سوڭعى جىلدارى ورتالىق ازيا اۋماعىندا مەكەندەگەن كيىكتەر  سانى كۇرت كەمىپ بارادى.  قىزىل كىتاپقا ەنگىزىلگەن بۇل جانۋاردى قازاقتار ەرتە زاماننان بەرى كيەلى ساناعان. 2015 جىلدىڭ 29 قاڭتارىندا قر اۋىل شارۋاشىلىعى مينيسترلىگى ەلىمىزدەگى كيىكتەر سانىنىڭ 2005 جىلمەن سالىستىرعاندا 6,4 ەسەگە ارتىپ، 257 مىڭعا جۋىقتاعانىن حابارلاعان ەدى.

كيىكتەردىڭ  جاپپاي قىرىلۋى   وسى قۋانىشىمىزدى سۋ سەپكەندەي باسىپ تاستادى.  قازاقستان توتەنشە جاعدايلار كوميتەتى ءبىر عانا قوستاناي وبلىسىندا 19 مىڭنان استام كيىكتىڭ قىرىلعانىن رەسمي تۇردە مالىمدەدى. وسىعان وراي  قر پارلامەنتى ماجىلىسىندەگى «نۇر وتان» فراكتسياسىنىڭ مۇشەسى ءۋاليحان بيشىمباەۆ اتالعان وقيعانىڭ سەبەبىن انىقتاۋ بويىنشا مەملەكەتتىك قۇرىلىمدار شۇعىل شارا قولدانۋى كەرەك ەكەنىن ايتىپ، ماسەلە كوتەردى. 

«قر اۋىل شارۋاشىلىعى مينيسترلىگى مەن ءبىلىم جانە عىلىم مينيسترلىكتەرىنىڭ قىزمەتكەرلەرى شۇعىل تۇردە كيىكتەردىڭ قىرىلۋى مەن جۇيەلى نەگىزدە، وتاندىق ماماندارمەن عانا شەكتەلىپ قالماي، تاپ وسىنداي ماسەلەلەردىڭ بولۋى مۇمكىندىگىن باعالاۋى مەن بولجاۋىن پىسىقتاسىن»، - دەپ اتاپ ءوتتى دەپۋتات.

ءۋاليحان بيشىمباەۆ «بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىندا  2012 جىلدان 2014 جىلعا دەيىن جانۋارلاردىڭ اراسىندا جۇقپالى اۋرۋلاردىڭ تاراۋى مونيتورينگىن ازىرلەۋگە جانە زەرتتەۋگە باعىتتالعان باعدارلامانىڭ قارجىلاندىرىلىپ، بۇگىنگى كۇنى ونىڭ توقتاپ قالعانىن دا ەسكە سالدى.

سونىمەن بىرگە دەپۋتات، ەلىمىزدىڭ وسىمدىكتەر مەن جانۋارلار الەمىن ساقتاپ قالۋ ءار قازاقستاندىقتى تولعاندىرۋى ءتيىس ماسەلە دەپ ەسەپتەيدى.

 «باياعىدا قازاقستاندا ميلليونداعان كيىكتەر بولدى. الايدا، 90-شى جىلداردىڭ باسىندا جانۋارلاردىڭ ءمۇيىزىن العىسى كەلگەن قاراقشىلاردىڭ كەسىرىنەن ولاردىڭ سانى كۇرت كەمىپ كەتتى. ادامداردىڭ جابايىلىق كوزقاراسى كيىكتەردىڭ جويىلۋىنا اكەلىپ سوقتىردى. كۇنى كەشەگى كيىكتەردىڭ قىرىلۋى – بۇل ءبىزدىڭ ءبارىمىزدىڭ ورتاق قاسىرەتىمىز»،- دەدى دەپۋتات ءۋاليحان بيشىمباەۆ.

 اباي-اقپارات