بۇگىن استانادا ەكى ەل اراسىنداعى ديپلوماتيالىق قارىم-قاتىناستىڭ ورناۋىنا 25 جىل تولۋىنا وراي جوعارى دەڭگەيدەگى «اقش – قازاقستان» حالىقارالىق كونفەرەنتسياسى ءوتتى. ۇزاق جىلعى قازاقستان-امەريكاندىق قارىم-قاتىناستىڭ ناتيجەسىندە اشىق ديپلوماتيا ورناعان. - دەپ حابارلايدى اباي-اقپارات.

كونفەرەنتسيا اياسىندا ەكونوميكا مەن ساۋدا، سونداي-اق، ادامي كاپيتالدى دامىتۋ سالالارىندا جاھاندىق جانە ايماقتىق دەڭگەيدەگى ەكى جاقتى سەرىكتەستىك ماسەلەلەرى قاراستىرىلدى.

- ەكى جاقتى قارىم-قاتىناستىڭ تۇراقتىلىعى مەن ديناميكاسى مەملەكەتتىك پراگماتيكالىق مۇددەلەرمەن تىكەلەي بايلانىستى. قازاقستان ءۇشىن الەمدىك ەكونوميكالىق كوشباسشىمەن سەرىكتەس بولۋ – بۇل جاھاندىق ەكونوميكاعا دەگەن ينتەگراتسيا. 25 جىل بويى ءوزارا ناتيجەلى ىنتىماقتاستىق نەگىزى ءىس جۇزىندە دە كورىنىس تاپتى، - دەدى ءوز سوزىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ ديرەكتورى ەرجان سالتىباەۆ.

كونفەرەنتسياعا قاتىسۋشىلار تالقىلاعان ەكى جاقتى سەرىكتەستىكتىڭ نەگىزگى تۇستارى رەتىندە قازاقستان مەن اقش اراسىنداعى جاھاندىق يادرولىق قاۋىپسىزدىك پروتسەسسىن نىعايتۋداعى ىقپالداستىقتى اتاۋعا بولادى.

- ءبىز ەرىكتى تۇردە قۋاتتى يادرولىق ارسەنالدان باس تارتقان بولاتىنبىز. الەمدە ەڭ العاشقىلار بولىپ سەمەي يادرولىق پوليگونىن ماڭگىگە جاپتىق. كورشىلەس ەلدەرمەن بىرگە يادرولىق قارۋدان ازات ورتا ازيالىق ايماقتى قۇردىق. ءوز كەزەگىندە، اقش نانن-لۋگارا باعدارلاماسى ارقىلى نۇرسۇلتان نازارباەۆتىڭ باستاماسىمەن قۇرىلعان انتيادرولىق قوزعالىستى ناسيحاتتاۋعا سۇبەلى ۇلەس قوستى. سونىمەن قاتار، ءبىز قازاقستان كوشباسشىسىنىڭ انتيادرولىق ستراتەگياسىنىڭ جاھاندىق ساباقتاستىعى تۋرالى دا ايتا الامىز. سەبەبى، يادرولىق قاۋىپسىزدىك ءسامميتىن وتكىزۋدە اقش قۇرىلتايشى بولدى، - دەدى ە. سالتىباەۆ.

اەسي ديرەكتورىنىڭ ايتۋىنشا، اقش-تىڭ ورتا ازياداعى «س5+1» اتتى جاڭا ستراتەگياسى ايماقتىق قاۋىپسىزدىك، ورتا ازيادا ەكونوميكالىق سەرىكتەستىكتى دامىتۋ، سونىڭ ىشىندە ايماقتىڭ كولىكتىك ءال-اۋقاتىن ارتتىرۋ بويىنشا ەكى ەل اراسىنداعى قارىم-قاتىناستى نىعايتۋدا ماڭىزدى سەرپىن بولماق.

كونفەرەنتسيا جۇمىسىنا امەريكالىق تاراپتان اقش-تىڭ قر ەلشىسى دجوردج كرول, اقش-تىڭ قر ەكس-ەلشىلەرى دجون وردۆەي, ەليزابەت دجونس، ريچارد حوۋگلاند قاتىستى. قازاقستان تاراپىنان مەملەكەتتىك حاتشى گۇلشارا ابدىقالىقوۆا, سىرتقى ىستەر ءمينيسترىنىڭ ورىنباسارى ەرجان اشىقباەۆ، ۇلتتىق ەكونوميكا ۆيتسە-ءمينيسترى مادينا ابىلقاسىموۆا جانە وزگە دە مەملەكەت جانە قوعام قايراتكەرلەرى، عالىمدار مەن ساراپشىلار قاتىستى.

انىقتاما: شارانى ۇيىمداستىرۋشى قر تۇڭعىش پرەزيدەنتى – ەلباسى كىتاپحاناسىنىڭ تالداۋ ورتالىعى، اقش-تىڭ قازاقستانداعى ەلشىلىگى جانە قر سىرتقى ىستەر مينيسترلىگىنىڭ قولداۋىمەن قر تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتى بولىپ تابىلادى.

اەسي قازاقستان رەسپۋبليكاسى تۇڭعىش پرەزيدەنتىنىڭ مەملەكەتتىلىكتى قالىپتاستىرۋ مەن نىعايتۋ، حالىقارالىق ىنتىماقتاستىقتى دامىتۋ مەن بەيبىتشىلىك پەن تۇراقتىلىقتى قامتاماسىز ەتۋگە قوسقان ۇلەسىن زەرتتەيدى. اەسي پىكىرتالاس الاڭى ۇلت كوشباسشىسىنىڭ ستراتەگيالىق باستامالارىن جان-جاقتى ناسيحاتتاۋ اياسىندا جانە ولاردى جۇزەگە اسىرۋ جولدارىن قالىپتاستىرۋ بويىنشا جۇمىس ىستەيدى.

Abai.kz