قازىر كوبىمىز موتيۆاتسيا ىزدەيتىن بولعانبىز. ستيۆ دجوبس، بيلل گەيتس، مارك تسۋكەربەرگ... پالەن ءانشى، تۇگەن اكتەر... قۇداي-اۋ، كوپ وزدەرى! سولارعا قاراپ بوي تۇزەپ، وي تۇزەپ جاتاتىنىمىز دا جاسىرىن ەمەس. 
ەگەر ءبىز ۇلتىمىزدىڭ وتكەن سۇرلەۋ-سوقپاعىنا ۇلتاراق بوپ توسەلگەن ۇلى تۇلعالارىمىزدى تەرەڭىرەك تاني تۇسسەك، موتيۆاتسيا اتاۋلىنىڭ كوكەسى ءوزى-اق كەلىپ قونادى ەكەن عوي بويىمىزعا. 
تيىن-تەبەننەن قىسىلعان جۇسىپبەك ايماۋىتۇلىنىڭ وقۋدان تىس كەزدەردە ورىس-تاتار كەمپىرلەرىنىڭ قورا-قوپسىسىن تازالايتىنىن، ەتىكشىلىكپەن اينالىسا ءجۇرىپ، قولى قالت ەتكەندە قاعازعا شۇقشياتىنىن زەيتىن اقىشەۆتىڭ ەستەلىكتەرىنەن وقىعان شىعارسىز؟ جۇسىپبەك اتامىز سۇلتانماحمۇت تورايعىرۇلىنىڭ جيىرماعا تولماي-اق قۇران كارىمنىڭ 13 پاراسىن جاتتاپ العانىن جازىپتى. ءبىر جاعىنان قارجىلىق قىسپاق، ەكىنشى جاعىنان وكپە اۋرۋى جانى مەن ءتانىن قيناسا دا، «جۇماسىنا ءبىر رەت قانا وبەد ەتىپ»، «الا قاعازدان باس المايتىن» سۇلتانماحمۇت ءبىزدىڭ زامانداسامىز بولا قالسا، وقجەتپەستەي وكسفوردتىڭ PhD دوكتورانتۋراسىنا ويلانباي-اق ءتۇسىپ كەتەر مە ەدى دەيمىن كەيدە... 27 جاسىندا دۇنيە سالعان ۇلت ۇلانىنىڭ ارتىندا 2 رومان، 4 پوەما، جۇزدەگەن ولەڭدەرى مەن ماقالالارى قالدى. «ويان، قازاعىن» ۇرانداتىپ، ءتورت ساعاتتان ارتىق ۇيىقتامايتىن مىرجاقىپتىڭ دا، 64-ىندە دۇنيە سالىپ، 64 تومعا جۇك بولارلىق مۇرا قالدىرعان مۇحتار اۋەزوۆتىڭ دە (50 تومدىققا ەنبەگەن مۇرالارى بار ەكەن) ءومىرى ونەگەگە (سونىڭ ىشىندە موتيۆاتسياعا) تولى. قايسىبىرىن ايتا بەرەمىز! كوپ قوي، قۇدايعا شۇكىر! 
سۇلتانحان ءجۇسىپ اعامىزدىڭ ءاليحان بوكەيحانۇلىنىڭ 19 تومدىعىن شىعارعالى جاتقانىن ەستىگەن سوڭ، وسى وي تاعى دا ورالدى. ۇلت ۇلىلارى قاشان ۇلگەرگەن سونىڭ بارىنە ءوزى؟! تاڭ قالاسىڭ تاعى دا!.. اللا ولاردىڭ ءار ىسىنە، ۋاقىتىنا بەرەكە بەرىپ قويعان عوي، ءسىرا. وزدەرىندە دە ادام ايتسا نانعىسىز ىنتا مەن جىگەر بولىپتى. «الاش تۋى استىندا كۇن سونگەنشە سونبەۋگە» انتتاسقان ارداقتىلارىمىز قاي قىرىنان دا بىزگە ۇلگى بولۋعا جارايدى. بيزنەس پە، عىلىم با، باسقا ما – بارىنە، قىسقاسى! 
ءيا، راس، ولار جاڭاعى ستيۆ پەن بيلل كوكەلەمىزدەي بيزنەسمەن بولماعان شىعار. ءارى-بەرىدەن سوڭ، سول بيلل گەيتستەر قازاق قوعامىندا بيزنەسپەن اينالىسا قالسا، وسى بيىگىنە جەتە الماي، ومىردەن بەزىپ تە كەتەر مە ەدى. ال، قازاقتىڭ قىراندارى يدەيا ءۇشىن – ۇلت مۇراتى ءۇشىن قاندايدا قيىندىقتان تايسالمادى! مىنە، موتيۆەيشن! 
كەشىرىڭىز، مەن الەمدىك تۇلعالار تاجىريبەسىنەن ۇيرەنبەڭىز دەمەيمىن. پايدالى بولسا، الۋ كەرەك، قارمانىپ قالۋ كەرەك. تەك كوبىنە-كوپ ءتول تاريحىمىزداعى تالاي دۇنيەلەردى قاپەردە ۇستاي بەرمەيتىنىمىزدى ايتقىم كەلگەن ەدى... 
الەۋمەتتانۋدا مىناداي ءبىر قاعيدا بار ەكەن. ء«السىز ەلدەر كەمەلدىك اتاۋلىنىڭ كىلتى تەك كۇشتى ەلدەردىڭ قولىندا عانا بار دەپ ويلايدى» دەگەن. راس. اسىرەسە، وتارلانعان ەلدەردىڭ ادامدارىنىڭ پسيحولوگياسىندا وسى نارسە ايقىن كورىنەدى. باتىس بىزگە كوپ نارسە بەرە الادى. بىراق ەڭ نەگىزگى دۇنيەنى بەرە المايدى!.. 
ال، ءسىز قانداي مىقتى مىسال ايتار ەدىڭىز؟ جىگەرىمىزدى جانىپ، قايراتىمىزدى قامشىلاي وتىرايىق.

نۇرلان قۇدايبەرگەنوۆ.

(جازبا اۆتوردىڭ facebookتەگى پاراقشاسىنان الىندى)