جۇما, 29 ناۋرىز 2024
بىرلىك 4029 12 پىكىر 22 ماۋسىم, 2017 ساعات 03:22

اۋەجايعا ەلباسىنىڭ اتى بەرىلۋى تۋرالى. ەلدىكتىڭ كەلىستى كورىنىسى

ەل تابالدىرىعى ادەتتە اۋەجايدان باستالادى. قاي ەلگە باعىت العاندا دا الدىمەن ەل استاناسىنىڭ اۋەجايى اتالادى، سول اۋەجايدىڭ اتاۋىن جادىمىزدا جاتتاپ قالامىز. سوندىقتان دا ۇكىمەتتىڭ استانانىڭ حالىقارالىق اۋەجايىنا نۇرسۇلتان نازارباەۆتىڭ اتىن بەرۋ تۋرالى قاۋلىسى بۇل نىساننىڭ ەل ءومىرى ءۇشىن دە، ەلدىڭ الەمدەگى ورنى ءۇشىن دە قاندايلىق ەرەكشە ءمانى بار ەكەنىن ءدوپ باسۋدىڭ كورىنىسى دەپ بىلەمىز.

بۇل شەشىمنىڭ ورىندىلىعىن دالەلدەپ شارشاپ-شالدىعۋدىڭ ءجونى دە جوق. ءبىزدىڭ ەل رەتىندە قاز باسۋىمىزدان باستاپ، قالىپتاسۋىمىز، قانات قاتايتۋىمىز، قازاقستان قىرانىنىڭ الەم اسپانىنا پارلاپ ۇشۋى، الىستى دا، جاقىندى دا مويىنداتۋى، ەرەن ىستەردى اتقارۋىمىز، ەكونوميكامىزدىڭ قۋاتتانۋى، حالىقتىڭ ءال-اۋقاتىنىڭ ارتۋى، جاھاندىق، جالپىادامزاتتىق ماڭىزدى ماسەلەلەردى شەشۋگە تىكەلەي ارالاساتىن،  قيىن تۇيىندەردى تارقاتۋعا تىكەلەي ىقپال ەتە الاتىن مىعىم مەملەكەتكە اينالۋىمىز ... – قىسقاسى، ەل بولۋىمىزدىڭ، ەل بولعاندا دا شيرەك عاسىرلىق ۋاقىتتىڭ ىشىندە الدىمەن الەمدەگى دامىعان ەلۋ ەلدىڭ قاتارىنا قوسىلا العان، ول بەلەستى باعىندىرعان سوڭ وزىق وتىزدىقتان ويىپ ورىن الۋ مىندەتىن ويداعىداي شەشىپ كەلە جاتقان ەڭسەلى ەل بولۋىمىزدىڭ باستاۋشىسى، ۇلتتى ۇلى ماقساتتارعا ۇيىستىرۋشى ەلباسىمىز نۇرسۇلتان ءابىشۇلى نازارباەۆ ەكەندىگىن ايتىپ جاتۋدىڭ ءوزى بۇگىندە ارتىق. سوندىقتان دا پارلامەنت دەپۋتاتتارى تاۋەلسىزدىكتىڭ  25 جىلدىعى دەكلاراتسياسىندا تۇڭعىش پرەزيدەنت – ەلباسىنىڭ ەرەن ەڭبەگىن كونستيتۋتسيادا اتاپ كورسەتۋ، نۇرسۇلتان نازارباەۆتىڭ ەسىمىن ەلدىڭ ايتۋلى نىساندارىندا ايشىقتاۋ قاجەتتىگىن ۇسىنعان بولاتىن. كوپتىڭ كوكەيىنەن شىققان ول ۇسىنىستار جۇزەگە اسا باستاعانى قۋانتارلىق.

الەمدە اۋەجايلارعا ايگىلى تۇلعالاردىڭ اتىن بەرۋ تاجىريبەسى تالايدان بار. بۇعان مىسال جەتكىلىكتى. 57 ەلدە بولدىم. كەيبىرىنە عانا ءوز بەتىممەن باردىم. بارىنە دەرلىك سوڭعى شيرەك عاسىر ىشىندە جۋرناليست رەتىندە جول ءتۇستى، ياعني ەل كورۋ، جەر كورۋدىڭ مول مۇمكىندىگى تاۋەلسىزدىك جىلدارىندا عانا اشىلدى. سوندا كوپتەگەن ەلدەردە وسىنداي قۇرمەت كورسەتۋ مىسالدارىنا جولىقتىق. ونداي اۋەجايلار ءتىزىمىن ناپولەون اتىنداعى، بەن-گۋريون اتىنداعى، اتاتۇرىك اتىنداعى، ۆاشينگتون اتىنداعى، فرەدەريك شوپەن اتىنداعى، داللەس اتىنداعى، كوپەرنيك اتىنداعى،  لەح ۆالەنسا اتىنداعى، موتسارت اتىنداعى، دجون لەننون اتىنداعى، سەنت ەكزيۋپەري اتىنداعى، گەيدار اليەۆ اتىنداعى، دجون كەننەدي اتىنداعى، ينديرا گاندي اتىنداعى، فەدەريكو فەلليني اتىنداعى، حوسە مارتي اتىنداعى، حريستوفور كولۋمب اتىنداعى، شارل-دە-گولل اتىنداعى ... دەپ جالعاستىرا بەرۋگە بولادى. تەك مەملەكەت باسشىلارىنىڭ اتىمەن اتالعان اۋەجايلاردىڭ سانىنىڭ ءوزى وتىزدان اسادى ەكەن. دەمەك، ۇكىمەتتىڭ بۇل شەشىمى – ۋاقىتى جەتكەن، وركەنيەتتىك ۇردىسىندە قابىلدانعان، اسىلىمىزدى ارداقتايتىن، باسىمىزداعى باقتى باعالايتىن ەل ەكەنىمىزدى كەمەل كورسەتەتىن كەلىستى شەشىم.

نۇرسۇلتان نازارباەۆ حالىقارالىق اۋەجايىنا العاشقى قوناقتار  قاسيەتتى قادىر تۇنىندە كەلگەنى قاندايلىق عانيبەت بولدى دەسەڭىزشى!

ساۋىتبەك ابدراحمانوۆ، پارلامەنت ءماجىلىسىنىڭ دەپۋتاتى، قازاقستان حالقى اسسامبلەياسى دەپۋتاتتىڭ توبىنىڭ باسشىسى

12 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1581
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3610