بۇگىن - مۇحتار ماعاۋيننىڭ تۋعان كۇنى. قازاق حالقىنىڭ ماڭدايىنا بىتكەن بىرەگەي جازۋشى جەتپىس بەس جاستىڭ بيىگىنە شىعىپ وتىر.

ەگەر ءبىزدىڭ ەلدە ۇلت رۋحانياتىنىڭ شەجىرەسىن ءتۇزۋ جۇمىستارى جوسپارلى تۇردە جۇرگىزىلىپ وتىرعان بولسا، ونىڭ مۇحتار ماعاۋينگە قاتىستى تاراۋى قالىڭ دا مازمۇندى بولىپ شىعار ەدى. جازۋشىلىعى ءبىر توبە، عالىم رەتىندەگى ەڭبەگى ۇشان تەڭىز، ازاماتتىعى كەرۋەنگە جۇك بولارلىقتاي الاش ازاماتىنىڭ اتىنا ايتىلار ماداق از بولماسا كەرەك.

بۇگىندەرى پراگا قالاسىندا تۇرىپ جاتقان جازۋشى شىعارماشىلىق قارىشتاۋدىڭ شىڭىنا شىققانداي بولىپ كورىنەدى. سوڭعى كەزەڭدە جازىلعان تۋىندىلارى - سونىڭ ايعاعى.

اتا جاسىنا الماس قىلىشتاي جارقىلداپ جەتكەن ۇلت جازۋشىسىنا تەلەگەي تىلەك ارناي وتىرىپ، مۇقاڭا دەگەن تۋعان حالقىنىڭ ماحابباتىنداي بولىپ وقىلاتىن وقىرمان حاتتارىنىڭ العاشقى لەگىنە كەزەك بەرىپ وتىرمىز. سونداي-اق، ءار جىلدارى جازۋشى قالامىنان تۋعان تولىمدى تۋىندىلاردى دا قايتالاپ وقۋدى نيەت ەتتىك. جانە جازۋشىنىڭ مەرەيتويىنىڭ قۇرمەتىنە وراي «ماعاۋين - 75» اتتى ارنايى ايدار اشىپ، ونى جىل بويىنا جۇرگىزىپ وتىرۋدى ماقسات قىلدىق.

اباي.kz پورتالىنىڭ رەداكتسياسى.