بۇگىن استانادا ەكسپو-2017 كورمەسى قاتىسۋشىلارىنىڭ III جينالىسى ءوز جۇمىسىن باستادى. بۇل تۋرالى «اباي اقپارات» حابارلايدى. اتالعان حالىقارالىق شارا ەكى كۇنگە سوزىلادى دەپ وتىر ۇيىمداستىرۋشىلار.

دۇنيەجۇزىلىك كورمەنىڭ اشىلۋىنا ساناۋلى كۇندەر قالدى. 108 كۇننەن سوڭ ەلوردا حالىقارالىق ماڭىزدى شارانىڭ ورتالىعىنا اينالادى. سوناۋ 2012 جىلى حالىقارالىق كورمە بيۋروسىنىڭ (حكب) 152-ءشى باس اسسامبلەياسىنا قاتىسقان 161 مەملەكەتتىڭ 103-ءى استانانىڭ كانديداتۋراسىن قولدادى. ءسويتىپ، ەكسپو-2017 قازاقستانعا كەلەتىن بولدى.

ايتا كەتەيىك، وسىدان ءسال ەرتەرەكتە ەكسپو-2017 قۇرىلىستارىنىڭ باسىم بولىگى اياقتالىپ، ءتىپتى كەيبىر كورمە پاۆيلوندارى شەتەلدىك قاتىسۋشىلارعا بەرىلە باستاعانىن حابارلاعان ەك. بۇگىنگى شارانىڭ ماقساتى دا وسىعان سايادى. بۇگىنگى تاڭدا 115 مەملەكەت پەن 18 حالىقارالىق ۇيىم قاتىساتىندارىن ماقۇلداعان. ەندى جەردە ءازىر بولعان عيماراتتارعا جايعاسۋ كەرەك-ءتى.

بۇگىنگى جيىننىڭ اشىلۋىندا ءسوز سويلەگەن استانا ەكسپو-2017 كورمەسىنىڭ جەتەكشىسى احمەتجان ەسىموۆ تە وسىنى ايتتى.

«2016 جىلدىڭ 1 قاراشاسىنان باستاپ پاۆيلونداردى بەرە باستادىق. حالقارالىق قاتىسۋشىلار ەندى كەلىپ، پاۆيلونداردى ءوز ىڭعايلارىنا ساي رەتتەي بەرسە بولادى. ويتكەنى كورمەنىڭ اشىلۋىنا ساناۋلى كۇندەر قالدى. سوندىقتان ءبىز شەتەلدىك قوناقتارىمىزدى، قاتىسۋشىلاردى قازىردەن باستاپ كەلە بەرۋلەرىن سۇرايمىز»، –دەدى ەسىموۆ مىرزا.

ەلباسىنىڭ باستاماسىمەن قولعا الىنعان وسى ءبىر حالىقارالىق شارانىڭ ماڭىزى مەن ماعىناسى تۋرالى ايتىپ جاتۋدىڭ ءوزى ارتىق شىعار. ماڭايىنداعى كەلەڭسىزدىكتەرگە قاراماستان، بۇگىندە ەكسپو-2017 كورمەسى ماڭىزدى مىندەتتى اتقارۋعا ساقاداي ساي ەكەنىن كورسەتتى. ءتىپتى، كورمەگە قاتىسۋشىلار ءۇشىن بارلىق جاعدايلار قاراستىرىلعان ەكەن.

ء«بىز حالىقارالىق كورمەگە قاتىسۋشىلار ءۇشىن بارلىق جاعدايدى جاسادىق. ءتۇرلى وپەراتسيالىق قىزمەت تۇرلەرى ىسكە قوسىلدى. ء«بىر تەرەزە» فورماتىندا قىزمەت كورسەتەتىن بىرىڭعاي جۇيە ازىرلەندى. بۇل دەگەنىڭىز ۆيزالىق قىزمەتتەر، سالىق، بانكتىك قىزمەتتەر، ساقتىندىرۋلار مەن وزگە دە مەملەكەتتىك جانە الەۋمەتتىك قىزمەت تۇرلەرىن ءبىر جەردە جۇزەگە اسىرۋعا بولادى دەگەن ءسوز. شەتەلدىك كوميسسارلار مەن كورمە قاتىسۋشىلارىنا جانە ولاردىڭ جاقىندارىنا ارناپ ەكسپو اۋماعىنان 1374 پاتەرى بار قالاشىق سالىندى. اكرەديتاتسيادان قتۋ پروتسەسسى دە وڭتايلاندىرىلدى»، - دەدى احمەتجان سماعۇلۇلى.

قىزىق دەرەك. بىلە ءجۇرىڭىز. 2014 جىلعى 11 ماۋسىمدا پاريجدە (فرانتسيا) حالىقارالىق كورمە بيۋروسى (حكب) باس اسسامبلەياسىنىڭ 155-ءشى سەسسياسى  ءوتتى. ول جەردە «ەكسپو-2017» حالىقارالىق مامانداندىرىلعان كورمەسىنىڭ تۋى قازاقستانعا تابىس ەتىلدى. وسى كەزدەن باستاپ قازاقستان شەتەلدىك قاتىسۋشىلاردى تارتۋ، كورپوراتيۆتىك قاتىسۋشىلارمەن كەلىسسوزدەر جۇرگىزۋ، كورمەنى يميدجدىك ىلگەرىلەتۋمەن اينالىسۋ قۇقىعىنا يە بولدى.

استانا EXPO-2017 حالىقارالىق مامانداندىرىلعان كورمەسى 2017 جىلعى  10 ماۋسىمدا باستالىپ، 10 قىركۇيەكتە اياقتالادى. وعان 15 مەملەكەت پەن 18 حالىقارالىق ۇيىم قاتىسادى دەپ كۇتىلۋدە. جالپى، 2 ميلليوننان ارتىق تۋريست شامامەن 2 رەت جانە ودان ارتىق كورمەگە كەلەدى. پوتەنتسيالدى بوجام – 5 ميلليون تۋريست. جالپى كەلۋشىلەر سانىنىڭ 85%-ى قازاقستاندىقتار بولاتىنى كۇتىلەدى، ال 15%-ى – شەتەلدىك مەملەكەتتەردىڭ ازاماتتارى، ولاردىڭ كوپشىلىگى تمد جانە قىتاي مەملەكەتتەرىنەن كەلەدى.

ەكسپو-2017 حالىقارالىق مامانداندىرىلعان كورمەسى باستى تاقىرىبى – «بولاشاق ەنەرگياسى». بۇل حالىقارالىق قاۋىمداستىقتىڭ جەر شارىنا زور اسەرىن تيگىزەتىن ەنەرگيانى تۇتىنۋ ماسەلەسىنە الاڭداۋشىلىعىن كورسەتەدى. كورمەنىڭ نەگىزگى ماقساتى: جاۋاپكەرشىلىككە شاقىرۋ، پىكىرتالاستارعا ىنتالاندىرۋ جانە ادامداردىڭ جەر شارىندا ەنەرگيانى تۇتىنۋىن جوسپارلاۋ جانە باقىلاۋ قابىلەتىن قالىپتاستىرۋ، تابيعاتقا تيگىزەر زالالدى بارىنشا ازايتۋ. وسى مىندەتتەردى جۇزەگە اسىرۋ «ادامزاتتىڭ وراسان زور ماسەلەلەرىن شەشۋ» اتتى كورمە تاقىرىبىنىڭ تاقىرىپشاسى ارقىلى كورىنىس تاپقان.

استانا ەكسپو-2017 حالىقارالىق مامانداندىرىلعان كورمەسىن وتكىزۋ – يدەياسىنىڭ اۆتورى پرەزيدەنت نۇرسۇلتان نازارباەۆ. ەلباسى نۇرسۇلتان نازارباەۆ قازاقستاندىقتارعا ۇندەۋ جاساپ، استانا ق.  ەكسپو-2017 وتكىزۋ تۋرالى شەشىمنىڭ تاريحي وقيعا بولىپ تابىلاتىنىن اتاپ ءوتتى.

«ەكسپو كورمەلەرىندە الەمنىڭ بارلىق مەملەكەتتەرى وزدەرىنىڭ ۇزدىك تەحنولوگيالىق، عىلىمي، مادەني جەتىستىكتەرىن كورسەتەدى. ولار جاھاندىق دامۋدىڭ جاڭا كۇن ءتارتىبىن قالىپتاستىرادى. مۇنداي ءىس-شارالارعا بارلىق قۇرلىقتاعى ونداعان مەملەكەتتىڭ ميلليونداعان حالقى قاتىسادى. اسا باسەكەلى كۇرەستە استانانىڭ جەڭىمپاز اتانۋى كەزدەيسوق قۇبىلىس ەمەس. بىرىنشىدەن، بۇل ءبىزدىڭ ەلوردانى الەمدىك دارەجەدەگى وقيعانى قابىلداۋعا لايىقتى ورتالىق رەتىندە مويىنداۋى. ەكىنشىدەن، قازاقستاننىڭ پايداسىنا تاڭداۋ جاساۋ مەملەكەت جەتىستىكتەرىنىڭ جوعارى باعالانۋىن كۋالاندىرىپ، ونىڭ، جالپى ەۋرازيالىق ايماقتىڭ دامۋ كەلەشەگىن اتاپ كورسەتەدى. ۇشىنشىدەن، ءبىزدىڭ ۇسىنعان «بولاشاق ەنەرگياسى» تاقىرىبىنىڭ وزەكتىلىگى دە جەڭىسكە وڭ اسەرىن تيگىزدى. اقىرىندا، ەڭ باستىسى –استاناعا تاڭداۋ جاساۋ بۇكىل قازاقستاندىق حالىقتىڭ ورتاق كۇشىنىڭ جەمىسى بولدى»، - دەپ بەلگىلەدى قازاقستان پرەزيدەنتى.