(قر سىرتقى ىستەر مينيسترلىگىنىڭ ۇرىمجىدەگى كونسۋلدىق قىزمەتىنىڭ جەتەكشىسى مارعۋلان كۇزەمباەۆ تۋرالى ءبىر اۋىز ءسوز)

 ەلباسىمىزدىڭ شەتتەگى قازاقتارعا جاساعان تاعى ءبىر ەڭ زور قامقورلىعى – قازاقستان رەسپۋبليكاسىنا كەلۋ ۆيزاسىن بەرۋ تارتىبىندەگى جەڭىلدىگى!

سول ۆيزا كەزەگىنىڭ ازابىن ءبىر كىسىدەي تارتقان قازاقتار بولسا، ول – قىتايدا تۇراتىن قانداستارىمىز. ەل تاۋەلسىزدىگىن جاڭادان العان جىلدارى كەلۋشىلەردىڭ قاتارى بۇگىنگىدەن كوپ بولماسا، از ەمەس ەدى. بىراق، ەشكىمنىڭ ۆيزا كەزەگىن كۇتىپ قالدىم دەپ بايبالام سالعانىن ەستىمەپپىز.

1998 جىلى قىركۇيەك ايىندا بارىپ، مەن ۆيزاعا قۇجات تاپسىرعاندا ۇرىمجىدەگى كونسۋلدىقتىڭ  جەتەكشىسى باعدات سەيتباتتالوۆ دەگەن جىگىت بولاتىن. «كەلىننىڭ بەتىن كىم اشسا، سول ىستىق!» دەمەكشى، قولتاڭباسىن قويىپ، تۇڭعىش ۆيزا بەرگەن، اتاجۇرتقا الىپ ۇشقان جۇرەككە ودان ارمەن قۋانىش سىيلاعان سول جايساڭ اعانى مەن ءالى كۇنگە دەيىن ۋاق-ۋاق ەسىمە الىپ جۇرەمىن.

ال، ۆيزا الۋدىڭ ەڭ ءبىر توقىراۋعا ۇشىراپ، بىلىققان كەزى – 2011 جىل. كوپ-كورىم ءبىر جىلعا كوپ مارتەلى تارتىپپەن بەرىلىپ كەلە جاتقان ۆيزانى ءۇش ايعا ءۇش مارتەلى ەتىپ شولتيتقان سول كەزدەگى سىرتقى ىستەر ءمينيسترى قانات ساۋداباەۆ دەگەن مىرزا! بۇل سالاعا ەرلان ىدىرىسوۆ مينيستر بولىپ كەلگەن سوڭ بارىپ قىتايداعى قازاقتاردىڭ كوزى قايتا اشىلدى.

ۇرىمجىدەگى كونسۋلدىقتا سول ەرلان ءابىلفايىزۇلى كەزىندە باسشىلىق قىزمەت اتقارىپ، ق.ساۋداباەۆتان قالعان بىلىقتى رەتكە كەلتىرىپ، كوشتىڭ كورىگىن قىزدىرعان ەكى جىگىتكە – قايىرجان سارسەباەۆ پەن ەرلان يبيراگيموۆكە قانشا مارتە العىس ايتساق، كوپتىك ەتپەيدى. وندا قازىر جەتەكشىلىك ەتىپ وتىرعان باۋىرىمىزدىڭ اتى-ءجونى كۇزەمباەۆ مارعۇلان فايزۋللاۇلى ەكەن. بۇل كىسى تۋرالى ءسال كەيىنىرەك...

كۇزەمباەۆ مارعۇلان فايزۋللاۇلى

اتاجۇرتقا اتتىڭ باسىن بۇرعىسى كەلەتىن قانداستارىمىزدىڭ كوپتىگىنىڭ سىرتىندا، تمد-نىڭ ەڭ دامىعان مەملەكەتتەرىنىڭ قاتارىنداعى ۇلى دالا ەلىنە ىسكەرلىك، ساياحات، ساۋدا-ساتتىق سىندى تولىپ جاتقان سەبەپپەن وزگە ۇلت وكىلدەرىنىڭ دە اعىلىپ جاتقانىن، ولارعا ۆيزا راسىمدەيتىن كونسۋلدىق قىزمەتكەرلەرىنىڭ سانىنىڭ تىم شەكتى ەكەنىن ەسكەرسەك، ارينە، ۆيزا كەزەگىنىڭ ۇزاققا سوزىلىڭقىراۋى قالىپتى قۇبىلىس. قالاي دەگەنمەن دە سول قيىنشىلىقتان قۇتىلۋدىڭ جولىن ءبىز دە ىزدەسكەن بولدىق. ۇلتىنىڭ قامىن ويلاعان، مەملەكەتىنىڭ مۇددەسىن ءبىرىنشى ورىنعا قويعان ازاماتتار ءۇشىن مۇنداي قىسىلتاياڭ جاعدايدا ءبىر قويدان ەكى توستىك الۋ ونشا قيىنعا تۇسپەيدى ەكەن. 2015 جىلى قر پارلامەنتىندە «حالىقتىڭ كوشى-قونى تۋرالى» زاڭ جوبسى تالقىلانعان كەزدە، «قازاقستانعا ءبىلىم الۋ ماقساتىندا كەلەتىن جاستار ءۇشىن كونسۋلدىقتار كەزەكسىز ۆيزا بەرسە!» دەگەن ءبىر اۋىز ءوتىنىشىمىزدى سول كەزدەگى سىرتقى ىستەر ءمينيسترى ەرلان ىدىرىسوۆ جەرگە تاستاماي، قىتايدان كەلەتىن قانداستارىمىزعا ءبىر جولدا ءۇش جىلعا كوپ مارتەلى ۆيزا بەرۋ ءتارتىبىن ەنگىزدى دە تاستادى. بۇل ءتارتىپ 2017 جىلدىڭ 1 قاڭتارىنان بەرى اتقارىلىپ جاتىر. ءبىزدىڭ بىلۋىمىزشە، تەك ەكىشى مارتە ۆيزا راسىمدەگەن كەزدەن باستاپ ءۇش جىلعا كوپ مارتە ۆيزا بەرىلەدى. مۇنى – ءبىر دەڭىز!

ال، 2015 جىلى 24 قاراشادا ۇلت كوشباسشىسى نۇرسۇلتان نازارباەۆ قول قويىپ، 2016 جىلدىڭ 1 قاڭتارىنان باستاپ قولدانىسقان ەنگەن «حالىقتىڭ كوشى-قونى تۋرالى» زاڭنىڭ 7-بابىنا «قازاقستان رەسپۋبليكاسىندا تۇراقتى تۇرۋ ۆيزاسىمەن ۋاقىتشا بولاتىن نە قازاقستان رەسپۋبليكاسىمەن كىرۋدىڭ جانە بولۋدىڭ ۆيزاسىز ءتارتىبى تۋرالى كەلىسىم جاساسقان مەملەكەتتەردەن كەلگەن شەتەلدىكتەر مەن ازاماتتىعى جوق ادامدار، سونداي-اق وزدەرىنە بەرىلگەن ۆيزانىڭ ساناتىنا قاراماستان، ەتنيكالىق قازاقتار تۇراقتى تۇرۋعا رۇقسات الۋ ءۇشىن ىشكى ىستەر ورگاندارىنا ءوتىنىش بەرەدى» دەگەن جاڭا تولىقتىرۋ قوسىلدى.

دەمەك، شەتتەگى قانداستارىمىز تۋريستىك (ساياحات) ۆيزاسىمەن كەلسە دە، تۇراقتى تىركەۋگە تۇرىپ، ىقتيارحات الا الادى. ساياحات ۆيزاسىنىڭ مەرزىمى ءۇش اي. استانا مەن الماتىدان باستاپ، بارلىق وبلىس ورتالىقتارىندا ورنالاسقان تۋريستىك (ساياحات) فيرمالارىمەن كەلىسىپ، شاقىرتۋ الدىرىپ، كەلە بەرۋلەرىڭىزگە ابدەن بولدى. بىراق، اقشاسىن، كەلگەن سوڭ تىركەۋگە تۇرۋعا «قولداۋحاتتى» تەگىن بەرەتىن ەتىپ كەلىسىپ العاندارىڭىز ءجون. دەمەك، قانداستارىمىز وسى مۇمكىندىكتى تولىق پايدالانسا، ۆيزا كەزەگى ەداۋىر جەڭىلدەر ەدى.

قر سىرتقى ىستەر مينيسترلىگىنىڭ ۇرىمجىدەگى كونسۋلدىق قىزمەتىن وسى كۇندەرى باسقارىپ وتىرعان مارعۇلان كۇزەمباەۆ مىرزا دا سول باعدات سەيتباتتالوۆ باستاعان،  قايىرجان سارسەباەۆ پەن ەرلان يبيراگيموۆ جالعاستىرعان سارا جولدى ودان ارى داڭعىراتا تۇسۋگە بارىن سالىپ جاتىپتى.

قۇدايعا شۇكىر، تەحنيكانىڭ قارىشتاپ دامىعان مىنا زامانىندا ءبىزدىڭ قازاق تا عالامتوردىڭ قۇلاعىندا وينايتىن حالگە جەتتى. مارعۇلان فايزۋللاۇلى تسيفرلى تەحنولوگيانىڭ وسى مۇمكىندىكتى پايدالانىپ، بۇرىنعى «kezek.ogd» سايتىنا جاڭا «WeCHat» الەۋمەتتىك جەلىسىن قوسىپ،  قول تەلەفون ارقىلى كەزەككە تۇرۋ ءتارتىبىن ەنگىزىپتى. ەندى تولقۇجاتىڭ قولىڭا ءتيىپ، قازاقستانىڭا كەلگىڭ كەلسە، اۆتوبۋستا وتىرىپ تا، قويدىڭ شەتىندە جانتايىپ جاتىپ تا ۆيزانىڭ كەزەگىنە تۇرا بەرەسىڭ. وشىرەتىڭ كەلگەندە ۇرىمجىگە شاۋىپ بارىپ، الاسىڭ دا قايتاسىڭ... قانداي راحات! ءسويتىپ، «ەرتەڭ ەگەر الماسام كەزەگىمدى، تەۋىپ-تەۋىپ شىعارام تەزەگىڭدى!» دەپ تەپسىنەتىن جۇرتتىڭ قاراسى وشە باستاپتى.

ەلباسىمىز نۇرسۇلتان ءابىشۇلى نازارباەۆتىڭ 2017 جىلى 31 قاڭتارداعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» تاقىرىبىنداعى قازاقستان حالقىنا جولداۋىنداعى «مەملەكەتتىك جۇمىستار مەيىلىنشە وڭايلاندىرىلۋعا ءتيىس. قۇجاتتاردىڭ مەرزىمى مەن تىزبەسىن قىسقارتىپ، قايتالاناتىن راسىمدەردى جويۋ كەرەك. بۇل ورايدا ادامنىڭ ءوزىنىڭ بارۋىن قاجەتسىنبەيتىن تولىق ەلەكتروندىق فورماتقا كوشىرۋ كەرەك» -دەگەن ۇلاعاتتى سوزدەرىنىڭ، ايتىپ-ايتپاي، شەتەلدەگى قانداستارىمىز ءۇشىن بىردەن يگىلىككە اينالعانى – جۇرەگىڭدى قۋانىشقا، كوڭىلىڭدى شاتتىققا تولتىرادى ەكەن. ۇلى دالا ۇلىنىڭ الىستاعى اعايىندارىنىڭ اتاجۇرتىنا ورالۋىنا وڭتايلى وراي جاراتا بىلگەن وسىناۋ ەڭبەگىنە راحمەتتەن باسقا نە ايتامىز! امان بولىڭىز، وركەنىڭىز ءوسسىن، مارعۇلان فايزۋللاۇلى!

قازاقستاننىڭ حالىقاراداعى بەدەلى مەن دوستىق قارىم-قاتىناستىڭ ساپاسى وسى ەلشىلەر مەن ەلشىلىك قىزمەتكەرلەرىنە بايلانىستى. ءاربىر ديپلومات ق.ساۋداباەۆتان وزگە ءبىز اتىن اتاپ وتىرعان ازاماتتارداي الىستا جۇرگەن اعايىننىڭ الاتاۋ مەن ارقاعا ات باسىن بۇرۋىنا سەپتىگىن ءتيزىزىپ جاتسا، بۇل – ناعىز وتانشىلدىق پەن ۇلتىن ءسۇيۋدىڭ بەلگىسى بولماق.

قىسقاسى، مارعۇلان كۇزەمباەۆ باۋىرىمىز تۋرالى ارعى بەتتەن كەلگەن اعايىندار بىزگە جىلى لەبىزدەرىن، القاۋ-ماقتاۋلارىن ايتىپ، جۇرەگىمىزدى جىلىتۋدا. سونىڭ ءبىر كۋاسى، ماناعى «WeCHat» الەۋمەتتىك جەلىسى ارقىلى عالامتوردا كەزىپ ءجۇرىپ، مەنىڭ قولىما تۇسكەن قادىلبەك ءمۇتاشۇلى دەگەن ازاماتتىڭ جۇرەك تەبىرەنىسىنەن تۋعان مىنا ءبىر ولەڭ بولسا كەرەك.

«كەزەك» سايتىنا العىس

«ۇلىتاۋ» تەكشەسىنىڭ ۇلارىمىن،

الاشىم، تۇنىق قاندى ۇلدارىڭمىن.

«كەزەك» سايتى، كەزەگىم قولعا ءتيدى،

كۇلەرمىن دە قۋانىشتان مەن جىلارمىن.

ءجۇر ەدىك كەزەك تيمەي عارىپتانىپ،

الا الماي كەزەك نومەر ارىپ-تالىپ.

دەلدالدار باقاي-قۋلىق باسقاننان سوڭ،

ورتا جولدا وكسىدىك تاعى قالىپ.

ال، مىنە، توقسان كۇنىم توسىن كەلدى،

بۇرايىن الاتاۋعا كوشىمدى ەندى.

جىگى-جاپار قىپ كەلىمدى قيناپ ەدى،

راحمەت، كەزەگىمىز شەشىلدى ەندى.

اتاجۇرتتى كورۋگە حالقىم قۇمار،

ەكى ەلدىڭ بۇل دوستىعى ماڭگى بولار.

قازاعىم، قانداستارىم، قارعا تامىر،

بەل شەشىپ بەرەكەگە ءبارىڭ ورال!

الدىڭ؟

راس پا؟؟

الا الدىڭ با؟؟؟

اتاجۇرتقا جيىرما جىلدا بارا الدىڭ با؟!

ۇلى وتنىم حالىقاراعا ۇندەۋ سالىپ،

ۇلى باقىت جاراتتى قازاعىما!!

راحمەت، جول بەرگەن جۇڭحۋامىزعا!

ال، كانە، ساپار تارتپاي جاتامىز با؟!

سايرانداپ، تۋىسشىلاپ ءجۇرۋ كەرەك،

قۇران وقىپ اتا مەن بابامىزعا!

ەكى ەلدىڭ دوستىق كۇشى مىعىمدالدى،

مۇنى ەلدىڭ ءجون بولادى ۇعىنعانى.

كوپ ەلدە ءدال وسىنداي قولايلىق جوق،

قويالىق ورىنسىزدان جۇلىنعاندى.

«كەزەك» سايتى، ساپالى كەزەكشىلەر،

«ۆيزالىق ورىندا» ەڭبەگى ەرەكسىزدەر!

كەشىرىڭدەر، كوڭىلگە اۋىر الماي،

بوقتاۋعا دا، داتتاۋعا كونىڭىزدەر!!

دۇعاي سالەم قاراپايىم حالقىمىزدان،

كوگىمىزدە تۇرسا ەكەن شالقىپ ىزگى ءان!!

راحمەت قازاقستان وتانىما،

نۇرسۇلتان ەلباسىما جالپىمىزدان!!!

اقىن،

«نۇر وتان» پارتياسى

رەسپۋبليكالىق قابىلداۋ

بولىمەسىنىڭ كەڭەسشىسى

اۋىت مۇقيبەك

23.05.2017

استانا

Abai.kz