قازاق شەكاراسىندا بار اقشاسىنان ايىرىلىپ قالعان انانىڭ باسىنداعى حال كۇردەلەنىپ بارادى.

شىعىس قازاقستان وبلىسى، زايسان اۋدانى ماڭىنداعى مايقاپشاعاي كەدەن بەكەتىندە جەسىر ايەلدىڭ 59 900 اقش دوللارىن تۇگەل سىپىراپ العان شەكاراشىلاردىڭ ءىسى قوعامدا قىزۋ تالقىلانۋدا.

قىتايداعى ءۇيىن ساتىپ، استاناعا كوشىپ كەلە جاتقان قانداستاردىڭ اقشاسى قايتارىلماق تۇگىلى، ءماۋىتحان گۇلجاننىڭ ۇلى ادىلبەك مۇقتاشۇلىنىڭ ۇستىنەن قىلمىستىق ءىس قوزعالىپ جاتىر ەكەن.

ءبىز "شەكارادا تونالعان" ءماۋىتحان گۇلجاننىڭ ۇلى ادىلبەك مۇقتاشۇلىنا حابارلاسىپ، ءمان-جايدى ءوز اۋزىنان ەستىدىك.

"شەكارادان وتكەندە شەشەمدە - 19,700, بىرگە تۋعان ءىنىسى ءماۋىتحان مۇقياتتىڭ قالتاسىندا - 10,500, مەندە - 9,900, شەشەمنىڭ جيەنى سايلان مەيرامبەكتىڭ قالتاسىندا - 9,900, جيەن كەلىنى گۇلجانات سولتىكەننىڭ قالتاسىندا 9,900 اقش دولارى بولعان. بىزگە شەكارادا وسىلاي الىپ وتىڭدەر دەدى. كەيىن زايسان اۋدانىنداعى ەكونوميكالىق سوتتىڭ تەرگەۋ قىزمەتكەرلەرى قورقىتىپ، ۇركىتىپ، "بارلىق اقشا ءبىر ادامدىكى دەيسىڭدەر" دەدى. ەگەر ءبىز بۇل اقشانىڭ بارلىعى ءبىر ادامدىكى دەمەسەك، 3-5 جىلعا دەيىن سوتتالىپ كەتەتىنىمىزدى قاتاڭ ەسكەرتتى. سوت كەزىندە ءبىز سوتتان ادىلدىك كۇتتىك. بار شىنىمىزدى ايتتىق. بۇل ءبىزدىڭ قىتايداعى ءۇيىمىزدى ساتىپ، الىپ كەلە جاتقان اقشامىز ەكەنىن ايتتىق. سوندا دا سۋديا ءبىزدىڭ شەكارادا ايتقاندارىمىز بەن سوتتا ايتقاندارىمىز سايكەسپەيدى دەپ، تەرىس شەشىم شىعاردى. شەشەمە 68 مىڭ تەڭگە ايىپپۇل سالىپ، مەنىڭ 9900 دوللارىمدى عانا قايتارىپ بەردى. سول سوتتا ماعان جانە ناعاشىما قاۋلى شىعارىپ، سوتتا جالعان ايتتى دەگەن ايىپ تاعىپ وتىر", - دەيدى ادىلبەك مۇقتاشۇلى.

ءتىپتى، ءماۋىتحان گۇلجاننىڭ تۋعان ءىنىسى ءماۋىتحان مۇقياتتى ەلدەن دەپورتاتسيالاۋى مۇمكىن كورىنەدى. ەستۋىمىزشە، ءماۋىتحان مۇقياتتىڭ بالا-شاعاسى قازاقستاندا قالىپ، وتباسى ەكىگە ايرىلماق.

قانداستارىمىزدىڭ باسىنداعى بۇل حالگە دەر كەزىندە نۇر وتان پارتياسى مەن ءماجىلىس دەپۋتاتى باقىتگۇل حامەنوۆا دا نازار اۋدارعان بولاتىن (سىلتەمەنى قاراڭىز). 

Abai.kz