وزبەك وپپوزيتسياسى يسلام كاريموۆتىڭ دەنساۋلىعىنىڭ كۇرت ناشارلاپ كەتكەنىن جارىسا ايتىپ جاتىر. «وزبەكستان حالىق قوزعالىسىنىڭ» بەلسەندىلەرى ەل ۇكىمەتىندەگى سەنىمدى اقپارات كوزدەرىنە سىلتەمە جاساپ، مەملەكەت باسشىسىنىڭ دەنساۋلىعى 28 قاڭتار كۇنى كۇرت ناشارلاپ، يسلام كاريموۆتىڭ ەسىنەن تانىپ قالعانىن ايتادى دەپ حابارلايدى Ult.kz سايتى.

ۆەستي.kg پورتالىنا بەرگەن سۇحباتىندا ساراپشىلار كاريموۆتىڭ دەنساۋلىعىنا بايلانىستى ەلدى تۇراقسىزدىق جايلايدى دەپ بولجاپ وتىر.

«باسقا مەملەكەتتەرمەن سالىستىرعاندا وزبەكستانداعى وپپوزيتسياعا قىسىم قاتتى كورسەتىلدى. سونىڭ سالدارىنان، ەلدەگى وپپوزيتسيا ەكسترەميستىك مازمۇنعا يە بولدى. بۇعان دەيىن ولاردى يسلام كاريموۆ ورناتقان كۇشتىك تارتىپپەن عانا ۇستاپ وتىرۋ مۇمكىن بولىپ كەلدى. ەندى ول مەملەكەت باسقارۋىنان كەتسە، ەلدى تۇراقسىزدىق جايلايدى» دەپ بولجايدى ساراپشىلار.

جالپى، وزبەكستاننىڭ بۇقارالىق اقپارات قۇرالدارىندا پرەزيدەنتتىڭ دەنساۋلىعى - ءجيى كوتەرىلەتىن تاقىرىپ. 2013 جىلى جەرگىلىكتى باق كاريموۆ جۇرەك تالماسىنا ۇشىراپ، اۋىر حالدە جاتىر دەپ اقپارات تاراتقان. بىراق، بۇل اقپاراتتى يسلام كاريموۆتىڭ ءوزى ماسكەۋگە ساپار جاساپ، جوققا شىعارعان ەدى.

يسلام كاريموۆتىڭ مەملەكەت بيلىگىندە وتىرعانىنا 25 جىل تولدى. ول وسى جىلى وتەتىن پرەزيدەنتتىك سايلاۋعا قاتىسۋعا نيەتتى. پرەزيدەنت سايلاۋى وزبەكستاندا 29 ناۋرىزعا بەلگىلەنگەن.

كاريموۆتىڭ پرەزيدەنتتىك سايلاۋعا كەزەكتى رەت تۇسۋگە بەل بايلاپ وتىرعانى، ءسىرا، ونىڭ دەنساۋلىعىنىڭ قالىپتى ەكەندىگىن بىلدىرسە كەرەك. ال، «يسلام كاريموۆ ءحال ۇستىندە جاتىر» دەگەن ءسوز قاۋەسەت كورىنەدى.

اباي-اقپارات