جۇما, 29 ناۋرىز 2024
4864 0 پىكىر 9 قاڭتار, 2017 ساعات 00:37

تىركەۋ قازاقتى تەنتىرەتەتىن بولدى...

بۇلاي دەمەسكە امال جوق. جاڭا جىلدان باستاپ قولدانىسقا ەنگەن زاڭ نورمالارى حالىقتى دۇربەلەڭگە سالىپ قويدى. ۇلكەن قالالارعا ءبىر ايدان استام ۋاقىتقا كەلگەن ەل ادامدارى ۋاقىتشا بولسا دا تىركەۋگە تۇرۋعا ءتيىس ەكەن دە، ەگەر تۇرماسا قالتاسىنان 16 مىڭنان استام تەڭگەمەن ايىپپۇل تولەيدى ەكەن.

وسى زاڭدى قابىلدار الدىندا زاڭ شىعارۋشى ورگانداردىڭ تۇبەگەيلى ويىندا نە بولعانى ەلگە تۇسىنىكسىز. ۇلكەن قالادا بىرەۋدى تىركەۋگە الماق تۇگىلى ءوز ۇيلەرىنە ءوزى كىرە الماي وتىرعان ۇلەسكەرلەردىڭ سانى قانشاما، ايلاپ-جىلداپ تۇراقتى جۇمىس تابا الماي ساندالىپ جۇرگەندەر قانشاما، قالانىڭ كوممۋنالدىق پاتەرىنەن ورىن تابا الماي ساياجايلاردى، جەرتولەلەردى پانالاعان ادامدار قانشاما... ودان وزگە ءۇي يەلەرىنىڭ كورىنگەندى تىركەي بەرۋگە ىقىلاسى جوقتىعىن نەگە ەسكەرمەگەن. كەلگەن-كەتكەننىڭ ءبارىن تىركەي بەرەتىن ۋاقىتتى ءۇي يەلەرى قايدان تاپپاق، ال قۇجاتتى تۇگەندەۋدە جۇيكەگە تيەتىن جاڭدايلاردىڭ دا بولاتىنى جاسىرىن ەمەس. وسىلاردى ەسكەرمەستەن ءاتۇستى قابىلدانا سالعان جاڭا زاڭ نورماسى پاترۋل قىزمەتكەرلەرىنە جاقسى مايشەلپەك بولعالى تۇر.

بۇدان بۇرىن دا كوڭىلى سوقسا كوشەدەگى حالىقتىڭ قۇجاتىن تەكسەرىپ، تىرناق استىنان كىر ىزدەيتىن ولار ەندىگى كەزەكتە كىمدى دە بولسا توقساۋسىز تەرگەۋگە الۋعا ءازىر. «قاشان كەلدىڭىز؟ نە ىستەپ ءجۇرسىز؟ قايدا تۇراسىز؟ تىركەۋدە نەگە جوقسىز؟ بار بولسا كورسەتىڭىز؟ ايىپپۇل سالامىز» دەپ دىگەرلەپ، حالىققا تىزەسىن باتىرادى. قاراپايىم حالىق بۇگىنگى تاڭدا پوليتسيانى قورعاۋشىم دەپ تاني المايدى، كيلىگە كەتكەن جەرىنەن پوليتسيادان قۇتىلۋعا اسىعىپ تۇراتىنى اقيقات.  «وسى بالە ءبىر جالاسىن جاۋىپ، مەنى قيناعالى تۇر-اۋ!» دەگەن وي ءبىرىنشى كەلەدى. سوندىقتان اۆتوماتتى تۇردە پاگونداعى قىزمەتكەرمەن كەلىسىم تاۋىپ، از-ماز پارا بەرىپ قوش ايتىسۋعا بەيىم. ەلدىڭ ءدال وسى ءالسىز تۇسىن بىلگەن پوليتسيا قىزمەتكەرلەرى بۇل جاعدايدى قارا باسىن قامداۋعا وتە جاقسى پايدالانادى.

باسەنەدەن بەلگىلى جۇرتتىڭ ءبارى زاڭ نورمالارىن جاقسى بىلەتىندەي ساۋاتتى ەمەس، اڭقاۋ ەل ارامزا مولدالارعا تاعى دا جەم بولعالى وتىرمىز. حالىقتىڭ قامىن ويلاعاننان ەمەس قارىننىڭ جايىن ويلاپ شىعارعان اتالمىش زاڭ نورماسىنا ءۇزىلدى-كەسىلدى قارسىمىن.

گۇلجان ءىزتاي

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3532