قازاق حاندىعىنىڭ نەگىزدەلگەنىنە 550 جىل تولۋىن مەرەكەلەۋگە ارنالعان لوگوتيپتىڭ بەكىتىلگەن ءتۇرى ءوزىنىڭ مازمۇنىنا ساي دەگەن تۇجىرىم جاساۋعا بولادى.

بىرىنشىدەن، كۇن شاپاعىمەن كومكەرىلگەن شاڭىراق قازاق حالقىنىڭ، قازىرگى قازاقستان تەرريتورياسىندا سوناۋ قولا داۋىرىنەن باستاۋ الاتىن اتا-بابالارىنىڭ بارشا تۇرمىسى، سەنىمى، مادەنيەتىنىڭ جيىنتىعى ەكەندىگى بەلگىلى. شىندىعىندا دا حالقىمىزدى كيىز ءۇيدىڭ شاڭىراعىنسىز ەلەستەتۋ مۇمكىن ەمەس. شاڭىراق وتباسى، ەلدىڭ ءبىر ورتالىققا بىرىگىپ، ءبىر اۋىز سوزگە جيىلۋىنىڭ بەلگىسى رەتىندە حالقىمىزدىڭ ساناسىنا سىڭگەن. وسى ارقىلى شاڭىراق قازىرگى كۇنى مىقتى بىرلەستىكتىڭ، حالىق پەن ۇلتتىڭ جينالىپ، ەل بولۋىنىڭ بەينەسىنە اينالدى.

شاڭىراقتى قورشاي بەينەلەنگەن كۇن شاپاعى ەلدىڭ تىنىشتىعىن، تۇرمىسىنىڭ مولشىلىعىن، ءبىر ماقسات پەن ەڭبەكتى نەگىز ەتكەن مامىرجاي دا باقىتتى ءومىرىن پاش ەتەدى. سونىمەن قاتار ول قازاق ەلى ۇنەمى قولداپ، ۇمتىلىپ كەلگەن بارشا بولمىستىڭ كەپىلى – الەمدىك بەيبىتشىلىكتىڭ بەينەسى بولىپ تابىلادى..

تاۋ مەن شىڭنان اسىپ، كۇن استىندا قالىقتاپ ۇشقان قىران بۇركىت  - قازاق ەلىنىڭ بولاشاققا قۇلاش ۇرعان اسقارالى جوسپارلارىنىڭ ىسكە اساتىندىعىنىڭ تاڭباسى. ياعني، لوگوتيپتەگى وسى بەينەلەر ۇلتىمىزدىڭ ۇزاق مەرزىمدىك دامىپ، وركەندەۋ تاريحىنىڭ بارشا كەزەڭدەرىنىڭ كورىنىسى بولىپ كەلەدى.

ەكىنشىدەن، “ماڭگىلىك ەل” بولۋعا نيەت ەتكەن قازاق حالقىنىڭ بىرنەشە مىڭ جىلدىق مەملەكەتتىلىگىنىڭ ۇلكەن بۋىنى قازاق حاندىعىنىڭ 550 جىلدىعىن ناسيحاتتاپ، قازىرگى ۇرپاقتىڭ بويىندا ۇلتىنىڭ وتكەنىنە ماقتانىش سەزىمىن تۋدىرۋ جانە “جاڭا قازاقستاندىق ءپاتريوتيزمدى” قالىپتاستىرۋدا وعان ارنالعان كەز كەلگەن شىعىن ءوزىن اقتايدى دەپ ەسەپتەيمىز.

عاني قاراساەۆ،

تاريح عىلىمدارىنىڭ دوكتورى، پروفەسسور، قر بعم عك مەملەكەت تاريحى ينستيتۋتى “دەرەكتانۋ، تاريحناما جانە وتان تاريحى” ءبولىمىنىڭ باسشىسى.

اباي.kz