7 اقپان كۇنى ءتۇس اۋا، 81 جاسقا قاراعان شاعىندا بەلگىلى جازۋشى، اۋدارماشى، پۋبليتسيست گەرولد بەلگەر دۇنيە سالدى. ول الماتىداعى پرەزيدەنت ءىس باسقارماسى ورتالىق كلينيكالىق اۋرۋحاناسىنىڭ جانساقتاۋ بولىمىنە 21 قاڭتار كۇنى جۇرەك تالماسىمەن تۇسكەن بولاتىن.

قازاقى ورتا «گەراعا» دەپ اتاپ كەتكەن قالامگەر 1934 جىلدىڭ 28 قازانىندا ەدىل وزەنى بويىنداعى ەنگەلس قالاسىندا (رەسەي) دۇنيەگە كەلگەن. 1941 جىلى ءستاليننىڭ بۇيرىعىمەن جاپپاي جەر اۋدارىلعان نەمىس وتباسىلارىنىڭ قاتارىندا قازاقستانعا – قازىرگى سولتۇستىك قازاقستان وبلىسىنداعى ەسىل وزەنىنىڭ بويىنا، بۇگىنگى ىسقاق ىبىراەۆ اتىنداعى اۋىلعا كەلىپ، تۇراقتاعان.

قارشادايىنان قازاق بالالارىمەن ويناپ، قازاق مەكتەبىندە وقىپ، قازاق ءتىلىن جاقسى مەڭگەرگەن گ.بەلگەر كەيىن الماتىداعى قازاق پەداگوگيكالىق ينستيتۋتىنىڭ (قازىرگى اباي اتىنداعى مەملەكەتتىك ۋنيۆەرسيتەت) فيلولوگيا فاكۋلتەتىن تامامداعان. ەڭبەك جولىن ورىس ءتىلى ءپانىنىڭ مۇعالىمى بولىپ باستاعان ول 1964 جىلدان باستاپ جازۋشىلىقپەن، اۋدارماشىلىقپەن اينالىستى. 1971 جىلى قازاقستان جازۋشىلار وداعىنا مۇشە بولدى. ب.مايلين، ع.مۇسىرەپوۆ، ءا.نۇرپەيىسوۆ، د.دوسجانوۆ جانە ت.ب. قازاق جازۋشىلارىنىڭ تالاي تۋىندىسىن ورىس تىلىنە تارجىمەلەدى.

40 شاقتى كىتابى جارىق كوردى، 1600-دەن استام ماقالا-جاريالانىمدارى ءباسپاسوز بەتىنە شىقتى. 1994-1995 جىلدارى قازاقستان رەسپۋبليكاسى جوعارى كەڭەسىنىڭ دەپۋتاتى بولدى.

اباي.kz پورتالىنىڭ ۇجىمى قازاق، ورىس، نەمىس تىلدەرىندەگى ادەبي الەمگە ءوز ەڭبەگىن سىڭىرگەن اياۋلى قالامگەر گەرولد بەلگەردىڭ قازاسىنا بايلانىستى، مارقۇمنىڭ وتباسى مەن تۋعان-تۋىستارىنا قايعىرىپ كوڭىل ايتادى.