نۇرسۇلتان نازارباەۆ قازاقستانعا رەسمي ساپارمەن كەلگەن گرۋزيا پرەزيدەنتى گەورگي مارگۆەلاشۆيليمەن كەزدەستى. بۇل تۋرالى  اقوردا ءباسپاسوزى حابارلادى.

پرەزيدەنت نازارباەۆ گرۋزيا پرەزيدەنتىنىڭ ساپارى ايتۋلى وقيعالارعا - ەلدەرىمىز اراسىنداعى ديپلوماتيالىق قاتىناستاردىڭ 25 جىلدىعىنا جانە "ەكسپو-2017" حالىقارالىق كورمەسىنىڭ اشىلۋىنا تۇسپا تۇس كەلىپ وتىرعانىن اتاپ ءوتتى.

ء"سىزدىڭ وسى ساپارىڭىزعا جانە گرۋزيانىڭ كورمەگە قاتىسقانىنا ءدان ريزامىز. ءبىزدىڭ قارىم-قاتىناستارىمىز اركەزدە دە جاقسى بولدى. ەلدەرىمىز تاۋەلسىزدىكتىڭ العاشقى جىلدارىندا ءبىر-بىرىنە جان-جاقتى كومەك كورسەتى. قازاقستان گرۋزيا ەكونوميكاسىنىڭ نەگىزگى ينۆەستورلارىنىڭ بىرىنە اينالدى. ەكىجاقتى قاتىناستاردى ودان ءارى جاقسارتۋعا ەشقانداي دا كەدەرگى جوق. بۇل تۇرعىدا ءسىزدىڭ ساپارىڭىزدىڭ ماڭىزى زور", - دەدى نۇرسۇلتان نازارباەۆ.

گرۋزيا پرەزيدەنتى ەلىمىزدىڭ دامۋ قارقىنىنا قىزىعۋشىلىق تانىتىپ، قازاقستانعا كەلۋگە كوپتەن ىقىلاستى بولعانىن ايتتى.

ء"سىزدىڭ جانە حالقىڭىزدىڭ قيىندىققا تولى وسى جىلداردا اۋقىمدى جۇمىس اتقارعاندارىڭىزدى قازىر ءوز كوزىممەن كورىپ وتىرمىن. گرۋزين حالقى ءسىزدىڭ ەلىڭىز بەن جەكە ءوزىڭىز تاراپىنان كورسەتىلىپ جاتقان قولداۋعا ريزاشىلىق بىلدىرەدى جانە ونى باعالاي بىلەدى. گرۋزيانىڭ "ەكسپو-2017" كورمەسىنە قاتىسۋى اسا ماڭىزدى دەپ سانايمىن. ءبىز وندا ءوز ەكونوميكامىزدىڭ جەتىستىكتەرىن كورسەتىپ، ءداستۇرلى تاتۋ كورشىلىك بايلانىستارىمىزدى جالعاستىرا الامىز، - دەدى مارگۆەلاشۆيلي.

سونداي-اق گرۋزيا پرەزيدەنتى ەكونوميكالار ىنتىماقتاستىعىنىڭ تۇجىرىمداماسىنا ءوز ەلىنىڭ بەلسەنە قاتىسىپ، حالىقتار اراسىنداعى ديالوگتى دامىتۋعا جاعداي جاساپ وتىرعانىن اتاپ ءوتتى.

ء"سىزدىڭ وسى باعىتتا وراسان زور جۇمىس اتقارىپ جۇرگەنىڭىزدى بىلەمىن. ءبىزدىڭ ەلدەرىمىز تاۋەلسىزدىككە قول جەتكىزگەن ساتتەن بەرى ءدال وسى باعىتتا دامىپ كەلەدى", - دەدى مارگۆەلاشۆيلي. سوڭىندا گرۋزيا پرەزيدەنتى نۇرسۇلتان نازارباەۆقا ۇزاق جىلداردان بەرگى قولداۋى ءۇشىن زور العىس ءبىلدىرىپ، استانادان العان اسەرلەرى جونىندە ايتتى.

Abai.kz