«قازاقستان پرەزيدەنتى حالىق سانى جونىنەن الدىڭعى قاتارداعى ءوڭىردىڭ ءبىرى سانالاتىن وڭتۇستىك قازاقستان وبلىسىنىڭ دامۋىنا مەملەكەتتىڭ زور كوڭىل ءبولىپ وتىرعانىن اتاپ ءوتتى» دەپ حابارلايدى اقوردانىڭ ءباسپاسوز قىزمەتى.

– ءبىز شىمكەنتتىڭ ميلليوننان اساتىن تۇرعىنى بار قالاعا اينالۋى ءۇشىن قاجەتتى كۇش-جىگەر جۇمساپ وتىرمىز. قالا ءوسىپ، مۇندا جاڭا ورتالىق سالىنۋدا. ءوڭىردىڭ ينفراقۇرىلىمى جاقسارىپ كەلەدى. وبلىس ارقىلى اۆتوموبيل جولدارى مەن تەمىرجول ماگيسترالدەرى، گاز قۇبىرلارى ءوتىپ جاتىر. بۇل جايت بيزنەستىڭ وركەندەۋىنە، جالپى بۇكىل حالىقتىڭ ءال-اۋقاتىنىڭ ارتۋىنا سەپتىگىن تيگىزەدى، – دەدى نۇرسۇلتان نازارباەۆ.

سونداي-اق مەملەكەت باسشىسى اۋىل شارۋاشىلىعى كەشەنىن باسىم دامىتۋ ىسىنە نازار اۋداردى.

– وبلىستىڭ كوكونىس پەن جەمىس-جيدەك وندىرەتىن ناعىز «فابريكاعا» اينالۋعا بارلىق مۇمكىندىگى بار. بۇعان ايتارلىقتاي قاراجات ءبولىنىپ جاتىر، قازىردىڭ وزىندە ونىڭ ناتيجەسى كورىنۋدە. ءبىز زاماناۋي تەحنولوگيالار ەنگىزىلىپ جاتقانىن كورىپ وتىرمىز، سونىڭ ەسەبىنەن ءوندىرىس ۇلعايۋدا. ماسەلەن، بەس جىل ىشىندە اۋىل شارۋاشىلىعى ونىمدەرىن شىعارۋ مولشەرى 2,5 ەسە ءوستى، سونىڭ ناتيجەسىندە ونىڭ ءبىر بولىگىن وبلىس ەكسپورتقا جىبەرە باستادى. بۇدان بولەك، مال شارۋاشىلىعى قارقىندى دامۋدا. وسى جۇمىستىڭ بارلىعى جالعاساتىن بولادى، – دەدى قازاقستان پرەزيدەنتى.

نۇرسۇلتان نازارباەۆ بيىل ەلىمىز حالىق بىرلىگىنىڭ، ءوزارا تۇسىنىستىگى مەن تولەرانتتىلىعىنىڭ نىعايۋىنا سەپتىگىن تيگىزەتىن بىرقاتار ماڭىزدى تاريحي وقيعالاردى اتاپ وتەتىنە توقتالدى.

ءسوزىنىڭ سوڭىندا مەملەكەت باسشىسى وبلىس تۇرعىندارىنا باق-بەرەكە جانە تابىس تىلەدى. 

اباي-اقپارات.