قازاقستاندىق رەجيسسەر اقان ساتاەۆ مادەنيەت جانە سپورت مينيسترلىگىمەن بىرلەسىپ ساق پاتشايىمى تۇمار (توميريس) تۋرالى فيلم ءتۇسىرۋدى جوسپارلاپ وتىر.

بۇل تۋرالى ول اتالعان مينيسترلىكتىڭ كەڭەيتىلگەن وتىرىسىندا حابارلادى. "وسى جىلى ءبىز مادەنيەت مينيسترلىگىمەن بىرلەسىپ "تۇمار" تاريحي ءفيلمىن ءتۇسىرۋدى باستاعالى وتىرمىز. ساپالى دۇنيە شىققان جاعدايدا ول وتاندىق كورەرمەننىڭ دە، شەتەلدىك اۋديتوريانىڭ دا قىزىعۋشىلىعىنا يە بولا الاتىنىنا سەنىمدىمىن. تۇمار پاتشايىم - الەمدىك ءتاريحتىڭ بارىسىنا ىقپال ەتكەن تۇلعا. كينوپروكاتىمىزدىڭ گەوگرافياسىن كەڭەيتۋ ءۇشىن مۇنداي جوبالاردى جاساۋ كەرەك دەپ سانايمىن. سەبەبى بۇل ەلدىڭ حالىقارالىق ءيميدجىنىڭ قالىپتاسۋىنا وڭ اسەر ەتەدى", - دەدى رەجيسسەر. ساق پاتشايىمى تۇماردىڭ ەسىمى ەجەلگى جازبالاردا توميريس دەپ كورسەتىلگەن. ب.ز.د. 530-529 جىلدارى ميديا پاتشاسى كير كوپتەگەن ەلدەردى وزىنە باعىندىرىپ، "ازيا ءامىرشىسى" اتاعىنا يە بولىپ، ۇلى دالاعا قارسى جورىققا شىقتى. شايقاستاردىڭ بىرىندە كير پاتشاسى ءتوميريستىڭ جۇبايى رۇستەمدى ءولتىرىپ، تۇماردىڭ بالاسى سىپىردى قولعا تۇسىرگەن. تۇتقىندا ءتوميريستىڭ ۇلى دا مەرت بولدى. ال كير كوشپەندىلەرگە ەلشى اتتاندىرىپ، ولاردىڭ حانشاسىنا وزىنە تۇرمىسقا شىعۋىن تالاپ ەتەدى. تۇمار كير پاتشانىڭ ۇسىنىسىن قابىلداماي، ونىڭ باسىن قانعا تۇنشىقتىرۋعا ۋادە ەتەدى. وسىدان كەيىن پاتشايىم پارسىلارعا قارسى ۇرىس جۇرگىزىپ، جەڭىسكە جەتەدى. سول كەزدە تۇمار پارسىلاردىڭ پاتشاسى كيردىڭ باسىن شاۋىپ الىپ، قان تولتىرىلعان ساباعا تىعىپ: "اڭساعانىڭ قان ەدى، ءىش ەندى سونى!" - دەپ ايقايلادى. بۇل وقيعانى گرەك تاريحشىسى گەرودوت «ەڭ كەسكىلەسكەن جانە ۇلى شايقاس» دەپ سۋرەتتەگەن.

نۇرسۇلۋ نايمانوۆا

Abai.kz