ەكس-ەلشى، قازاقستانداعى قىزمەتى كەزىندەگى جاساعان قىلمىسى ءۇشىن حالىقارالىق ىزدەۋدە بولعان، سوڭعى ايلاردا اۆستريادا ۇستالىپ، تۇرمەدە وتىرعان راحات اليەۆ قايتىس بولدى. بۇل تۋرالى اۆستريانىڭ باسىلىمدارىنا سىلتەمە جاساي وتىرىپ، ەلىمىزدەگى اقپارات كوزدەرى جاريالاپ جاتىر. دەرەككوزىنە بەلگىلى بولعانداي، قاماۋداعى اليەۆ جەكە كامەرادا اسىلىپ قالعان... بۇعان دەيىن جالپى كامەرادا وتىرعان ەكس-ەلشىنى جاقىن كۇندەرى وقشاۋلاۋعا شەشىم قابىلدانعان بولاتىن. اليەۆتىڭ ادۆوكاتتارى مەن تەرگەۋشىلەر ءىستىڭ ءمان-جايى زەرتتەۋدە.

اليەۆتىڭ اكەسىنە جازعان حاتى: باقىلداسۋى ما؟

راحات اليەۆتىڭ قازاسىنا وراي اقپاراتتار لەگى ونىڭ «facebook» جەلىسىندەگى جەكە پاراقشاسىندا اكەسى مۇحتاردىڭ دۇنيە سالعان كەزدە جازعان حاتىنا ورالۋعا يتەرمەلەدى. «سەنىڭ دۇنيەدەن قايتقانىڭ جايلى حابار ماعان وتە اۋىر ءتيدى. ۆەناداعى تەرگەۋ اباقتىسىنا سىرتتان اقپارات كەشىگىپ جەتەدى. ويىمداعىنى جەتكىزۋگە ءسوز تابا الار ەمەسپىن... اكە، سەن قاي كەزدە دە، بارلىق جاعىنان ماعان ۇلگى بولاتىنسىڭ. جەلى ۇزىلمەي سوعىپ تۇراتىن قىزىلوردانىڭ الىس تۇكپىرىنەن اتتانىپ،ەلىڭە، الەمگە ايگىلى ادام اتاندىڭ. شيپالى قولىڭمەن قانشا ادامعا ءومىر سىيلادىڭ، اقىرىنا دەيىن دارىگەرلىك انتىڭا ادال بولدىڭ... اكە رەتىندە ءاردايىم ماعان قامقور بولا ءبىلدىڭ، ساعان قارىزدارمىن سول ءۇشىن!» دەپ باستالاتىن ۇزاق جازباسىن راحات مارقۇم قانداي جاعدايدا دا اكەنىڭ ورىنى ايرىقشا بولىپ قالاتىنىن ايتىپ، «سەنى ساعىناتىن بولامىن... كەشىر، اكە!» دەپ اياقتاپتى. مۇمكىن بۇل ەكس-ەلشىنىڭ قاراپايىم پەندە رەتىندە بۇل دۇنيەمەن باقىلداسۋى شىعار... ادام ءوز تاعدىرىنىڭ قالاي قالىپتاساتىنىنا ىقپال ەتە العانىمەن، اقتىق دەمىنىڭ قالاي، قاي جەردە ۇزىلەتىنىن بولجاي بىلمەيتىندىگى اقيقات ەندى...