سەنات دەپۋتاتى دارحان قالەتاەۆ 2020 جىلعا دەيىن وڭىرلەردى دامىتۋ باعدارلاماسى اياسىندا باسپانا الۋعا ءۇمىتتى وتباسىلار ءۇشىن جاس ارالىعىن 29-دان 39 جاسقا دەيىن ۇلعايتۋدى ۇسىندى، - دەپ حابارلايدى اباي-اقپارات.

قالەتاەۆ بەيسەنبى كۇنى سەناتتىڭ جالپى وتىرىسىندا سويلەگەن سوزىندە قر پرەمەر-ءمينيسترى باقىتجان ساعىنتاەۆتىڭ اتىنا وسىنداي دەپۋتاتتىق ساۋالداما جاسادى.  دەپۋتات 2020 جىلعا دەيىن وڭىرلەردى دامىتۋ باعدارلاماسىنا سايكەس، بىرنەشە باعىتتار بويىنشا قول جەتىمدى باسپانا سالۋ قاراستىرىلعانىن ايتا كەلىپ، "الايدا باسپانا الۋعا ءۇمىتتى وتباسىلار ءۇشىن جاس شەكتەۋى بار" ەكەندىگىن ۇكىمەت باسشىسىنىڭ نازارىنا سالدى.

ماسەلەن، ءبىر سانات بويىنشا، ەرلى-زايىپتىلار ءۇش جىل وتاسقان، ءبىر بالالى جانە 35 جاسقا تولماعان بولۋى ءتيىس. ەكىنشى ءبىر سانات بويىنشا، جاس وتباسىنىڭ نەكەلەسكەنىنە ەكى جىلدان اسپاۋى كەرەك جانە ەرلى-زايىپتىلاردىڭ جاسى 29-دان اسپاۋى شارت.

"قۇرمەتتى باقىتجان ءابدىرۇلى، ءبىر سانات بويىنشا جاس ارالىعىن 35-تەن 39 جاسقا دەيىن ۇلعايتۋدى، ال "جاس وتباسى" ساناتى بويىنشا 29 جاستان 35 جاسقا دەيىن بەلگىلەۋدى قاراستىرۋىڭىزدى سۇرايمىن", — دەدى قالەتاەۆ پرەمەر-مينيسترگە.

قالەتاەۆتىڭ بۇل باستاماسى ءار قازاقستاندىق جاستىڭ بولاشاققا دەگەن سەنىمىن كۇشەيتەدى. سەبەبى، ءبىزدىڭ ەلدە قازىر جاستاردىڭ دەنى وتىزدان اسقان سوڭ وتاۋ قۇراتىن بولىپ جاتىر. 

ماسەلەن، 2009 جىلعى ۇلتتىق ساناق كەزىندە قازاقستاندا 30 جاستان اسقان 798 مىڭ ادامنىڭ وتباسىن قۇرماعانى انىقتالعان. 2009 جىلعى ساناق بويىنشا، 50-دەن اسقان ەر ادامداردىڭ 70 مىڭى، وسى جاستاعى ايەلدەردىڭ 110 مىڭى وتباسىن قۇرماپتى. وسى دەرەكتىڭ ءوزى قالەتاەۆتىڭ باستاماسى ورىندى ەكەنىن كورسەتپەي مە؟

ال 2012 جىلعى دەرەكتەرگە جۇگىنسەك، ەلىمىزدە جاسى 25-تەن اسقان بويداقتار سانى – 3 ميلليون بولعان. سول 3 ملن ادامنىڭ دەنى قازىر ۇيلەنىپ ۇلگەرگەننىڭ وزىندە قولجەتىمدى باسپاناعا قول سوزا المايدى. سول سەبەپتى دە دەپۋتاتتىڭ ۇسىنىسىن پرەمەر-مينيستر قولداۋعا ءتيىس دەپ ويلايمىز. 

ءشارىپحان قايسار

Abai.kz