پرەزيدەنت ن.نازارباەۆ ساۋىردە جارىق كورگەن «بولاشاققا باعدار: رۋحاني جاڭعىرۋ» اتتى ماقالاسىندا «مەن بۇگىنگى زامانداستارىمىزدىڭ جەتىس¬تىك¬تەرىنىڭ تاريحىنا دا نازار اۋدارۋدى ۇسىنامىن. بۇل يدەيانى «قازاقستانداعى 100 جاڭا ەسىم» جوباسى ارقىلى ىسكە اسىرعان ءجون. «قازاقستانداعى 100 جاڭا ەسىم» جوباسى – تاۋەلسىزدىك جىلدارىندا تابىسقا جەتكەن، ەلىمىزدىڭ ءار وڭىرىندە تۇراتىن ءتۇرلى جاستاعى، سان الۋان ەتنوس وكىلدەرىنىڭ تاريحى. جوبادا ناقتى ادامداردىڭ ناقتى تاعدىرلارى مەن ءومىرباياندارى ارقىلى بۇگىنگى، زاماناۋي قازاقستاننىڭ كەلبەتى كورىنىس تابادى» دەگەن ەدى. بۇل جوبانى ىسكە اسىرۋ اقپارات جانە كوممۋنيكاتسيا مينيسترلىگى مەن قازاقستان حالىقتارى اسسامبلەياسىنا جۇكتەلگەن ەدى.

ءسويتىپ، پرەزيدەنت ماقالاسىندا ايتىلعان «قازاقستاننىڭ 100 جاڭا تۇلعاسى» جوباسى ىسكە اسىرۋ ماقساتىنداعى جۇمىستار باستالىپ كەتتى. ەڭ اۋەلى جوبا جوبانى ىسكە اسۋرى بويىنشا جۇمىسشى توبى قۇرىلدى. ىلە مينيستر داۋرەن اباەۆ بۇل جۇمىستى مەملەكەتتىك قۇرىلىم ءبىر ءوزى ىسكە اسىرا المايدى، سوندىقتان قوعام بەلسەندىلەرىن دە وسى جوباعا اتسالىسۋعا شاقىرۋ تۋرالى شەشىم قابىلداعانىن ايتقان ەدى. وسىلايشا، مينيستر اباەۆ وتكەن اپتادا قوعامدىق باستاماشىل وكىلدەرى ەرجان باعداتوۆ، پاۆەل كوكتىشەۆ، زينايدا پاك، ارمان نۇرعازيندەرمەن كەزدەسىپ، ولارمەن «قازاقستاننىڭ 100 جاڭا تۇلعاسى» جوباسى جايلى كەڭەستى.

كەزدەسۋدە داۋرەن اباەۆ شارتتى تۇردە «بيۋرو 100» دەگەن اتاۋمەن جۇمىس ىستەيتىن بۇل توپقا جۇرت بىلە بەرمەيتىن ەلىمىزدەگى ەڭ ىسكەر، ەڭبەكقور، اينالاسىنا سىيلى ادامداردى ىزدەۋ جۇمىسىن ۇيلەستىرۋ ءۇشىن ازاماتتىق قوعاممەن بايلانىس ورناتۋ جۇكتەلدى.

داۋرەن اباەۆپەن كەزدەسۋدەن كەيىن ازاماتتىق قوعاممەن بايلانىس جونىندەگى جۇمىس توبىنىڭ وكىلدەرىنىڭ ءبىرى ەرجان باعداتوۆ جوبا تۋرالى ويىن ايتا كەلىپ، بىلاي دەدى.

ەرجان باعداتوۆ:

• ەلىمىزدە كوپتەگەن ازاماتتار ەلەۋسىز، قوعامنىڭ نازارىنان تىس قالىپ كەلەدى. وسى جوبا ارقىلى سونداي ادامداردىڭ تانىلعانىن قالايمىن. قوعام سونداي ادامداردى ۇسىنۋى ءتيىس. ماسەلەن، ديماش سياقتى الەمدى تاڭقالدىرعان تالانتتاردى 100 جاڭا تۇلعانىڭ اراسىنان كورگىم كەلەدى. مينيستر ءوز قايىرىلىپ، كۇتپەگەن كەزدەسۋ وتكىزدى. كوپ ويلار ايتتى. ءار قايسىمىزدىڭ ءوز جەتىستىگىمىز بار. مۇنى قولداۋ كەرەك. ەندى ءبىز سونداي ادامداردى ىزدەۋ ءۇشىن اۋىل، اۋدانعا جولعا شىعامىز.

جوبا بويىنشا ەرەكشە ادامدار ۇسىنىلسا دەيمىن. مەنىڭ ويىمشا، ول ادامنىڭ تەك جەتىستىگى، ىستەگەن ءىسى عانا ەمەس، وزگەشە ويلاۋى، كوزقاراسى، جاڭا مۇمكىندىكتەردى اشا بىلەتىن قاسيەتتەرى سىندى ادامي ەرەكشەلىكتەرىنە كوبىرەك ءمان بەرىلگەن دۇرىس. ءبىر سوزبەن ايتقاندا، شابلون بولماۋى ءتيىس.

زينايدا پاك:

• مينيسترمەن جوبا اياسىندا بىرلەسىپ جۇمىس ىستەۋگە كەلىستىك. ءبىز جاي عانا قوعامدىق باستاماشىل توپپىز. جوبانىڭ قوعام ءۇشىن دە، مەملەكەت ءۇشىن دە جاقسى دەڭگەيدە وتكەنىن قالايمىز. ەگەر ءاربىر مەملەكەتتىك باعدارلاما قوعامدىق كەڭەستەردىڭ قاتىسۋىمەن جاسالىپ، ىسكە اسسا، ونىڭ پايداسى كوبىرەك بولار ەدى دەپ ويلايمىن. ال، جوبا بويىنشا 100 جاڭا تۇلعانىڭ تاڭداۋدىڭ تالاپتارى el.kz سايتىندا جازىلدى. سول جەردەن تانىسۋعا بولادى.

ارمان نۇرعازين:

• كەزدەسۋدە قازاقستاننىڭ جاڭا 100 تۇلعاسىن انىقتاۋ شاراسىنا وراي بيۋرو 100 – ازاماتتىق باستاماسى كوتەرىلدى. كەزدەسۋگە بارعان ءاربىرىمىزدىڭ قوعامدىق باستاما تۋرالى ءوز ايتارىمىز بولدى.

پاۆەل كوكتىشەۆ:

• جالپى مەنىڭ كاسىبىم كاسىپكەرلەردى قولداۋ. مەنىڭشە، ولار تۋرالى قاجەتتى دەڭگەيدە ايتىلىپ جاتقان جوق. وسىنداي مەملەكەتتىك باستاما بار ەكەنىن ەستىدىم. كەزدەسۋگە ارىپتەستەرىم شاقىردى. مەنىڭشە، جوباعا ۇسىنىلاتىن ادام وزگەگە ۇقسامايتىن ادامي تاعدىرى بار بولعانى ءجون. ماسەلەن، كوپ جىل ەڭبەك ەتىپ، ءوزىنىڭ شەبەرى بولعان، شاكىرت تاربيەلەگەن سول ىسىمەن اينالاسىنا ۇلگى بولىپ جۇرگەن ادام بولسا قۇبا-قۇپ.

وسىلايشا، «قازاقستاننىڭ جاڭا 100 تۇلعاسى» جوباسىنا قوعامدىق باستاماشىل توپتا ارالاسىپ، جاڭا تۇلعالاردى تاڭداۋعا كومەكتەسپەك. ارينە، باستاماشىل توپ وكىلدەرىنىڭ ارقايسىنىڭ ءوزىنىڭ جاڭا تۇلعاعا لايىق كورەتىن ادامدارى بار. الايدا، 100 تۇلعانى تاڭداۋ قوعام ءىسى. قوعام ءىسى بولعاندىقتان باستاماشىل توپ ەل ارالاپ، ازاماتتىق قوعام وكىلدەرىمەن كەزدەسىپ، جاڭا تۇلعالاردى انىقتاۋ اتسالىسپاق.

باستاماشىل توپ العاشقى جۇمىسىن باستاپ تا كەتتى. بۇگىن استاناداعى ورتالىق كوممۋنيكاتسيالار قىزمەتىمەن بىرلەسىپ، «بيۋرو 100» باستاماسى اياسىندا استاناداعى «ازاماتتىق اليانس» ۇكىمەتتىك ەمەس ۇيىمدار قاۋىمداستىعى وكىلدەرىمەن كەزدەۋ جاسادى.

نۇرا ماتاي