الماتىلىقتار تۋ-154 ۇشاعىنىڭ اپاتقا ۇشىراپ، قازا تاپقانداردى ەسكە الۋ ءۇشىن رەسەي كونسۋلدىعىنا گۇل قويىپ جاتىر، - دەپ حابارلايدى Tengrinews.kz.

گۇل شوقتارىنان بولەك، الماتىلىقتار كونسۋلدىقتىڭ قاقپاسىنا "قايعىلىمىز" دەگەن جازۋى بار قاعازداردى ءىلىپ جاتىر. 

سونداي-اق، جەرلەستەرىمىز رەسەيدىڭ استاناداعى ەلشىلىگىنە دە گۇل شوقتارىن قويىپ جاتىر ەكەن.

26 جەلتوقسان - رەسەيدە جالپىۇلتتىق قارالى كۇن بولىپ جاريالاندى. وعان رف قورعانىس مينيسترلىگىنىڭ ۇشاعى جەكسەنبىدە، 25 جەلتوقساندا تاڭعى ۋاقىتتا اپاتقا ۇشىراۋى سەبەپ بولدى.  لاينەردىڭ بورتىندا 92 ادام بولعان. ولاردىڭ ىشىندە، الەكساندروۆ اتىنداعى ءانسامبلدىڭ 68 مۋزىكانتى، باق-تاردىڭ 9 وكىلى ("زۆەزدا" تەلەارناسى، نتۆ جانە پەرۆىي كانال), الىپ كەلە جاتقان 6 ادام جانە ەكيپاجدىڭ 8 مۇشەسى بار.

تۋ-154 قارا تەڭىزدىڭ اناپا جاعالاۋىنا جاقىن ماڭدا قۇلاعان. 

ارينە، كورشى ەلدىڭ اۋىر قايعىسى ەكەنىنە داۋ جوق. بىراق، رەسمي بيلىك ارنايى حابارلاسىپ، قازاق حالقىنىڭ اتىنان كوڭىل ايتقان جوق پا؟ ەندى كەلىپ جەكەلەگەن ادامداردىڭ ەلشىلىككە بارىپ، "قايعىرعانىن" ءبىلدىرىپ جاتقانىنىڭ استارىندا نە بار؟

وسى ۋاقىتقا دەيىن قازاق حالقىنىڭ دا باسىنا ءدال وسىنداي ناۋبەت تالاي ءتوندى. سول كەزدە مەملەكەتتەر رەسمي كوڭىل ايتقانى بولماسا، حالقى ءدال وسىلاي بەلسەنە قويماپ ەدى.

الماتىلىقتار دەگەن اتاۋمەن جالپى حالىقتىڭ اتىنان سويلەۋگە ەشكىمنىڭ حاقىسى جوق. ويتكەنى، ول الماتىلىقتىڭ ىشىندە ءبىز دە بارمىز. بىراق، بىزگە قازىر رەسەيدىڭ قايعىسىنان دا وزگە پروبلەمالار جەتىپ ارتىلادى. ارينە، رەسمي بيلىكتىڭ رەسمي كوڭىل ايتۋىن قۇپتايمىز. زىمىران قۇلاپ، قازاقتىڭ باسىنا گەپتيل توگىلگەندە "كوڭىل ايتقىشتار" نەگە رەسەي بيلىگىنە ناز ايتپادى ەكەن دەگەن ىشكى ويىمىز دا جوق ەمەس. 

"قازاقستانداعى رەسەي ازاماتتارى ەلشىلىككە بارىپ، جەرلەستەرىنىڭ قايعىسىنا ورتاقتاسىپ، گۇل شوقتارىن قويدى" دەسە ءبىر ءسارى... الماتىلىقتار دەيدى عوي...

ءوسى ۇي ىشىنەن ۇي تىككەندى قاشان قويادى ەكەنبىز.

ءشارىپحان قايسار

Abai.kz