قازاقستان پرەزيدەنتى نۇرسۇلتان نازارباەۆ وتكەندە مير-24 ارناسىنا سۇحبات بەرءىپ، قوعامداعى ەڭ وزەكتى دەگەن بىرقاتار ماسەلەلەرگە بايلانىستى ويىن ورتاعا سالعان بولاتىن.

سۇقبات بارىسىندا قر پرەزيدەنتى يم سودىرلارىنىڭ ساپىنا قوسىلعانداردى قازاقستان ازاماتتىعىنان ايىرۋ كەرەكتىگىن، بۇنىڭ ءوزى ءماجبۇرلى شارا ەكەندىگىن ەسكەرتىپ:.

- قر زاڭدارى بويىنشا، ەگەر ءبىزدىڭ ەلدىڭ ادامى ەلدەن كەتىپ، قاندايدا ءبىر ەكستەرميستىك ۇيىمعا مۇشە بولىپ، سودان سوڭ قايتىپ ورالعان جاعدايدا، ول مىندەتتى تۇردە ازاماتتىقتان ايرىلادى. بۇل ءماجبۇرلى شارا»، - دەگەن-ءدى.

نازارباەۆتىڭ بۇل سوزىنە رەسەي پرەزيدەنتى ۆلاديمير پۋتين دە پىكىر ءبىلدىرىپ وتىر.

كرەمل قوجايىنى تىلىشىلەرمەن سۇقباتىندا قازاقستان پرەزيدەنتىنىڭ باستاماسىن قولداعانىمەن، رەسەي پاسپورتىن ەشكىمنەن تارتىپ المايتىنىن ايتقان.

«ءسىز نازارباەۆتىڭ يم-گە قاتىسى بار ازاماتتارعا بايلانىستى شەشىمى تۋرالى ايتتىڭىز. رف كونستيتۋتسياسىنا سايكەس، ءبىز ەشكىمدى ازاماتتىقتان شىعارا المايمىز. بىراق، ءبىز رەسەي پاسپورتىن بەرۋ بارىسىنداعى كەيبىر شەشىمدەردى الىپ تاستاي الامىز. ءبىز زاڭگەرلەرمەن اقىلداسا كەلىپ، الداعى ۋاقىتتا وسىنداي شەشىم قابىلداۋىمىز مۇمكىن»، - دەيدى ۆلاديمير پۋتين.

ءسويتىپ، رەسەي پرەزيدەنتى ءوزىنىڭ ارىپتەسى كوتەرگەن باستامانى تولىق قولداي المايتىنىن جەتكىزدى. يم سودىرلارىنىڭ ساپىنداعى رەسەي ازاماتتارىنىڭ تولقۇجاتى توسقالتالارىندا جۇرە بەرەدى. ويتكەنى ولار قانشا جەردەن سودىر-سويقان اتانسا دا، رەسەي ازاماتى بولىپ قالا بەرمەك. تەك الداعى ۋاقىتتا رەسەي ازاماتى اتانۋعا قۇلشىنىپ وتىرعاندار ءۇشىن ءتارتىپ كۇشەيتىلۋى مۇمكىن. ءپۋتيننىڭ پىكىرىنەن تۇيگەنىمىز وسى بولدى.

پۋتين نەگە سودىرلاردى ازاماتتىقتان ايىرمايدى؟

اشىق ينتەرنەت رەسۋرسىنداعى رەسەيلىك فقق (فسب) تاراتقان مالىمەتتەرگە سۇيەنسەك، 2015 جىلدىڭ سوڭىندا يم سودىرلارىنىڭ ساپىندا 2 مىڭنان استام رەسەي ازاماتى سوعىسىپ ءجۇر.  ال باس-اياعى شەت مەملەكەتتەردەن جيىلعان سودىرلاردىڭ سانى 30 مىڭعا جۋىقتايتىن كورىنەدى.

بيىل رەسەيلىك باق-قا سۇحبات بەرگەن ۆلاديمير پۋتين سيريادا 1000-نان استام رەسەيلىك سوعىسىپ جۇرگەنىن ايتقان.

2014 جانە 2016 جىلدارى شەشەنستان ازاماتتارى يم قاتارىنا كوپتەپ قوسىلدى. ءتىپتى يم ساپىنداعى ەڭ قاۋىپتى سودىرلار - شەشەن ازاماتتارى ەكەندىگى دە ايتىلعان.

نۇرزات توعجان

Abai.kz