

 ***

ءومىردىڭ ەكى تىرەگى: ۇيرەنۋدەن جالىقپاۋ، ۇيرەتۋدەن ايانباۋ.

 ***

اقيقاتتان اتتاپ كەتۋ – ارعا سىن.

*** 

ورىندى سىن ويلانتپاي قويمايدى.

 ***

ادامعا جازانىڭ ەڭ ۇلكەنى – جۇمىسسىز قالدىرۋ.

 ***

ادام ايناسى – ادام.

 ***

تاۋەلسىزدىكتىڭ جۇگى اۋىر.

 ***

قاراڭ قالعان بيلىك قايتىپ وڭالمايدى.

 ***

ءبىتىمى قيسىق اعاشتىڭ كولەڭكەسى دە وزىندەي بولادى.

 ***

ادامدىق قالىپتى بيىك ۇستاۋ – كىمگە دە بولسا ۇلكەن سىن. ادامگەرشىلىك دەگەن اسىل قاسيەتتى الاسارتىپ الماساق ەكەن. ءومىر وزەگى وسى، ازاماتتىق جولى دا وسى. 

دەرەك كوزى: islam.kz