11 ساۋىردە «ماعان دەسەڭ پۋتينگە بار» دەگەن تاقىرىپپەن ماقالا جارىق كورگەن ەدى. ماقالادا الماتى وبلىسى، ەڭبەكشىقازاق اۋدانى، بالتاباي اۋىلدىق وكرۋگىنە قاراستى بىرلىك اۋىلىنىڭ اباي كوشەسىنە توسەلۋى ءتيىس ءاسفالتتىڭ كوشەنىڭ 700 متەرىنە جەتپەي قالعانى جانە بالتاباي اۋىلدىق وكرۋگىنىڭ اكىمى باقىتگۇل دۇيسەبەكوۆا مەن بىرلىك اۋىلىنىڭ تۇرعىنى ناتاليا بوياركينانىڭ اراسىنداعى جول ماسەلەسى بويىنشا اڭگىمەسى ءسوز بولعان ەدى.

كوتەرىلگەن ماسەلە بويىنشا وبلىس اكىمىنىڭ ءباسپاسوز قىزمەتىنە حابارلاستىق. ءباسپاسوز قىزمەتى ەڭبەكشىقازاق اۋدانى اكىمى اپپاراتىنىڭ بالتاباي اۋىلىنداعى جاعدايعا قاتىستى تۇسىنىكتەمەسىن جولدادى.

ءبىز حات ىزىمەن ناتاليا بوياركيناعا (سۋرەتتە) حابارلاستىق.

- اسفتال ءالى توسەلگەن جوق. جول سول قالپى جاتىر. اۋىل اكىمى مەن ەكى رەت ىزدەپ كەلىپتى، ۇيدە بولماپ ەدىم. اپكەممەن سويلەسىپتى. اپكەم ولارعا جولدى جوندەپ، اسفالت توسەپ بەرسەڭدەر، اۋىلدىق اكىمشىلىككە، اكىمگە ەشقانداي  تالاپ-ارىزىمىز جوق دەپ جازىپ بەرەمىز، ويتپەگەن جاعدايدا كەلىسىمگە كەلە المايمىز دەپتى. ءسىز ايتىپ وتىرعان حاتتاعىداي «جاعداي وڭ شەشىلدى، وكرۋگ اكىمىنە شاعىمى جوق» دەگەن جالعان. اكىم جۇمىستان شىقسا، سالىنباعان جولدىڭ جاۋاپكەرشىلىگى كىمنىڭ مويىندا قالادى؟ سوندا جۇمىستان كەتۋ ونى بارلىق جاۋاپكەرشىلىكتەن بوساتا ما؟ اكىمنىڭ ەسەبىندە سالىنعان، ال شىن مانىندە اسفالتتالماعان 700 مەتر جولدىڭ ماسەلەسىن كىم شەشەدى ەندى (سۋرەتتى قاراڭىز)?

اكىم ءوز ەركىمەن جۇمىستان كەتكەنمەن، جوعارىعا بەرىلگەن ەسەپتە تولىق جوندەلدى دەپ جالعان ايتىلعان اباي كوشەسىنىڭ 700 مەترىن كىم جوندەيدى؟ وعان بولىنگەن قارجىسىنىڭ ەسەبىن كىم كىمنەن سۇرايدى (سۋرەتتى قاراڭىز)?

باقىتگۇل دۇيسەبەكوۆا بوياركيناعا قاراتا «ماعان دەسەڭ پۋتينگە بار» دەپ ايتقان مەملەكەتتىك قىزمەتتىڭ ەتيكاسىنا جاتپايتىن ءسوزى ءۇشىن قىزمەتتەن كەتكەن بولسا، نەگىزگى ماسەلە – جولدىڭ تاعدىرى نە بولماق سوندا؟ الدە وبلىس، اۋدان شەندىلەرى اۋىل اكىمى جۇمىستان ءوز ەركىمەن كەتتى، ماسەلە شەشىلدى دەپ ويلاي ما؟

بىرلىك اۋىلىنداعى 700 مەتر جولعا جەتپەي قالعان قازىنا اقشاسى قۇزىرلى ورىنداردىڭ نازارىنا ىلىگىپ، اۋىل تۇرعىندارىنىڭ جول جاعدايى شەشىمىن تابار دەپ سەنەمىز!

ءۇمىتتىمىز!

نۇرا ماتاي

Abai.kz