«اۋىل تۇرعىندارىن جۇمىسپەن قامتۋ» جوباسى ءوز جەمىسىن بەرۋدە. ماسەلەن، وقو-دا تۇراقتى تۇردە ءسۇت وتكىزۋدەن تابىس الاتىن 30 682 ادام بار، - دەپ حابارلايدى اباي-اقپارات وبلىس اكىمدىگىنىڭ ءباسپاسوز قىزمەتىنە سىلتەمە جاساپ.

اۋىل تۇرعىندارىنا 5 جىل مەرزىمگە تومەندەتىلگەن مولشەرلەمەمەن بەرىلەتىن قارجى شالعايداعى جۇرتشىلىقتىڭ جاعدايىن وڭالتۋدا. ءتيىمدى ۇسىنىستى قابىل الىپ كاسىبىن كوركەيتكەندەردىڭ  ءبىرى تولەبي اۋدانى كوكسايەك اۋىلىنداعى ءابدىرومانوۆتار وتباسى. مەملەكەتتىك باعدارلامانىڭ شاراپاتىن كورگەن شارۋاشىلىقتىڭ تىنىس-تىرشىلىگىمەن ءتىلشىمىز تانىسىپ قايتقان بولاتىن.

ابدىكارىم ءابدىرومانوۆ 2013-ءشى جىلى ليزينگ باعدارلاماسى بويىنشا 2 دانا متز-82/1 ماركالى تراكتور الىپ 55 گەكتار ەگىستىك جەرىن ءوزى وڭدەپ تابىس تابادى. ال 2015-ءشى جىلى جاڭا باعدارلاما بويىنشا  «ىرىس» شاعىن قارجى ۇيىمى ارقىلى 3 جىلعا 3 ملن تەڭگە نەسيە العان. ەكى ۇلى مەن زايىبىن جۇمىسپەن قامتىپ وتىرعان كاسىپكەر الداعى ۋاقىتتا شارۋاسىن كەڭەيتپەك نيەتتە.

«اۋىل تۇرعىندارىن جۇمىسپەن قامتۋ» جوباسى تۇراقتى جۇمىس ورىندارىن اشۋعا، جەكە قوسالقى شارۋاشىلىقتار نەگىزىندە وتباسىلىق بيزنەستى دامىتۋعا زور مۇمكىندىكتەر اشادى. جوبا «جۇمىسپەن قامتۋ 2020» باعدارلاماسى ارقىلى ىسكە جۇزەگە اسىرىلۋدا.

باعدارلامانى ىسكە اسىرۋ باستالعالى بەرى 34,5 مىڭ توننا ەت، 40,2 مىڭ توننا ءسۇت ءوندىرىلىپ. 11 مىڭعا جۋىق جۇمىس ورنى اشىلعان. ودان باسقا تۇراقتى تۇردە ءسۇت وتكىزۋدەن تابىس الاتىن 30 682 ادام بار.

اباي-اقپارات