«سامۇرىق-قازىنا» اق الەۋمەتتىك جۇكتەمەسى بار نىسانداردى وتكىزۋ ءۇشىن زاڭناماعا تۇزەتۋلەر ەنگىزۋگە باستاماشى بولدى. بۇل تۋرالى «سامۇرىق-قازىنا» اق اكتيۆتەردى جەكەشەلەندىرۋ جانە قايتا قۇرىلىمداۋ دەپارتامەنتىنىڭ ديرەكتورى داۋرەن تاسماعامبەتوۆ (سۋرەتتە) جۋرناليستەرگە بەرگەن سۇحباتىندا ايتتى.

قازىرگى ۋاقىتتا جەكەشەلەندىرۋ نىساندارىن، سونىڭ ىشىندە «سامۇرىق-قازىنا» اق اكتيۆتەرىن دە وكىزۋ ەلەكتروندى اۋكتسيون ءتاسىلى ارقىلى جۇرگىزىلەدى.

«ەگەر كومپانيانىڭ اۋىرتپالىقتارى نەمەسە الەۋمەتتىك جۇكتەمەلەر تۇرىندەگى كەز كەلگەن ارنايى شارتتارى بولماسا، بۇل شاعىن جانە ورتا اكتيۆتەر ءۇشىن جاقسى ءادىس. جۇمىس بارىسىندا وسى ءادىستى جەتىلدىرۋ جونىندە بىزدە ۇسىنىستار پايدا بولىپ، ولاردى ۇلتتىق ەكونوميكا مينيسترلىگى مەن قارجى مينيسترلىگىنە جىبەردىك، ءبىزدى ەستيدى دەپ ۇمىتتەنەمىز»، - دەدى تاسماعامبەتوۆ.

ونىڭ ايتۋىنشا، ءىرى كومپانيالار ءۇشىن ەلەكتروندىق اۋكتسيون مۇلدەم قولايسىز ءادىس، ويتكەنى زاڭعا سايكەس، وعان كەز كەلگەن قوسىمشا شارتتار قويۋعا تىيىم سالىنادى. ال بۇل ساتىلىمنان كەيىن كومپانيا قىزمەتى باعىتىنىڭ تولىقتاي وزگەرۋىنە اكەلىپ سوقتىرادى.

جاقىندا «سامۇرىق-ەنەرگو» اق نىساندارى ەكى ساتىلى كونكۋرسقا شىعارىلدى: «ماڭعىستاۋ ەلەكترو توراپتىق ءبولۋ كومپانياسى» اق، «شىعىس قازاقستان ايماقتىق ەنەرگەتيكالىق كومپانياسى» اق، «اقتوبە جەو» اق جانە «تەگىسمۇناي» جشس. وسى كومپانيالاردىڭ بارلىعى باستاپقى باعاسىنان بولەك، ىقتيمال ساتىپ الۋشىلار تاراپىنان ورىندالۋى مىندەتتى بىرقاتار شارتتارعا يە. ەگەر وسى شارتتار ورىندالمايتىن بولسا، قور اكتيۆتەر ۇستاۋشىسى رەتىندە كەلىسىمشارتتى بۇزۋعا جانە جاڭا ينۆەستور ىزدەۋگە قۇقىلى، دەپ حابارلادى باسقارما باستىعى.

ەسكە سالا كەتەيىك، «سامۇرىق-قازىنا» قورىنىڭ نىساندارىن جەكەشەلەندىرۋ ەكى ءتىزىم بويىنشا جۇرگىزىلۋدە، ولارعا قوردىڭ ەنشىلەس كومپانيالارىنىڭ 44 ءىرى نىساندارىمەن 172 شاعىن اكتيۆتەرى كىرەدى.

Abai.kz