الەۋمەتتىك جەلىدەگى جۇرت پەن قازاقتىلدى سايتتارداعى ارىپتەستەرىمىز جەلپىنىپ، «شەكارادا تونالعان جەسىر انانىڭ اقشاسى قايتارىلاتىن بولدى» دەپ جاتىر. اسىلىندە ولاي ەمەس. ءبىز ءماۋىتحان گۇلجاننىڭ ۇلى ادىلبەكپەن حابارلاسىپ، ءىستىڭ ءمان-جايىن سۇراپ بىلدىك.

-شىعىس قازاقستان وبلىسى، زايسان اۋدانىنىڭ سوتى (سۋديا ب.ن. مەرگەنباەۆ) مايقاپشاعاي كەدەن بەكەتىندە تاركىلەنگەن 49, 900 دوللاردىڭ تەك 9 900 دوللارىن عانا قايتارۋ تۋرالى شەشىم شىعاردى. قالعان قارجى قازىنادا قالاتىن بولدى، - دەدى ادىلبەك مۇقتاشۇلى.

ەستەرىڭىزگە سالا كەتەيىك، ءماۋىتحان گۇلجان اقپان ايىنىڭ 8-ءى كۇنى قىتايدان قازاقستانعا بالالارىمەن جانە ىنىسىمەن بىرگە كوشىپ كەلۋ ءۇشىن شقو زايسان اۋدانىنا قاراستى مايقاپشاعاي كەدەندىك بەكەتىنەن وتەدى.

كۇيەۋىنەن جاستاي جەسىر قالىپ، ەكى بالاسىن ءومىردىڭ نەبىر تاۋقىمەتىن تارتا ءجۇرىپ ەر جەتكىزگەن گۇلجان قىتايداعى وزىنە تيەسىلى ءۇيى مەن بار دۇنيە-مۇلكىن ساتىپ، ول اقشاعا استانا قالاسىنان باسپانالى بولۋدى كوزدەگەن ەكەن.

شەكارادان وتكەن ەكى كىشكەنتاي بالامەن قوسا ەسەپتەگەندە جەتى ادامنىڭ قالتاسىندا جالپى جيىنى 49,900 اقش دوللارى بولعان. ياعني، ءماۋىتحان گۇلجاننىڭ وزىندە - 19,700, بىرگە تۋعان ءىنىسى ءماۋىتحان مۇقياتتىڭ قالتاسىندا - 10,500, ۇلى مۇقتاشۇلى ادىلبەكتىڭ جانىندا - 9,900, جيەنى سايلان مەيرامبەكتىڭ قالتاسىندا - 9,900, جيەن كەلىنى گۇلجانات سولتىكەننىڭ قالتاسىندا 9,900 اقش دولارى بولعان.

گۇلجان ءماۋىتحاننىڭ ايتۋىنشا، ولاردى مايقاپشاعاي كەدەن بەكەتىندەگى شەكارا قىزمەتكەرلەرى باقىلاۋ تەرمينالىنان «قۇجاتتارىڭىز تولىق، ءبارى زاڭدى» دەپ وتكىزگەن. الايدا، بار ماسەلە وسى «ءبارى زاڭدىدان» كەيىن باستالعانعا ۇقسايدى.

«شەكارا تورىنان قازاقستانعا قاراي شىعارىپ سالاتىن اۆتوبۋسقا وتىرعان كەزىمىزدە ارتىمىزدان قۋىپ كەلىپ، قايتا تەكسەردى. مەنىڭشە، بۇلاي ىستەۋى زاڭعا قايشى. سوسىن، ءبارىمىزدى باقىلاۋ تەرمينالىنا قايتا ءتىزىپ الىپ كىرىپ، شەشىندىرىپ، قوينى-قونىشىمىزدى اقتاردى. ءتىپتى، جىلاعانىنا قاراماي، 3 جاستاعى جانە 8 جاستاعى ەكى بالانى دا شەشىندىرىپ، تۇلا بويىن ءتىنتىپ شىقتى. جوعارىدا اتالعان بەسەۋمىزدىڭ قالتامىزدان شىققان 49,900 اقش دوللارىن تۇگەلدەي سىپىرىپ الدى. بىزدە جولدا تاماق الىپ ىشەتىن، جولعا تولەيتىن، قوناق ۇيگە جاتاتىن كوك تيىن اقشامىز قالماي، ەكى ورتادا داعدارىپ قالدىق. اقىرى ءبىر تانىس كىسىلەردىڭ كومەگىمەن زايسان قالاسىنا كەلگەن كەزدە مەنىڭ جۇرەك اۋرۋىم ۇستاپ، ەسىمنەن تانىپ، جەدەل جاردەممەن ەمحانادان ءبىر-اق شىقتىم. ول جەردە دە تاعى ءبىر قىرسىق دايىن تۇر ەكەن. كوشى-قون زاڭى بويىنشا، قازاقستان ازاماتتىعىن العانشا، وسى ەلدىڭ ازاماتى رەتىندە قارالاتىن «ىقتيارحات» كۋالىگىم بولسا دا، ەمحاناداعىلار: «ءسىز شەتەل ازاماتى ەكەنسىز. ەمدەلۋىڭىز دە اقىلى بولادى» دەپ باسىمىزدى قاتىردى. شىرقىراپ جۇگىرگەن ۇلىم الماتىداعى تانىستارىنان اقشا الدىرىپ، ەمحاناعا جاتىپ، زورعا امان قالدىم»، – دەيدى ول (سىلتەمەنى قاراڭىز).

قانداستارىمىزدىڭ باسىنداعى بۇل حالگە دەر كەزىندە نۇر وتان پارتياسى مەن ءماجىلىس دەپۋتاتى باقىتگۇل حامەنوۆا دا نازار اۋدارعان بولاتىن (سىلتەمەنى قاراڭىز).

ادىلبەكتىڭ سوزىنەن ءبىلىپ وتىرمىز، الەۋمەتتىك جەلى مەن ءداستۇرلى باق-تىڭ بەتىنەن كورىنىس تاپقان ماسەلە ءالى بىرجاقتى شەشىلمەگەنگە ۇقسايدى.

-سۋديا بىزگە 15 كۇننىڭ ىشىندە قايتا شاعىمدانۋعا بولاتىنىمىزدى ايتىپ ءتۇسىندىردى. ءبىز كەدەننەن وتكەن كەزدە دەكلاراتسيانى دۇرىس تولتىرماعان ەكەنبىز، - دەيدى ادلىبەك مۇقتاشۇلى.

رەداكتسيادان: مۇقتاش اۋلەتىنىڭ جاي-كۇيى مەن زاڭ ورىندارىنىڭ شەشىمىن Abai.kz اقپاراتتىق پورتالى ادەتتەگىدەي باقىلاۋىندا ۇستايتىن بولادى.

Abai.kz