مىنا جاھاندانعان الەمنىڭ باستى قۇرالى اقپارات ەكەندىگىن بىلدىك. بىراق سول اقپاراتتى كىمدەر قالاي پايدالانىپ جاتقاندىعىن بىلگەنمەن، سەزىنبەي جاتىرمىز..ءالى سافپىز، اڭعالمىز، اڭقاۋمىز... ويسىز، كوكىرەكتەگى كوزگە ەمەس، ماڭدايداعى كوزگە سالىپ، كورگەنىمىزدى ىستەگىمىز كەلەدى... بۇل بالالىق پسيحولوگيا. بۇل بالانىڭ ءىسى. "كودەك كورگەنىن ىستەيدى" دەيدى قازاق. كودەك دەگەنى بالا دەگەنى... "قاشان كەتەر ءبىزدىڭ ەلدەن بالالىق" دەپ زارلاۋمەن كەلەمىز...
از قازاقتى ءار ساققا سالىپ، سوپى-ۋاحابي، قارا-سارى قازاق دەپ ءبولىپ تاستادى. باس-باسىنا مۋفتي بولىپ قيقىمدالىپ بولدىق... ءوزىڭدى ەمەس، وزگەنى تىڭدايتىن بولدىق... ءپاتۋانى سىرتتان الىپ، ءوز ەلىمىزدەگىلەردىى مەنسىنبەي كوزگە ىلمەيتىن بولدىق، جاماگات تا كوپ، جاق-جاق بولىپ ايتىسا بەرەتىن بولدىق... كوز الدىمىزدا باۋىرىمىز سيرياعا اسىپ كەتىپ جاتسا، جاسىرىپ، "اللانىڭ قالاۋىن ورىنداۋعا بارا جاتىر" دەپ وزەۋرەيتىن بولدىق. "ول جەر - سوعىسقا دايىندايتىن جاقسى پراكتيكالىق ورتالىق" دەگەندى ايتا باستادىق. شاحيدتىك دەگەندى ءمانىن تۇسىنبەسەك تە "موداعا" اينالدىردىق...
سوندا كىممەن قالاي سوعىسپاقپىز؟ قاي سوعىسقا دايىندالىپ جاتىرمىز؟ كەشە جاپ-جاس قازاق بالاسىن قولىنا قارۋ الدىرىپ، ۇكىم ورىنداتتى. ساعان شابلون دايىنداپ جاتىر. قازاقتىڭ جاۋى قازاق دەگەن. ول ەرتەڭ ۇلعايا بەرەدى... سوپى قازاق - سالاف قازاقتىڭ جاۋى، سارى قازاق - قارا قازاقتىڭ جاۋى... بولىپ تەرەڭدەي بەرەدى...
سول ما ساعان كەرەگى؟ دامۋ دەگەن وسى ما؟ دامۋ دەگەن تەك قايشىلىقتان تۋا ما؟ ەستەرىڭدە بولسىن، قازاق قاي كەزدە باۋىرىمەن قايشىلىققا ءتۇستى - سول كەزدە سىرتقا جەم بولدى. قاي كەزدە ءوزدى-ءوزىن مەنسىنبەدى - سول كەزدە باسقاعا قۇرال بولدى. سىرتقى كۇشكە ارقا سۇيەپ، ءوز باۋىرىن ەزۋگە نيەتتەنگەن حان-قارالار دا سولاي تاريح بولىپ قالدى. تاريحىڭا ورال، ءوزىڭدى ءوزىڭ زەرتتە! مىنا قاسيەتتى توپىراقتى، مىنا بوزداق ەلدى سىرتتان ەشكىم كەلىپ ساعان وتان قىلىپ بەرگەن ەمەس. ونى ساعان اتا-باباڭ امانات قىلىپ، جان پيدالىقپەن، قانىمەن سۋارىپ كەتتى. سەن ءوز جەرىڭدى ارشىپ كور، ءالى سول قاننىڭ ءيىسى مۇڭكىپ تۇر. سەن سيرياعا قاننىڭ ءيىسىن ساعىنىپ بارساڭ، سوعىس ساعىنىپ بارساڭ، قاتەلەسەسىڭ!!! ساعان دەيىن وسى توپىراقتا اتا-باباڭ قانشا قان توككەنىن، نە ءۇشىن قانسىراعانىن بىلمەيسىڭ دەگەن ءسوز...
مىنا ەگەمەندىگىمىزدى جانىمىزدان ارتىق قورعاپ، قازاقتىڭ وسۋىنە، وركەندەۋىنە، عىلىمىنا، ونەرىنە، تىنىشتىعىنا، تۇراقتىلىعىنا، باۋىرلاستىعىنا ارناماعان قانىڭ ەشقاشان شاحيد قانى سانالمايدى!!!
اتالارىمىز سالىپ بەرگەن "زامان، ماكان، يحۋان، رابت سۋلتان" شارتتارى عانا ءبىزدى ء"بىز" قىلادى. ول تاريح، ول تاجىريبە، ول ۇلتتىق بولمىسىڭ!

(جازبا اۆتوردىڭ facebookتەگى پاراقشاسىنان الىندى)