وڭتۇستىك قازاقستان وبلىسىنداعى ماقتارال اۋدانىنىڭ قاۋىن مەن قاربىز ەككەن  ديقاندارى  بيىلعى جىلى ونىمدەرىن قىر اسىرىپ، قازاقستاننىڭ بارلىق وڭىرلەرىمەن قاتار، رەسەي مەن بەلورۋس نارىعىنا دا شىعارىپ ساتا الدى. بيىلعى جىلى ءبىر عانا ماقتارال اۋدانىنان 56 مىڭ توننا قاربىز، 17,5 مىڭ توننا قاۋىن ساتىلىمعا تۇسكەن.

ديقانداردىڭ ايتۋىنا قاراعاندا، رەسەيدە قاۋىنعا دەگەن سۇرانىستىڭ جوعارى بولۋىنا بايلانىستى وتكەن جىلمەن سالىستىرعاندا باعا دا   تۇراقتى بولعانعا ۇقسايدى. جەكە كاسىپكەرلەر جەرگىلىكتى قاۋىن مەن قاربىزدى قابىلدايتىن نۇكتەلەردە قاۋىننىڭ 1 كەلىسىن 100 تەڭگەدەن، ال قاربىزدى 25 تەڭگەدەن ساتقان. قاۋىن مەن قاربىز ارتىلعان جۇك كولىكتەرىنىڭ باسىم كوپشىلىگى كورشى مەملەكەتتىڭ ماسكەۋ، سانكت-پەتەربۋرگ، سامارا قالالارىنا ەكسپورتتالىپتى.    اسىرەسە ەگىلگەن قاۋىننىڭ الۋان ءتۇرلى سورتتارىنىڭ ىشىندە ديقاندار اراسىندا «ۆالەت» اتىمەن اتالىپ كەتكەن ءتۇرى ەرەكشە سۇرانىسقا يە بولعان كورىنەدى.

قازاقستان نارىعى مەن شەتەلدىڭ بازار سورەلەرىنە شىققان اۋىل شارۋاشىلىق ونىمدەرى بۇل عانا ەمەس. جەمىس-جيدەك ءپىسىپ، ءونىمىن بەرە باستاعان ساتتەن ماقتارالدىق شارۋالار 75 توننا قىرىققابات، 500 توننا پياز، 93 توننا ءسابىز، 235 توننا اسحانالىق قىزىلشا، 182 توننا بولگار بۇرىشى، 2 مىڭ توننا قىزاناق پەن 1700 توننادان استام قيار شىعارىپ، ساۋدالاعان. بۇل تۋرالى Abai.kz اقپاراتتىق پورتالىنىڭ تىلشىسىنە وڭتۇستىك قازاقستان وبلىسى، ماقتارال اۋدانى اۋىلشارۋاشلىعى باسقارماسىنىڭ ماماندارى ءمالىم ەتتى.

اباي-اقپارات