پرەزيدەنت نۇرسۇلتان نازارباەۆتىڭ لاتىن الىپبيىنە ءوتۋ تۋرالى باستاما كوتەرىپ، ۇكىمەت پەن قۇزىرلى ورگاندارعا 2025 جىلعا دەيىن ناقتىلى تاپسىرما بەرگەنىن بىلەسىزدەر.

قازاقستان پرەزيدەنتىنىڭ بۇل باستاماسىن قىرعىز جوعارعى كەڭەسىنىڭ دەپۋتاتتارى دا قۇپ الا جونەلگەن. ءتىپتى، لاتىن ءالىپبيىن ءتۇزۋ پروتسەسسىن قازاق-قىرعىز عالىمدارى بىرىگىپ جۇرگىزۋى كەرەكتىگىن دە قىرعىز دەپۋتاتتارى ايتتى.

ال قىرعىز رەسپۋبليكاسىنىڭ پرەزيدەنتى المازبەك اتامباەۆ بولسا، لاتىنعا وتۋگە قارسى كورىنەدى.

20 شىلدە كۇنى وتكەن "التاي وركەنيەتى جانە التاي تىلدىك وتباسىنىڭ تۋىس حالىقتارى" حالىقارالىق فورۋمىندا ول لاتىن قارپىنە وتۋگە قارسى ەكەندىگىن مالىمدەدى.

ء"بولىپ ال دا، بيلەي بەر" دەيتىن پانتيۋركيزم قاعيداسى ءبىزدىڭ حالىققا قارسى رەسەي يمپەرياسىندا دا، كسرو-دا دا قولدانىلعان.  ماسەلەن، تۇركى حالىقتارىنىڭ كلاسسيفيكاتسياسىن توپتار بويىنشا قاراستىرىپ كورەيىك. ولاردىڭ بىرىندە التاي، قىرعىز، قازاق، قاراقالپاق، تارات جانە باشقۇرت تىلدەرى قىپشاق توبىنا جاتادى، ونىڭ قۇرامىندا حاكاستار مەن شورلار بار، الايدا قىرعىزداردىڭ ءوزى جوق. نەگىزى بۇل حالىقتاردىڭ ءبارى ءبىر توپتا بولۋى ءتيىس، سەبەبى سول تىلدەردىڭ وكىلدەرى ءوز تىلدەرىندە ءبىر-بىرىمەن ەشقانداي اۋدارماشىسىز ەركىن سويلەسە الادى", - دەيدى اتامباەۆ مىرزا.

... وسىلاي دەي كەلىپ قىرعىز پرەزيدەنتى اتامباەۆ قازاق پرەزيدەنتى نۇرسۇلتان نازارباەۆتىڭ لاتىنعا كوشۋ تۋرالى باستاماسىنا بايلانىستى قىرىن پىكىر بىلدىرگەن.

"تمد-نىڭ لاتىنعا كوشىپ جاتقان "كەيبىر" ەلدەرى جايلى: "بىرەۋلەر لاتىن قارپى دامىعان مەملەكەتتەردىڭ ەملەسى دەگەندى ايتادى. بىراق قىتاي مەن جاپونيا لاتىنسىز-اق دامىدى. ءبىز نەگە رەسەيدە تۇرىپ جاتقانداردى - باشقۇرتتاردى، تاتارلاردى ۇمىتامىز؟ ولار كيريلل قارپىندە قالا بەرەدى عوي. ءدال سولارمەن ءبىز ءتىلىمىزدى دامىتىپ، ءوزارا بايىتا الار ەدىك", - دەدى اتامباەۆ "التاي وركەنيەتى جانە التاي تىلدىك وتباسىنىڭ تۋىس حالىقتارى" حالىقارالىق فورۋمىندا.

قىسقاسى، "كەيبىرەۋلەر" مەن "بىرەۋلەردىڭ" قازاق ءتىلىن قازىرگى قولدانىستاعى كيريلل ارىپىنەن تازالاۋ باستاماسى اتامباەۆقا جاقپاپتى. جاقپاعاندا، رەسەي فەدەراتسياسىندا تۇرىپ جاتقان تۇركىتىلدەس حالىقتاردىڭ بىزدەن ءبولىنىپ قالاتىنىن العا تارتىپ وتى ول. ءسىز بۇعان نە دەيسىز؟

نۇرزات توعجان

Abai.kz