سەيسەنبى, 27 شىلدە 2021
«سوقىر» فەميدا 7182 54 پىكىر 14 ماۋسىم, 2017 ساعات 20:16

"مەنىڭ اتىم - قايرات-قوجا"

قازاق شوۋ-بيزنەسىنىڭ جارىق جۇلدىزى قايرات نۇرتاستىڭ «مۋزتۆ — 2017» جوباسىنا شاقىرتۋ الىپ، ورىس تىلشىلەرىنىڭ سۇراقتارىنا جاۋاپ بەرە الماي مۇدىرگەنىن كەيبىرەۋلەر ۇياتقا بالاپ جاتىر. قايراتتىڭ ورىس تىلىندە سۇرىنە سويلەگەنى مەنى قاتتى قۋانتتى. سەبەبى، بۇل ەلىمىزدەگى ورىس ءتىلىن بىلمەيتىن ءھام سول بىلمەگەنىن ۇيات سانايتىن ميلليونداعان جاستىڭ ەڭسەسىن كوتەرەتىن وقيعا بولدى. ەندى قايرات بىلمەگەن ءتىلدى، قازاقتىڭ بىلمەي-اق قويۋىنا قۇقىعى بار. 

ورىسشادان مۇدىرۋگە، مۇمكىندىك بولسا سۇرىنۋگە سەبەپ ىزدەيتىن كەز كەلدى.

قۇل - قوجايىننىڭ تىلىمەن سويلەيدى.

قازاقستاندا قوجايىن كىم؟ وسى سۇراققا قايرات ءوز الەتىنشە جاۋاپ بەردى. دەمەك، ەندى قايراتتى رەسمي تىلدە شۇلدىرلەيتىندەر مازالامايدى دەگەن ءسوز. مازالاعاننىڭ وزىندە قازاقشا ءتىلىن سىندىرىپ كەلۋگە ءماجبۇر بولادى.

بۇل - ۇيالاتىن ەمەس، قۋاناتىن نارسە. ەگەر دە وسىدان الپىس جىل بۇرىن ەرمەك سەركەباەۆ ورىس ءتىلىن بىلمەي جاتسا، ول ونىڭ كەمشىلىگى سانالاتىن. قازىر ورىس ءتىلى - مودادا ەمەس. ونىڭ تىلىنە، مادەنيەتىنە دەگەن تاۋەلدىلىگىمىز جوق. قايرات ەلىمىز تاۋەلسىزدىك العان جىلدارى ومىرگە كەلىپ، بوداندىقتىڭ نە ەكەنىن بىلمەي وسكەن ازامات. ونى تالاي جەردە دالەلدەپ ءجۇر.

وسىدان ءبىر-ەكى جىل بۇرىن ومبىعا بارىپ: "بۇل - قازاقتىڭ قالاسى" دەپ جار سالعانىن بۇكىل ەل بىلەدى. وسىنداي ۇلكەن جۇرەكتى بالامىزدىڭ ورىس ءتىلىن جەتىك بىلمەۋى زاڭدىلىق بولسا كەرەك.

تاۋەلسىزدىكتىڭ ءبىر جەمىسىن قايرات ءۇزىپ بەردى. ەندى وسىنداي جەمىستەر كوبەيە تۇسسە ەكەن.

قايرات - وسى ەلدىڭ قوجاسى. ونىڭ اتى - قايرات-قوجا!

بەكەڭ، بەردىبەك سوقپاقباەۆ پوۆەستىنىڭ اتىن "مەنىڭ اتىم قوجا" دەپ قويۋىنىڭ استارىندا "وسى ەلدىڭ قوجاسى مىنا سوتقار بالا" دەگەن وي جاتقانىن ايتادى زەرتتەۋشىلەر. سول قوجاڭىز - قايرات ەمەس پە؟

رەسمي ءتىلدى بىلمەي-اق، مىڭ جاسا، باۋىرىم!

ءشارىپحان قايسار

Abai.kz

54 پىكىر