2016 جىل ماقتارالدىقتار ءۇشىن تابىستى بولدى. ولاي دەيتىنىمىز، سوڭعى 1 ايدىڭ ىشىندە 120 مىڭ گەكتار القاپ جىرتىلىپ،  جەمىس ەگىلدى. سونىمەن قاتار، 80 مىڭ گەكتار جەردىڭ سورى شايىلدى، - دەپ حابارلايدى اباي-اقپارات.

ەڭبەككە ەرتە كىرىسكەن اۋداندا بۇگىنگى تاڭدا 150 گەكتار جەرگە  قىرىققابات، 46 گەكتاردان استام جەرگە پياز ەگىلدى.

كەلەر جىلعى جازعى داستارحاننىڭ اجارى – قاۋىن-قاربىزدىڭ دا كوشەتتەرى دايىن.  ەڭبەكتىڭ ەبىن، ديحانشىلىقتىڭ كوزىن تاپقان مىرزاشولدىكتەر  جىلىجايدان ءونىم وندىرۋدەن  دە قالىس قالار ەمەس. قىس اۋاسىنا قاراماي تىرباڭداعان جۇرتتىڭ جيعان-تەرگەنى ارنايى قويمالاردا ساقتاۋلى.

ۋاقىت ساعاتى تاياعاندا وزگە وبلىستارعا ەكولوگيالىق تازا كۇيدە جەتكىزىلمەك. ايتا كەتەيىك، ءمىرزاشول حالقىنىڭ بىلتىرعىعا قاراعاندا ۇرتى مايلى. سان-سالاداعى كورسەتكىشتەرى دە ەداۋىر جوعارى. وڭ ناتيجەگە ديحاندار مەملەكەتتىك قولداۋدىڭ ارقاسىندا جەتىپ وتىر.

جامانتاي بەيسەنباەۆ، ماقتارال اۋدانىنىڭ اكىمى;

اۋداننىڭ ەكونوميكاسىنىڭ نەگىزىن اۋىل شارۋاشىلىعى قۇرايدى. وتكەن جىلى وندىرىلگەن اۋىلشارۋاشىلىعى ونىمدەرىنىڭ جالپى كولەمى 59,7 ملرد تەڭگە بولدى، ونىڭ ىشىندە: مال شارۋاشىلىعى 14,1 ملرد. تەنگە، وسىمدىك شارۋاشىلىعى 45,2 ملرد. تەڭگە، اۋىلشارۋاشىلىعى سالاسىنا كورسەتىلگەن قىزمەت 425,7 ملن. تەڭگە بولىپ، ناقتى كولەم يندەكسى 101,9 پايىزدى  قۇرادى.

اباي-اقپارات