ەكى-ءۇش كۇننەن بەرى "You Tube" جەلىسىندە ءوزىن "قازاقستاندىق نەمىسپىن" دەپ تانىستىرعان ازاماتتىڭ قازاققا قاتىستى ايتقاندارى قىزۋ تالقىلانۋدا.  

رەسەي مەن ۋكرايناعا شوعىرلانعان نەمىستەردەن گورى قازاقستانداعى نەمىستەردىڭ تۇرمىسى كوشى ىلگەرى ەكەنىن دالەدى دەرەكتەرمەن كورسەتە وتىرىپ سويلەگەن المان ازاماتى "جەر بەتىندەگى ەڭ دارحان، ەڭ جومارت، ەڭ قايىرىمدى ەل - قازاقتار" دەگەندى ايتادى. راس قوي. كەسىر جۇيە كەزىندە تەپەرىش كورگەن نەمىستەرگە، تەك نەمىستەر ەمەس، سابەت وداعى ساياسي قوقىس رەتىندە قازاق دالاسىنا ۆوگونداپ توككەن كوپ ۇلتقا قۇشاعىن اشقان قازاقتىڭ كەڭدىگى دارىپتەلىپ ايتىلسا، ايتىلۋعا ءتيىستى عوي. بىراق، سونوۋ قيىن-قىستاۋ زاماندا قۇشاعىن جوق-جىتىككە ايقارا اشقان قازاقتى بۇگىن مازاق قىلىپ جۇرگەندەر از با؟ سونداي وسپادارسىزدىققا جانى كۇيگەن مىنا جىگىت "قازاق ءۇشىن كىمنىڭ دە بولسا ماڭدايىن قاسقيتۋعا بارمىن" دەگەندى ايتادى. 

بەينەبايانداعى ازامات قازاقستاندا تۋىپ ءوسىپتى. ول ءوزىن "قازاقپىن" دەيدى.

«قازاقتار ءبىزدىڭ جەر اۋدارىلىپ كەلگەن اتا-بابالارىمىزعا قامقور بولدى، نانىن ءبولىپ بەردى. اناۋ چەشەندەردەن، تاتارلاردان، بالتىق ەلدەرىنىڭ وكىلدەرىنەن سۇراپ كورىڭىز. كەزىندە قازاقستانعا دەپورتاتسيالانعان وزگە ۇلتتاردىڭ 90 پايىزى امان قالعان. كەڭەس وداعىنىڭ ساربازدارى ولاردى ازاپ لاگەرلەرىنە جىبەردى. ال قازاقتار سولاردىڭ بالالارىن باعىپ-قاقتى. ءبىز وسىنىڭ ارقاسىندا امان قالدىق. بىراق قازاقتار ەشقاشان ء"بىز مىنە، وسىنداي ۇلى حالىقپىز" دەپ كەۋدەسىن سوققان جوق. ولار رەسەيلىكتەر سياقتى ەمەس. قازاقستاندا تۋىپ-وسكەن ءبىر دوسىم رەسەيگە كوشىپ بارعان عوي. سويتسە، وعان جەرگىلىكتى تۇرعىندار كۇن كورسەتپەي قويىپتى. بالالارىنا ءتيىسىپ، اقىر اياعىندا ءۇيىن ورتەپ تىنعان. سويتە تۇرا ونداعىلار وزدەرىن ۇلى حالىق سانايدى، ال قازاقتارعا مۇرىن شۇيىرە قارايدى. جوق. مەنىڭشە، ناعىز ۇلى حالىق – قازاقتار» دەيدى نەمىس ۇلتىنىڭ وكىلى.

ءبىز الەۋمەتتىك جەلىدە جۇلدىزى جانعان وسى ءبىر المان ازاماتىنا ىزدەۋ سالدىق. بۇل ازامات قازاقستاننىڭ قاي وڭىرىندە تۋعان؟ قازاقستاننان قاشان كەتكەن، يا نە سەبەپپەن كەتكەن؟ بۇل كىم؟ ول تۋرالى الداعى ۋاقىتتا "Abai.kz" اقپاراتتىق پورتالىنان وقي جاتارسىزدار.

نۇرزات توعجان

Abai.kz