بىرەۋلەر ويلايدى: «كىم تانىمال بولعىسى كەلمەيدى؟» دەپ. ال بىرەۋلەر: «تانىمال بولۋ دارىندى، تالانتتى جاندارعا ارنالعان» دەپ. تانىمال بولعان جۇلدىز نەمەسە تانىمال قوعام قايراتكەرلەرىنىڭ حالىق الدىنداعى جاۋاپكەرشىلىگى قانداي دارەجەدە؟ ءبىزدىڭ «تالانتىمىزعا» بولاشاقتا وزگە ۇلتتار قانداي باعا بەرە الادى؟ بۇگىندە كەز كەلگەننىڭ ءوزىن جۇلدىز سەزىنۋى قوعامدىق دەرتكە اينالىپ بارا جاتىر. وسىعان بايلانىستى ۇلتىمىزدىڭ ونەرىندەگى ءار سالاسىندا كوپتەگەن جىلداردان بەرى تەر توگىپ جۇرگەن ازاماتتارى ءوز ويلارى مەن پىكىرلەرىن ورتاعا سالادى.

تالانتتى تانيتىن اقساقالدار جوق

قادىرعالي كوبەنتاي، ءازىل-سىقاق تەاترى اكتەرى، كومپوزيتور، ءانشى ءارى اقىن:

• نەگىزىندە تانىمالدىلىق پەن تالانت دەگەنىڭىز ەكەۋى ەكى ءتۇرلى دۇنيە. تالانت دەگەنىڭىز ءتاڭىردىڭ بەرگەن، انا سۇتىمەن قوسا كەلەتىن ۇلكەن ءبىر قاسيەت دەر ەدىم. تانىمالدىلىق مۇلدە بولەك. مىسالى، ءبىر انمەن دە حالىققا تانىلىپ كەتىپ جۇرگەن انشىلەر بار. ەگەر اكتەر بولسا ءبىر رولىمەن، رەجيسسەر بولسا قويعان ءبىر كينوسى ارقىلى، اقىن بولسا ءبىر ولەڭىمەن دە تانىلا الادى. ال ءبىزدىڭ قازىرگى قوعامداعى مۇنداي ءجايت – تەك ارتىستەرگە نەمەسە اقىن-جازۋشىلارعا عانا بايلانىستى ەمەس، بۇل بۇكىل قوعامعا دارىعان ىندەت سەكىلدى بولىپ كەلگەن «جۇلدىزدىق» اۋرۋ! كۇيشى اعامىز سەكەن تۇرىسبەكوۆتىڭ جاقسى ءبىر ءسوزى بار ەدى: «مەن قازىر بايقايمىن، وسى قازىر اسپانداعى جۇلدىزدان گورى جەردەگى جۇلدىزدار كوبەيىپ كەتكەن سياقتى»، - دەيتىن. قازىر مەن حالقىما قاراپ وتىرسام وسى سوزدەر ەسكە تۇسەدى. بىزدەگى ساياساتكەرلەردىڭ ىشىندە وزدەرىن جۇلدىزبىز دەپ ەسەپتەيتىندەر بار. بۇگىن اقىن، ءانشى، اكتەرلەردىڭ دە وسىنداي جۇلدىزدىق اۋرۋعا شالدىققان كەزى. ءسىزدىڭ قوزعاپ وتىرعان تاقىرىبىڭىز وتە اۋىر جانە جاۋاپكەرشىلىكتى تالاپ ەتەتىنى انىق. سوندىقتان بۇل تاقىرىپقا جاۋاپ بەرۋ دە ەشكىمگە وڭاي سوقپاس دەپ ويلايمىن. «جۇلدىزداردىڭ» دا، كورەرمەندەردىڭ دە تالانت پەن تانىمالدىلىقتىڭ مانىسىنە جەتە الماۋىنا بۇگىنگىنىڭ سىنشىلارى كىنالى. جاقسى ايتىلعان سىن قاشاندا جاقسى شىعارمالاردىڭ تانىلۋىنا سەبەپ بولادى. «جۇلدىز» دەگەن ءسوزدىڭ ءوزىن ورىستىڭ «زۆەزداسىنان» تىكەلەي اۋدارىلعان ءسوز. ورىستار اتايتىن «زۆەزدانىڭ» تۇپكى ماعىناسىن مەن باسقاشا ويلايمىن. بۇل كۇندە ءوزىم ونەردى زەرتتەۋمەن اينالىسىپ جۇرگەن جايىم بار. ونەردە مىناداي ءبىر تەرمين بار – ونەردەگى ءوزىڭدى ەمەس، وزىڭدەگى ونەردى سۇيە ءبىل دەگەن. ال بىزدەگىلەردىڭ كوبى ونەردە جۇرگەن وزدەرىن سۇيەتىن ءتارىزدى كورىنەدى. كوبىسىنىڭ ويى – «مەن تەلەارناعا شىقتىم، مەن تانىمالمىن، جۇلدىز بولدىم. ايتپەسە، مەن نە ءۇشىن شىقتىم تەلەارناعا؟» دەگەندەيىن وزدەرىنىڭ باعىتىنىڭ قايدا بارا جاتقانىن ۇقپاي جۇرگەندەر. بۇل سياقتى تۇسىنىكتە جۇرگەندەر ۇلت ونەرىنىڭ بولاشاعى ءۇشىن قاۋىپتى. سوسىن تاعى ءبىر توبىرلىق مادەنيەت دەگەنىمىز بار. بىزدەگى ءان سالۋ – توبىرلىق مادەنيەتكە اينالىپ وتىر. بۇگىن ءانشىڭىز دە، اكىمىڭىز دە، اقىنىڭىز بەن ساياساتكەرلەرىڭىز، ءتىپتى بەس جاستاعى بالا-شاعاڭىز دا ءان ايتۋدى ادەت ساناپ كەتتى. ال بۇلاردى «ءانشى» ەتىپ تۇرعان تەحنيكالىق اپپاراتتار. وسىعان ءتان مەنىڭ تاعى دا ءبىر ايتارىم -بىزدە مىناداي ءبىر ۇعىمدار بار. ماسەلەن، ءبىزدىڭ كورەرمەندەر كەيدە: «اناۋ اكتەرگە نە بولعان، كەيىنگى كەزدە ءان ايتىپ كەتكەنى نەسى؟» دەپ جازعىراتىنى بار. شىن مانىسىندە اكتەرلەر ءاندى انشىلەردەن گورى اناعۇرلىم جاقسى ايتادى. ويتكەنى، اكتەر ءاننىڭ ءسوزىن جاقسى تۇسىنەدى. جاس انشىلەردە ستيل دەگەن اتىمەن جوق. ءبارى دە تۋرا ءبىر ينكۋباتوردان شىققان بالاپاندار سياقتى. قازىرگى انشىگە ءتان قالىپتاسقان، «بۇل مىناۋ انشىگە ءتان» دەيتىن ستيل جوق. مۇنىڭ ءوزى دە ءبىزدىڭ قوعامعا كەلگەن تالانت پەن تانىمالدىلىقتى اجىراتۋدى قيىنعا سوقتىرىپ وتىرعان جاعدايلار. سوسىن بىزدە تاعى دا قىزىقتى ءبىر جاعدايلار سول – ابايدىڭ سوزىمەن ايتقاندا، كەيدە وسى ناداندىققا كەتىپ بارا جاتىرمىز با دەپ تە ويلايمىن. بىزدە ءبىلىم ساپاسى تومەن دەڭگەيدە. ونەردىڭ قاي قايسىسىندا بولماسىن بىلىمدىلىك جوق. بىرجاقتىلىق پايدا بولعان. بۇرىن كەڭەس ۇكىمەتى كەزىندە مىناداي ءبىر ءسوز بار ەدى: «ۋ پەۆتسوۆ موزگوۆ نە بىۆاەت، ۋ نيح ودنوگولوسورەگيستر» دەپ ايتۋشى ەدى. وسى ءجايت بۇگىن ءبىزدىڭ قازاقتىڭ باسىنا كەلگەن سىڭايى بار. ويتكەنى، قازىر ءبىزدىڭ انشىلەر كەيبىر تەلەباعدارلامالاردى جۇرگىزىپ ءجۇر. تەلەباعدارلامانى جۇرگىزۋ ءۇشىن ادامعا ۇلكەن ەڭبەك كەرەك، ۇلكەن بىلىممەن قوسا پاراساتتىلىق جانە جۇرەك قاجەت دەپ سانايمىن. وسىنىڭ بارىنەن جۇرداي ادامدار تەلەديداردان باعدارلامالاردى جۇرگىزۋدى قولعا العان. مۇنىڭ ءوزىن قالايشا دۇرىس دەي الاسىڭ! بۇعان جول بەرمەۋ كەرەك. بۇرىنعىداي كوركەمدىك كەڭەستە وسىندايدا ونەرپازداردىڭ ونەرىن ساراپتاپ جولعا سالىپ وتىراتىن مىقتى دا تاجىريبەلى ماماندار بولدى. سول جىلدارى مەنىڭ كوزىم كورگەن اسقار توقپانوۆ دەگەن پروفەسسور بولعان. سوندا «اسقار توقپانوۆ كەلە جاتىر!» دەسە ءبارى دە قاسقىردان بۇققان يتكە قۇساپ بەزە جونەلەتىن. مىنە، سول سەكىلدى كىسىلەر قامشىسىن سىلتەپ تۇرسا ءبىزدىڭ بۇگىنگى ونەرىمىزدىڭ قادىرى مۇنشالىقتى قاشپاس ەدى دەپ ويلايمىن. سوندا اسقار توقپانوۆ سپەكتاكلدەرگە نە كونتسەرتتەرگە كەلىپ، ءبىرىنشى قاتاردا وتىرا قالىپ قولىنداعى تاياعىن سىلتەپ: «حالتۋرششيك! ءتۇس ساحنادان!» دەپ ايقايلاپ تۇراتىن. ونەردى قورلاپ نەشە ءتۇرلى قۇبىلاتىنداردى ەلدىڭ كوزىنشە دە ايامايتىن. ول كىسىدەن ءارتىس قاۋىمى تۇگەلدەي تايسالاتىن ەدى. سونداي سوزدەردى ەستىمەس ءۇشىن بارىن سالىپ دايىندالاتىن. مىنە، ورتا بەلدەن باسىپ ايتاتىن وسىنداي اقساقالدار بۇگىندە جوق. قازىرگى اقساقالداردىڭ ترويبوليزمدىك سارىنعا ءتۇسىپ الىپ، رۋ-رۋعا ءبولىنىپ، قازىرگى شىعىپ كەلە جاتقان جاس اقىندار مەن باسقا دا ونەرپازداردى رۋىنا قاراپ تاڭداپ شالا ءبۇلىنىپ جاتقان اقساقالدار دا بار! سوندىقتان دا، تالانت پەن تانىمالدىلىقتىڭ اراسىن اجىراتا الماي جۇرگەندەر – ءبىزدى ۇلتتىق مەنتاليتەتتەن اجىراتىپ، ەلدى جۇگەنسىزدىككە اكەلەتىن دەرتكە تاپ قىلدى. مۇنىڭ ءتۇبى جاقسىلىققا اپارا قويمايدى. كەرەك دەسەڭىز بۇل ءبىزدىڭ شۇرايلى تىلىمىزگە نۇقسان كەلتىرەتىن نارسەلەر. قازىرگى تاڭدا ساحنادا دۇرىس سويلەي بىلمەيتىن، سويلەۋ مادەنيەتى تومەن ارتىستەر ءجۇر. ونسىزدا شۇبارلانىپ ورىسشا تەرميندەر ارالاسىپ كەتكەن ءتىلىمىزدى ونان سايىن اقساتاتىن كۇيگە ءتۇسىرىپ وتىر. مەن «باۋىرجان شوۋدان» باستاپ باسقا دا ءازىل-سىقاق تەاترلارىندا كوپ جىلدار ءجۇردىم. بىراق مەن تەاتردان كەتكەن سوڭ كورەرمەندەر ىلعي مۇنىڭ سەبەبىن سۇرايتىن. سەبەبى، ءازىل-سىقاق تەاترلارى قالعان جوق. ويتكەنى، ولاردا ازىلمەن جەتكىزەتىن استارلى سوزدەر جوق. تەاتردىڭ وزىنە ءتان شىرايلى دا وتكىر، يۋمورلىق تىلدەرى قالعان جوق. «ءتىلىمىز دامىپ» كەتتى دەپ جۇرگەن ءتىل كوميتەتى بار. بىراق سول ءتىل كوميتەتتەرى نەمەن اينالىسىپ ءجۇر سوندا؟ بۇرىنعى «انا ءتىلىمىزدىڭ تاعدىرى» دەپ زارلاپ وتكەن سابيتتەر مەن عابيتتەردىڭ، مۇحتاردىڭ سوزدەرىمەن ايتقاندا – ءبىزدىڭ تىلدەن ايرىلۋ دەگەنىمىز ۇلت بولۋدان ايرىلۋ دەگەن ءسوز. تىلدەن ايرىلۋ دەگەن – جاڭاعى تالانت پەن تانىمالدىلىقتىڭ ايىرماشىلىعىن بىلۋدەن، تانۋدان قالۋ بولىپ تابىلادى. ءبىز ونەردىڭ ءبارىن، ءتىپتى اقىندىقتى دا، رومان، پوۆەستەردى دە قازاق تىلىندە وقىپ تانىدىق ەمەس پە؟ ويتكەنى، تاربيەنىڭ ءبارى دە ادامعا تىلمەن كەلەدى. وسى ۇلتتىق قاسيەتتەرىمىزدى ءوزىمىز تۇگەندەپ الماساق، بارىنەن دە ايرىلعالى تۇرمىز.

اباي ايتقان ناداندىقتى بۇگىن كوردىم...

كەز كەلگەن ونەر يەسى ءوزىنىڭ جۇرگەن سالاسىن عىلىمي تۇرعىدا تالداي ءبىلۋى كەرەك. ونەردى تالداي بىلمەگەن ادام تالانت پەن تانىمالدىلىقتىڭ ارا-جىگىن قايدان بىلەدى؟ اباي اتامىز ايتاتىن ناداندىق دەگەن وسىندايدان كەلمەي مە؟ بۇرىن وسى ابايدى مەن مەكتەپتە وقىپ جۇرگەن كەزىندە «نادان قازاق» دەگەن سوزدەرى ءۇشىن رەنجيتىنمىن. ءبىزدى اباي اتامىز نەگە وسىنشاما تۇقىرتا بەرەدى ەكەن دەپ نامىستانىپ جۇرەتىنمىن. مىنە، سودان بەرى ابايدى مەن جاسىم قىرىقتان اسقان سوڭ عانا ءتۇسىندىم. ءبىز شىنىمەن-اق نادان حالىق ەكەنبىز. بۇگىنگى كۇندە ءار ماماندىقتىڭ يەسى ءوزىنىڭ ماماندىعىن عىلىمي تۇرعىدا زەرتتەي بىلمەيتىنىنە كوزىم جەتىپ وتىر. وسىنداي سوراقىلىقتان بارىپ ساپاسىز دۇنيەلەر شىعىپ ءجۇر ەمەس پە؟ ءتىپتى، ساحناداعى انشىلەردىڭ ءوزىنىڭ ايتقان ءانىنىڭ ماعىناسىنا تۇسىنبەيتىندەرىن كەزدەستىردىم. كەرەك بولسا ءاننىڭ ءماتىنىن دە قاتە ايتادى، دەمەك ءوزىنىڭ انا ءتىلىن بىلمەيدى دەگەن ءسوز. جۇرەكپەن ايتاتىن ءانشى ەمەس، تەحنيكامەن ايتاتىن انشىلەر ءجۇر قاپتاپ. بۇگىنگىنىڭ ءانى - قازاقتىڭ ءانى ەمەس، باتىستىڭ تانىمال بولعان اندەرىن ىڭىرسىپ قايتالاپ جۇرگەن انشىلەردەن تەك «قالايدا تانىمال بولسام بولدى» دەگەن پيعىلدارىن اڭعاراسىڭ. دارىنسىزدارعا قازاقتىڭ ونەرىنىڭ قاجەتى جوق. سوندىقتان وسىنداي نۇسقالارعا بارادى. بۇل اۋەندەردى ءبىزدىڭ ۇلتتىق قاسيەتىمىزدەن كەتىرەتىن جاعدايعا الىپ كەلەتىن اۋەندەر دەپ سانايمىن.

شىنىن ايتقاندا ءبىز تاۋەلسىزدىك العانمەن ءالى دە وزگەرە الماي كەلەمىز. باياعى سارىن سول سارىن... بۇگىنگى انشىلەردە «داۋسى مىناداي ەكەن» دەپ ايتاتىن داۋىس جوق. ويتكەنى ءبارىنىڭ اندەرى دە، داۋىستارى دا ءبىر سارىندا كەتىپ بارادى. ولاردى ەششكىم توقتاتا الار ەمەس. ال ءبىزدىڭ سىنشىلار ىرىم ءۇشىن ءبىر كەمشىلىك ايتادى دا، ارى قاراي ماقتاۋمەن شەكتەلەدى. سىنشىلاردىڭ مۇنىسىنىڭ استارىندا دا ءبىر سىر جاتىر دەپ ويلايمىن. ال تۇپتەپ كەلگەندە وسى ولقىلىقتاردىڭ ءبارى دە ۇلتتىق يدەولوگيانىڭ جوقتىعىنىڭ زاردابى دەپ بىلەمىن. سەبەبى، وتكەن عاسىردىڭ كەڭەس ۇكىمەتى ساياساتى ءبىزدىڭ ۇلتتىق يدەولوگيامىزعا وراسان زور زيانىن تيگىزدى. سوندىقتان سىزدەردىڭ تاقىرىپتارىڭىز ءالى دە زەرتتەۋدى قاجەت ەتەتىن وتە قيىن تاقىرىپ...

تانىلعاننىڭ ءبارى تالانت ەمەس

امانعازى كارىپجانۇلى، جەلتوقسانشى، اقىن-جۋرناليست:

• تالانتتىلىقتى – تابيعاتتىڭ، اللانىڭ بەرگەن سىيى دەپ تانيمىز. قابىلەتتى ادامدار تالانتتى بولىپ كەلەدى. قازاق - كەڭ جازيرالى، ساحارادان شىققان حالىق بولعاندىقتان بىزدە دارىندى، تالانتتى ادامدار قوعامنىڭ كەز كەلگەن سالاسىندا كەزدەسەدى دەپ ايتا الامىن. تالانت ءوزى جان-جاقتى بولىپ كەلەدى. سونىڭ ىشىندە ءبىر سالاعا بەيىمدەلىپ، سول كەمەنىڭ باسىنان ۇستاپ قالعانى دۇرىس. ادام ءوزىنىڭ ىشىندەگى ينتەللەكتۋالىن اشا الماسا، ونى حالىققا كورسەتە الماسا، وندا ونىڭ تالانتى دا اشىلمايدى. ومىردە ءوزىنىڭ بەلگىسىن دە قالدىرا الماستان، كوپتىڭ ءبىرى بولىپ كەتە بارادى. تاياۋدا بولىپ وتكەن ايتىستىڭ تاقىرىبىندا قازىرگىنىڭ حالىق ارتىستەرىن بۇرىنعى اقان سەرى، ءبىرجاندار سەكىلدى سەرىلەر دەۋگە لايىق دەي وتىرىپ، ولاردىڭ ءبارى ۇلتقا كەلگەندە قانداي دەگەن ساۋال قويىلدى. الايدا، بۇگىنگىنىڭ «سەرىلەرى» بولمىش حالىق ارتىستەرىنىڭ ىشىندە - 1986 جىلعى كوتەرىلىستە جاستارعا قارسى قول قويعان جانە ءبىزدىڭ ءتىل دوكتريناسىنا اكتسيا ۇيىمداستىرساق، وعان دا قارسى شىققان حالىق ارتىستەرى، اقىن-جازۋشىلارى بولدى. ءوز حالقىنىڭ بولاشاعىنا، جاس ۇرپاقتارىنا قارسى شىعىپ جۇرگەندەر قالاي سەرى بولادى؟ بۇرىنعىنىڭ سەرىلەرى بيلىكتىڭ ادىلەتسىزدىگىنە قارسى شىعىپ، ولگەنىنشە ارپالىسىپ وتكەندەر. مىنە، بۇل كىسىلەر تۋمىسىنان، جاراتىلىسىنان تالانتتى، ارقالى سەرىلەر بولدى. ادامنىڭ ءىس-ارەكەتى دە تابيعاتىنا ساي بولعانى دۇرىس. «اڭقاۋ ەلگە ارامزا مولدا» دەگەندەي، جاستاردىڭ باسىن اينالدىرىپ، وزدەرىن ناسيحاتتاتىپ وتىرعانداردى تالانتتى دەۋگە كەلە مە؟ ولار تەك قازاققا تانىمال ادامدار. تانىمالدىلىق مۇلدەم بولەك. تانىمال بولۋدى ارمانداعاندار ماقساتىنا جەتە الادى. ال دارىندى، تالانتتى ەشقاشان اراعا «كوكەڭدى» سالىپ، باسقا دا جاقىندارىڭدى سالىپ ءجۇرىپ الا المايسىڭ! ونى ءتاڭىر بەرەدى. ارامىزدا تانىلماعان تالانتتار وتە كوپ. بۇگىنگى جۇلدىز بولعان اكتەر، اقىن، انشىلەر بولسىن – مىنە، بۇلاردىڭ ءبارىن دە «جۇلدىز»، «تالانت» دەپ حالىققا تانىستىرىپ جۇرگەن تەلەارنا مەن باسپاسوزدەگى جۋرناليستەردىڭ كىناسى. «جۇلدىز» بولۋ كوپ ۋاقىتتى، ەڭبەكتى ءارى دارىندىلىقتى تالاپ ەتەتىن وتە نازىك تە كۇردەلى ۇعىم، ول تالانتتىنى شىعار شىڭى مەن شىرعالاڭى كوپ جولداردان وتكىزەدى. مۇنىڭ بارىنە ءتوزىم كەرەك. حالىققا تانىلعاننىڭ ءبارى تالانتتار ەمەس. تالانت پەن تانىمالدىلىقتىڭ اراسى، ماعىناسى جەر مەن كوكتەي!

دارىن مەن دارىنسىزدى اجىراتۋ ءۇشىن - دارىن كەرەك!

نۇرتىلەۋ يمانعاليۇلى، جۋرناليست، تانىمال تەلەجۇرگىزۋشى:

• مەنىڭ پايىمداۋىمشا دارىننىڭ ەكى ءتۇرى بار ما دەپ ويلايمىن. ءبىرىنشىسى، ادامنىڭ بويىنا اللادان كەلەتىن ەرەكشە ءبىر قۇبىلىس. ال ەكىنشىسى، كەيدە اقىل-ويدىڭ جەمىسى سەكىلدى مە دەيسىڭ. ءبىز مەكتەپتە جۇرگەنىمىزدە – دارىنسىز ادام بولمايدى دەپ ايتىلاتىن. مەن وسىعان سەنگىم كەلەدى. ادام بالاسىنىڭ قاي-قايسىسى دا دارىندى بولىپ كەلەدى. قازاقتا دارىندىلىقتى كلاسسيفيكاتسيالاعان عىلىم جوق بولار. مىناۋ دارىن، ال مىناۋ دارىن ەمەس دەگەن فورمۋلا جوق. ارقايسىسىمىزدىڭ پايىمىمىز، ورەمىز قاي جەرگە جەتەدى، سول جەردەن عانا قايتا سالامىز. ماعان ءوزىڭىز سەكىلدى ءبىر ارىپتەسىم سۇحبات الىپ وتىرعاندا: - «ءسىز وتىرىك ايتاسىز با؟» دەگەن ءبىر ساۋال قويدى. سوندا مەن وتىرىكتى كۇندە ايتامىن، دەپ جاۋاپ قاتقانىم بار. مەن ايتقان سايىن ەل سەنەدى. قىزىعى سول - ەل سەنگەن سايىن وتىرىك ايتا بەرگىم كەلەدى. ءبىر عاجابى - مەنىڭ اينالامداعىنىڭ ءبارى دە وتىرىك ايتادى. مۇنان دا باسقا كەرەمەتى – باسقانىڭ ايتقانىنىڭ وتىرىك ەكەنىن بىلە تۇرا ءبىز سوعان وتىرىك سەنەمىز. جالپى قوعام وسىنداي ءبىر سۇمدىققا كەلدىك. دەمەك بۇگىنگى قوعامدا «وسىلاي وتىرىك ايتۋعا دا» ءبىر سۇرانىس بار سياقتى. قاجەتتىلىك بولماعان جەردە ول العا باسپاس ەدى. مىنە، وسىنداي ءبىر كۇڭگىرتتىكتەن ءبىز سول دارىندىلىقتى باعالايتىن جاۋاپكەرشىلىكتەن ايرىلىپ بارا جاتىرمىز. ويتكەنى، ەشكىم ءوزىن دارىنسىزبىن دەپ تە ايتپايدى. بۇرىن وزىنەن دارىندى ادامدى كورگەندە ىشتەي مويىنداپ تۇراتىن قاسيەت بولعان ەدى. وكىنىشكە وراي قازىر ولاي ەمەس. سەنەن دە «دارىندى» ادام الدىڭدا تۇرعانىمەن، ەگەر قوماقتى قارجىڭ بولسا سەن ونان دا وتكەن «دارىندى» بولىپ شىعا كەلەسىڭ. وسىنداي ۇعىم ءبىزدىڭ قوعامدى ءبىر قاسىرەتكە اكەپ وتىر. دارىندى مەن دارىنسىزدى اجىراتا ءبىلۋ ءۇشىن دە دارىن كەرەك. ەستەرىڭىزدە بولسا، كوممۋنيزمگە كەلە جاتىرمىز دەگەن كەزدە كاپيتاليزمدى اتتاپ، فەوداليزمنەن سوتسياليزمگە ءوتىپ كەتتىك دەپ ماقتانىپ جۇردىك. سوندا كوممۋنيزمدى ناسيحاتتاۋشىلاردىڭ بىلاي دەگەنى بار ەدى:

– قوعامدىق فورماتسيادا باسپالداقتان اتتاپ كەتۋگە بولمايدى. فەوداليزمنەن بىردەن كاپيتاليزمدى اتتاپ سوتسياليزمگە وتكەن دۇرىس ەمەس دەگەن يدەياعا كۇمانمەن ەمەس، سەنىممەن قارايتىنبىز. سىزدەردىڭ قوزعاپ وتىرعان تاقىرىپتارىڭىز دا وسىنداي جاعدايعا كەپ سايادى. ءبىز ولاي دا بىلاي تارتقىلاعانمەن، اۋمالى-توكپەلى جول ايىرىعىندا تۇرعان كەزىمىزدە وسىنداي ءبىر پروتسەسستىڭ بولۋى دا ابدەن ىقتيمال. بالكىم ءبارىمىز دە ءوزىمىزدى تالانتتىمىز، دارىندىمىز دەپ ەسەپتەيتىن، شىن دارىن يەسىن مويىندامايتىن وسىنداي ءبىر كەزەڭنەن وتۋگە ءتيىستى شىعارمىز. بالكىم، تاۋەلسىزدىك العان جىلدارى ءوزىمىزدى باسقالارعا قانداي ەكەندىگىمىزدى دالەلدەۋ ءۇشىن دارىنسىزدىڭ ءوزىن دارىندى ەتىپ كورسەتكەن ءوزىمىزدىڭ دە كىنامىز بار شىعار. ال دارىندى مەن دارىنسىزدىڭ شاما-شارقىن ولشەپ بەرەتىن مەحانيزمدىك قۇرال جوق. مۇنىڭ ءبارى دە اركىمنىڭ ءوزىنىڭ ىشكى شارۋاسى بولار. مىسالى، مەن ءوزىمنىڭ ىشكى باس رەداكتورىما باعىنامىن. ول مەنى جوندەيدى، ماعان باعىت بەرەدى. مىنە، وسى سەكىلدى ۇعىم مەنىڭ الدىمدا تۇرعان ادامنىڭ مەنەن دارىندىراق ەكەندىگىن مويىندايتىن دارەجەگە جەتكەندە عانا مادەنيەتتىلىكتىڭ كورىنىسى شىعادى. بۇل دا مادەنيەتتىلىك نە جاۋاپكەرشىلىك بولۋى  مۇمكىن. مەن بىلمەيمىن انىعىن...؟ ءبىر بىلەتىنىم – ماسەلەن كەيدە قوعامدا ءبىر كوشەنىڭ اتىن وزگەرتۋ سياقتى ۇساق-تۇيەك ماسەلەلەردى ايتىپ، سونشاما نازار اۋدارىپ، داۋرىعىپ جاتادى. بىراق سونىڭ قازاققا، ۇلت بولاشاعىنا بەرەتىن قانشالىقتى پايداسى بار ەكەندىگىن ۇعىنا بەرمەيمىز. ال سىزدەردىڭ قوزعاپ وتىرعان اڭگىمەلەرىڭىز ۇلتتىڭ نەگىزىن، بولمىسىن جانە ۇلتىمىزدىڭ تالانتىنىڭ وزگە ۇلتتاردىڭ الدىنداعى دارەجەسىن انىقتايتىن تاقىرىپ ەكەندىگى انىق. ارينە، بۇل تاقىرىپ – ءبىزدىڭ ءوزىمىزدى ءوزىمىز تانۋعا، ياعني، قازاقتى قازاق تانىپ بىلۋگە، سول ارقىلى ادامدى تانۋعا اپارادى. سونداي-اق، ادامتانۋ عىلىمىن جەتىلدىرۋگە اكەلەدى. ال بۇعان باراتىن جول - ءبىز ابايتانۋ، مۇحتارتانۋ، وسىنداي قۇبىلىستاردى ايتا-ايتا كەتكەن - شىڭعىستانۋ، مۇقاعاليتانۋ دەگەن سياقتى ۇلكەن عىلىمدار پايدا بولۋى كەرەك دەپ سانايمىن. وسىنداي عىلىمدى مەڭگەرگەن قوعامنىڭ كۇن تارتىبىندە مۇنداي ماسەلەلەر بولمايدى. بۇل ماسەلەلەر ۋاقىت وتە كەلە ءوز باعىتتىن تاۋىپ كەتە الادى. بىراق، وسى ءبىر جاۋاپتى ماسەلەنى ءالسىن-ءالسىن ەلدىڭ ەسىنە سالىپ وتىرعان سىزدەردىڭ «تاماشا جۇلدىزدار» جۋرنالىنا ريزاشىلىعىمدى بىلدىرگىم كەلەدى.

كورەرمەن جۇلدىز بولىپ شىققاندى «تالانت» دەپ ەسەپتەيدى

دۋلىعا اقمولدا، اكتەر:

• تالانت پەن تانىمالدىلىق ءبىرى-بىرىنە قاراما-قايشى جانە ءبىرىنسىز-ءبىرى بولمايتىن ۇعىمدار. تالانتتى ادام تانىمال بولۋعا ءتيىستى. ال بىراق بىزدە قازىر تالانت ەمەس، تانىمالدىلىق ءۇردىس الىپ كەتتى دە، ال تالانت سونىڭ تاساسىندا قالىپ كەتتى. مەن مۇنىڭ ءبارىن دە كەيىنگى ۋاقىتتا قاپتاپ كەتكەن جەڭىل-جەلپى اقپاراتتىق اعىمداردىڭ سالدارىنان با دەيمىن. اسىرەسە، بۇل ءوزى ەسترادا جاعىندا قاتتى بەلەڭ الىپ تۇر. تالانت دەگەنىمىز – بۋفون ايتىپ كەتكەندەي توزىمدىلىك! مەن بۋفوننىڭ سوزىنە باسىندا تۇسىنبەۋشى ەدىم. نەگىزىندە، تالانت ادام بالاسى بويىندا ۇلكەن بە، كىشى مە ءار ءتۇرلى دارەجەدە بولۋى مۇمكىن. سونداي ءبىر قالىپتا كەز كەلگەن ادامدا تالانتتىڭ بولۋى مۇمكىن. ال توزىمدىلىك سول تالانتتى ۇستاپ تۇراتىن، بىلايشا ايتقاندا ونى قايرايتىن كۇش بولىپ تابىلادى. وزىندەگى بار تالانتتى ادام دامىتپاسا تۇنشىعىپ، جوق بولىپ كەتۋى مۇمكىن. ءوزىنىڭ تالانتىنا ءمان بەرمەي جۇرە بەرەتىن ادامدار كوپ. ال دارىنى، تالانتى بولماسا دا ءوزىن «تالانت» رەتىندە كورسەتۋگە ۇمتىلاتىندار دا جەتەرلىك. ال ولار تەك تانىمالدىلىقپەن شەكتەلىپ قالىپ قويادى. ءازىل-سىقاق تەاترلارىندا ارزان كۇلكى، بوس سوزدەر كورەرمەندەردى جالىقتىردى. ەشقانداي كۇلكىلى ەمەس، كوپتەگەن قويىلىمدار – ىرجاقاي كۇلكىگە ارنالعان. حالىقتىڭ، قوعامنىڭ ءورشىپ تۇرعان ماسەلەسىن وسى ءازلى-سىقاق تەاترلارى وتكىر سىنعا الۋشى ەدى. بۇل تەندەنتسيا  قازىر جوق.تانىمالدىلىق جولىنداعى اكتەر، ءانشى، اقىندار كوبىنەسە وزگەنىكىن ۇرلاۋ ارقىلى وزدەرىن قامشىلاپ جۇرەدى. ماسەلەن، باتىس پەن شىعىستىڭ ءانىن ۇرلايتىن ەسترادا انشىلەرى شە؟ وزگەنىڭ ونەرىن ۇرلاۋ ونەرپازعا جاراسپايدى. سونداي ءبىر ارەكەتتەرمەن بىزدەگى «جۇلدىز» بولىپ تانىلىپ العاندار - سول جۇلدىزدىعىنان ايرىلىپ قالماس ءۇشىن جان دالباساعا ءتۇسىپ، ءتۇرلى ارەكەتتەرگە بارىپ جاتادى. مىسالى، ءوزى تۋرالى ارزان پيارلار جاساۋدا ەسترادا سالاسىنداعىلار باسقا ونەر سالاسىنداعىلاردان گورى الدارىنا جان سالمايتىنى جاسىرىن ەمەس.

ال ەندى تالانتتى ۇشتاۋ دەگەن نە؟ دارىن، تالانت – ءوزىنىڭ جەپ جۇرگەن نانىنا ادال بولۋ. مىسالى، اكتەر ءوزىنىڭ ويناعان ءبىر ءرولىن، كەلەسى ويناعاندا ونان دا اسىرىپ جىبەرۋى كەرەك. بۇل ارى قاراي بيىكتەي بەرگەنى دۇرىس. بىراق سەن جولدا ءسۇرىنىپ كەتۋىڭ مۇمكىن، قۇلاپ ءتۇسۋىڭ دە كادىك. بۇل ەندى ءومىردىڭ زاڭى. وسى جولدا بۋفوننىڭ ايتقانىنداي ۇلكەن توزىمدىلىكتىڭ  كەرەك ەكەندىگىن ءبىلدىم. مۇنىڭ ءوزى بۇگىنگى اڭگىمەنىڭ مايەگى بولارى ءسوزسىز عوي دەيمىن. سوسىن تالانت پەن تانىمالدىلىق ادامنىڭ ورەسىنە، سانا-سەزىمىنە دە بايلانىستى. ونەر ادامدارىنىڭ تالانتىنىڭ دارەجەسىن دۇرىس دەڭگەيدە باعالاي المايتىن كورەرمەننىڭ دە كىناسى بار. ولار «جۇلدىز» بوپ شىققاندى – تالانت دەپ ەسەپتەيدى. ولاردىڭ ءبىر-بىرىنەن ايىرا المايتىن داۋىستارى مەن اندەرىنە، ستيلدەرىنە ءمان بەرۋدەن قالعان. كوبىنەسە، ونەرگە كەزدەيسوق كەلگەن جاندار كىشكەنە ماقتاۋدان ءوزىن جۇلدىز سەزىنىپ كەتەتىنى بار. ويتكەنى، ونى سول ماقتاۋدىڭ ءوزى «شىن دارىنمىن» دەگەن ويعا الىپ كەلەدى. مۇندايلار تەك بىرەۋدىڭ ارەكەتىمەن عانا ساحناعا شىعىپ تانىمال «جۇلدىز» بوپ شىعا كەلەدى. وسىندايلاردىڭ كەسىرىنەن قارابايىرلانىپ بىتكەن كورەرمەندەر ولاردى بولسا دا «دارىندى» دەپ قابىلدايدى. ويتكەنى، ولاردا دا - ساحناعا، تەلەارناعا «دارىندىنى» عانا شىعارادى دەگەن تۇسىنىك بار. ونان كەيىن وزىمىزدە وندايلارعا دۇرىس ەمەستىگىن بىلە تۇرا، وتىرىك باعا بەرۋدەن تانعان ەمەسپىز. وسىنى مويىندايتىن كەز جەتتى. ەگەردە، كورەرمەننىڭ، تىڭدارماننىڭ، وقىرماننىڭ تالعامى بيىك بولاتىن بولسا، اراعا قانشا «كوكەسىن» سالىپ تانىلعىسى كەلگەندەر بولعانمەن، ول ءبارىبىر تانىلا الماس ەدى. مۇنىڭ بارىندە كورەرمەننىڭ، وقىرمانداردىڭ جانە كەز كەلگەندى «تالانت»، «دارىن» دەپ تانىستىرىپ جۇرەتىن اقپارات اعىمدارىنىڭ تالعامىنىڭ تومەندىگى كىنالى بولىپ وتىر. ەكىنشىدەن، شىعارماشىلىق يەسىنىڭ ءوزىنىڭ تالعامىنىڭ تومەندىگىندە بولىپ سانالادى. شىعارمامەن بىرگە ونىڭ كورەرمەنى، وقىرمانى بىرگە ءوسىپ وتىرۋعا ءتيىستى. جالپى، ونەر حالىققا قىزمەت ەتەدى. حالىق ونەرگە قىزمەت ەتەتىن وسى ەكى دۇنيە ەشقاشان اجىراماس قۇبىلىستار. سوندىقتان ەكى جاقتىڭ دا يادروسى بيىك جانە ءبىر-بىرىنە جاۋاپتى بولۋى شارت دەپ بىلەمىن. قازىر كورەرمەندەردىڭ تالعامى جوعارىلاپ كەلەدى. كورەرمەندەردى ءالسىز كۇلكىمەن، نەمەسە، ماعىناسىز اندەرمەن الداي سالۋ قالىپ بارادى. كەيدە مەن كىسىلەرگە رەنجيمىن. «مىناۋ ءاننىڭ نەسىنە تىڭداپ وتىرسىز؟ اۋەنى تارتىمسىز، سوزىنەن نە ۇعىپ وتىرسىڭ؟» دەسەم، «قايتەمىز ەندى، ءوزىمىزدىڭ وتاندىق ەسترادا بولعان سوڭ تىڭداپ وتىرمىن» دەگەن جاۋاپتى ايتادى. كورەرمەنگە مۇندايدا العىس ايتۋ كەرەك. سەبەبى، ول نەدە بولسا قازاقتىڭ ونەرىنە جانى اشىعان سوڭ ايتىپ وتىرعانى. دەگەنمەن دە، بۇل سالادا ونەرىن قۇپتاۋعا تۇرارلىق ونەرپازدار جوق ەمەس. بىراق ولاردىڭ ءبىر شورقاقتىعى – ءوزىنىڭ الدىندا بىرەۋدىڭ ايتىپ كەتكەنىنە ەلىكتەۋ، سونى قايتالاۋ ورىن الىپ جاتادى. وزدەرىنشە ءبىر سارا جول ىزدەۋ دەگەن جوق.

وسى جەردە ايتا كەتەرلىك ءبىر سۇمدىق، تاياۋدا قازاق راديوسىنىڭ «التىن قورىنا» جاڭادان اندەر ەنگىزبەكشى بولعاندا، ول جەردەگىلەردىڭ ايتۋىنشا، تاتىپ الارلىق بىردە-ءبىر ءان بولماپتى. سونداعى، وسى بۇيرىقتى ەستىسىمەن-اق، جان-جاقتاعى تانىس جاعالاعان قوڭىراۋلاردا ەسەپ بولعان جوق دەيدى. وسىدان سوڭ، قانداي دارىندى، قانداي تالانتتى ىزدەيسىز؟!

ارتىمىزدا ۇلت بولاشاعى تۇر!...

دۇيسەنحان سىزدىقوۆ،  وڭدەۋشى، كومپوزيتور:

• ونەردىڭ جولى - اۋىر جول. مۇنىڭ ارتىندا قانشاما جاۋاپكەرشىلىكتەر جاتقانىن قازىرگى ۋاقىتتا بىرەۋ بىلسە، بىرەۋلەر بىلە بەرمەس. سوڭعى 15-16 جىلداردىڭ ىشىندە ساحنادا، تەلەارنادا اندەرىمەن، كليپتەرىمەن جۇرگەندەردىڭ ءبارى دە دايىندىقسىز، ءبىلىمسىز كەلگەندەر. نەگە؟ ولار ءتىپتى، ايتقان ولەڭىنىڭ ماعىناسىنا دا تۇسىنە بەرمەيدى. فونوگرامما جازۋ بارىسىندا قاعازعا قاراپ ايتادى دا، سونىمەن بىتىرەدى ءان ايتۋدى. دايىن ديسكىلەرىن راديوعا، تەلەارناعا تانىستارىن سالا ءجۇرىپ، اقشاسىن تولەپ ايتەۋىر شىعارىپ الادى. مۇنىڭ ءبارى قازىرگى قوعامدا اشىقشا تۇردە بولىپ جاتقان دۇنيەلەر. ويتكەنى، تەلەارنا اقشاعا مۇقتاج بولىپ تۇرعاندا مۇندايلاردان باس تارتا قويمايدى. مۇنىڭ ءبارى دە تانىمال بولۋعا اسىعىستىقتان شىققان اڭگىمەلەر. سوندىقتان جاس انشىلەرگە ايتارىم – اسىققان شايتاننىڭ ءىسى. ونەرىڭ بار ەكەن، اۋەلى مۋزىكالىق ءبىلىم ال، ۇلكەن دايىندىقتاردان ءوتىپ، سونان سوڭ ساحناعا ۇمتىلعاندارىڭ ابزال دەر ەدىم. بۇل بارلىق سالادا سولاي ەمەس پە؟ ماسەلەن، قازاقتىڭ سپورتى الەمدى مويىنداتىپ ءجۇر. ال نەگە قازاقتىڭ انشىلەرى الەمدى مويىنداتپاسقا؟! ولار وزدەرىن وسى الماتى قالاسىن، اينالاسىنداعى بولىمشەلەرىن، باسقا دا وبلىستاردى مويىنداتقاندى عانا قاناعات ەتۋمەن شەكتەلەدى. ولاردىڭ كونتسەرتكە قاتىسقانى دا قىزىق. اراعا اعا-كوكەلەرىن جىبەرىپ، كونتسەرت ۇيىمداستىرۋشىلاردىڭ ميىن جەپ ءجۇرىپ قاتىسادى. ەلىمىزدەن باسقا ءوزىنىڭ انشىلىگىمەن، تالانتىمەن ءتانتى ەتىپ جۇرگەن روزا رىمباەۆامەن بىرگە، كەشە جۇرگەن بىرەۋ ءپليۋسىن جازدىرىپ الادى دا، ساحناعا شىعا سالادى. مۇنىڭ ءبارى ساحنانى، كورەرمەندى قۇرمەتتەمەۋ دەگەن ءسوز. سوندىقتان مەن ۇيىمداستىرۋشىلاردى، جۋرناليستەردى دە كىنالاي المايمىن، ادام وزىنە جاۋاپتى بولۋى كەرەك. سولارعا قاراپ مەن كەيدە ءبىزدىڭ قازاقتىڭ ەستراداسى وسىنداي كوزبوياۋشىلىقپەن تانىلعانداردىڭ ارقاسىندا جۇتىلىپ كەتە مە دەپ ويلايمىن. سوندىقتان، قازاقتىڭ ونەرىندەگى اسىرەسە، ەسترادا جانرى وزگە ۇلتتاردىڭ الدىندا دارەجەسى تومەندەمەسە ەكەن دەيمىن. ارتىمىزدا – ۇلت بولاشاعى تۇر. وزگە ۇلتتاردىڭ ءبىزدىڭ جەڭىل-جەلپى اندەرىمىزگە كۇلەتىن جاعداي ءالى الىس ەمەس. سەبەبى، ءبىز قازىر جەڭىل اندەرمەن كورەرمەننىڭ ەتەگىندە ءجۇرمىز. مۇنداي اۋەندەردەن سوڭ تىڭداۋشىنىڭ وزىنە دە: «ە، ازاننان كەشكە دەيىن وسى ءان، وسى ءانشى، دەمەك، وسى ناعىز دارىن ەكەن-اۋ» دەگەن وي كەلەرى انىق. حالىق ىشىندە مۇندايدا تەز پىكىر تۋادى. سوندىقتان سازگەرلەر شىعارعان مۋزىكاسىنىڭ باس-اياعى تۇگەل، گارمونياعا تولى اۋەندەردى شىعارىپ، تىڭدارماندى وسىنداي تىڭ اندەرگە ۇيرەتۋ كەرەك. جالپى، انشىلەردىڭ ەكى رەپەرتۋاردى تاڭداعانى دۇرىس. ءبىرى – نارىققا بايلانىستى نانتابار اندەر، ءبىرى ساحنالىق اندەر. مۇنى ايتقان سەبەبىم – تويعا بارىپ اندەردى كۇنكورىسكە اينالدىرىپ وتىرعان سوڭ، ول ۇستانىمى بولەك بولعان دۇرىس. بىردە، مەنىڭ ءبىر تانىسىم ايتقان بولاتىن. ءبىز كەشە تويىمىزعا شاقىرعان انشىلەر تويدى جاقسى وتكىزىپ كەتتى. ەندى سول انشىلەردىڭ كونتسەرتىنە بارساق، تۋرا سول تويدا ايتقان اندەرىن قايتالاپ تۇر. سوندا ءبىز بيلەتتەرىن سونشا باعاعا ساتىپ العاندا نە بولدى؟ فونوگراممالىق ءاندى تىڭداي بەرگەن قىزىقسىز ەكەن» دەپ نالىعانى بار. كورشى ەل رەسەيدە ەسترادا جاقسى دامىپ وتىر. باتىستىڭ، رەسەيدىڭ ەسترادا سالاسىندا ءبىر ساياساتى بولدى. ولار – اندەرى ارقىلى وزدەرىنىڭ ءتىلىن الەمگە ناسيحاتتاپ وتىردى. قازىر قايدا بارساڭ دا اعىلشىن جانە ورىس اندەرى ۇستەم بولىپ تۇر. سول اندەرى ارقىلى ولاردىڭ ءتىلىن دۇنيەجۇزى مويىنداپ وتىر.

بايگەگە سالىنعان ونەر اقشاعا ساتىلىپ كەلەدى

ايسۇلۋ قادىرباەۆا، اقىن، ساياساتكەر:

• ءبىرىنشى ورىندا تالانت، سوسىن تالعام، سوسىن بارىپ تانىمالدىلىق! تالانت قاي ۋاقىتتا دا تاس جارىپ شىعارى ءسوزسىز. بىراق، وسى كۇندەرى بايقايمىن، ونەردە دە، ساياساتتا دا سول سەكىلدى تالانتتاردىڭ كولەڭكەدە قالىپ، قالتاسى اقشاعا تولى ءوزىن-ءوزى قامشىلاعىشتار كۇننەن كۇنگە العا شىعىپ بارادى. ال حالىق، بۇگىنگى قوعام ولاردان مەزى بولىپ بارادى. بۇل جاعداي ساياساتتا دا كەزدەسەدى. ارامىزدان ەرتە كەتكەن ساياساتكەر باتىرحان دارىمبەتوۆتىڭ پوزيتسياسى كوپتەگەن ساياساتكەرلەرگە ۇلگى بولارلىق، تالانتتى كىسى دەپ ويلايمىن. ال كەيدە وسى ساياساتتىڭ وزىنەن پايدا تاپسام با دەپ جۇرگەندەر جوق ەمەس. ولار وزدەرىنىڭ ساياساتتان بىلىمدەرى وتە تايازدىعىنا قارامايدى. ساياسات ويىنعا اينالماۋى كەرەك. سوندىقتان ساياساتتىڭ ءوزى دە تالانتتىلىقتى تالاپ ەتەدى.

ال بىراق ونەردىڭ كەز كەلگەن سالاسىندا بۇل ءۇردىس باسقا جولعا ءتۇسىپ بارادى. ونەر سالاسى، ساياساتتا ساپاسىزدىققا جول بەرىلىپ كەلەدى. اسىرەسە، قازاق ەستراداسى تومەندەپ كەتتى. ءبىرىن-ءبىرى قايتالاۋ مەن قۋالاۋ ءورشىپ كەتتى. انشىلەر تىلگە، ءاننىڭ ماتىنىنە قارامايدى. وبرازعا كىرۋ دەگەن جوق ولاردا. بۇل جاعدايدا ءان ونەرىنىڭ ساپاسى دا، قادىرى دە قالمايدى. وسى ورايدا كەشە ءان ايتىپ شىققاندى «تالانتتى جاس ءانشى، نەمەسە دارىندى اقىن» دەپ تانىستىرىپ جاتاتىن تەلەجۇرگىزۋشىلەردىڭ دە كىناسى بار دەپ ويلايمىن. اقىندار اراسىندا دا ءمۇشايرالار بولار كەزدە تانىستارىنا زۆونداۋ، الدىن-الا ەسكەرتىپ قويۋ دەگەن توقتامايتىن ءبىر پروتسەسسكە اينالدى. مەن ويلايمىن، ونەر ەشقاشان ساتىلۋعا ءتيىستى ەمەس. سوندىقتان، جازبا اقىنداردىڭ ولەڭدەرىن بايگەگە ساپ، اقشا، كولىك تىگۋ ورىنسىز بولار. ويتكەنى، بايگەدەگى جۇلدە مەن ورىنداردىڭ ءبارى ساتىلىپ جاتىر. مۇندايدا اقشاسى جوق تالانتتىلار قالاي ورىن الىپ، قالاي حالىققا تانىلادى دەپ ويلايسىز؟ سوندا تالانتتىنى قايدان ىزدەيسىز؟!

تاقىرىپتى ودان ارى قاراي وقىرمانداردىڭ ءوزى تاعى ساراپتايتىن دارەجەگە جەتتى دەپ ويلايمىز. جوعارىداعى ەل ازاماتتارىنىڭ پىكىرىنە قاراعاندا، تالانت پەن تانىمالدىلىقتىڭ اراسى ءالى دە ءبىراز زەرتتەۋدى قاجەت ەتەتىن سياقتى.

پىكىرتالاستى جۇرگىزگەن شارا قۇربانوۆا

Abai.kz