Abai.kz اقپاراتتىق پورتالىنىڭ ەلەكتروندى پوچتاسىنا جۋرناليست تالعات قاتاۋوۆتىڭ قازاقستان  رەسپۋبليكاسىنىڭ باس پروكۋرورى جاقىپ اسانوۆتىڭ، قر ىشكى ىستەر مينيسترى قالمۇحامبەت قاسىموۆتىڭ اتىنا "ورالدا بەلگىسىز بىرەۋلەر ماعان كيبەرلىك شابۋىل جاسادى" دەگەن تاقىرىپتا ماقالا كەلىپ ءتۇستى. بۇل اۆتور Abai.kz اقپاراتتىق پورتالىنا ۇزبەي ماقالا جازىپ، باتىستاعى تۇراقتى اۆتورى بولىپ جۇرگەندىكتەن جايدىڭ انىق-قانىعىن قۇزىرەتتى ورگاندار تەكسەرە جاتار دەگەن نيەتپەن ماتەريالدى تولىق جاريالاپ وتىرمىز. قارسى تاراپتىڭ، يا رەسمي مەكەمەلەردىڭ ايتارى بولسا، ولارعا دا مىنبەر بەرەتىنىمىزدى ەسكەرتەمىز.

Abai.kz اقپاراتتىق پورتالى 

قازاقستان  رەسپۋبليكاسىنىڭ

باس پروكۋرورى ج. ق. اسانوۆتىڭ

                قر ىشكى ىستەر مينيسترى 

ق. قاسىموۆتىڭ نازارىنا!

ورال قالاسىندا تەمىر جول ۆوكزالى الدىندا ىلىنگەن 10 دانا قر مەملەكەتتىك تۋىنىڭ بىرەۋى كوپتەن بەرى جىرتىلىپ، تومەن قاراي سالبىراپ تۇرعانىن جانە قالعاندارى كۇن كوزىنەن ابدەن ءتۇسى وزگەرگەنىن كورىپ ءجۇردىم.  بقو ىشكى ساياسات باسقارماسى قىزمەتكەرلەرى ەش شارا قولدانباعاسىن، تۋىمىزدىڭ قورلانىپ تۇرعانىنا پاتريوتتىق رۋح جىبەرمەي،  قولىما قالام الىپ، 2017 جىلدىڭ 2 تامىز كۇنى "Abai.kz" اقپاراتتىق پورتالىنا: «جىرتىق تۋدى اۋىستىرۋ ءۇشىن ەلباسى ورالعا كەلۋى كەرەك پە؟» اتتى ماقالا جازعان بولاتىنمىن. كەلەسى كۇنى، ياعني 3 تامىز 2017 جىلى  وسى ماقالامنان كەيىن ورال قالاسىنداعى تەمىر جول ۆوكزالىنداعى 10 دانا تۋىمىزدى تۇگەل جاڭاسىمەن اۋىستىرىپ قويعان. الايدا، وسى سىن ماقالامنان كەيىن ماعان قارسى تەلەفون ارقىلى قورقىتۋ-ۇركىتۋ، ارانداتۋ جانە مەنىڭ نامىسىمدى قورلاۋ كوبەيدى. مەن بولىپ الەۋمەتتىك جەلىلەر: «فەيسبۋك»، «ۆك» جانە «ۆاتتساپتا» مەنىڭ تولىق مالىمەتىمدى جانە بايلانىس تەلەفونىمدى جازىپ، ار-وجدانىمدى قورلايتىن، قادىر-قاسيەتىمدى ءتۇسىرىپ، بەدەلىمە ۇلكەن نۇقسان كەلەتىن جالعان مالىمەتتى قاساقانا سالىپ، تاراتىپ وتىر. ناقتىراق ايتسام:

1. 2017 جىلدىڭ 6 تامىز كۇنى، 8775-737-48-30 نومىرلى تەلەفون ارقىلى بەلگىسىز ەر ادام تەلەفون شالىپ، «كەلەسىدە سىن-ماقالا جازساڭ، اجالىڭنان بۇرىن ولەسىڭ، ءولىمىڭ بىزدەن بولادى» دەپ، كوپشە تۇردە ايتتى. كەيىن وسى نومىردەگى 8775-737-48-30  ۆاتتساپ ارقىلى اۋديوقوڭىراۋمەن بىرنەشە مارتە تەلەفون سوعىپ، «جولدان وتكەندە ساق بول، باۋىرلارىڭدى ويلا» دەپ قوقان-لوقى جاساپ، ماعان ۇرەي تۋعىزدى.

2. 2017 جىلدىڭ 7 تامىز كۇنى مەنىڭ ۆاتتسابىم بۇزىلىپ، 10 مينۋتتاي ۆاتتسابىم ۋاقىتشا جاساماي قالدى. ەرتەسى كۇنى، ياعني 8 تامىزدا مەنىڭ ۆاتتسابىمداعى قۇرداستار ءنومىرىن جيناقتاپ، «1988 جىلعى تۇلەكتەر» دەپ جالعان گرۋپپا اشىپ، مەن بولىپ بىرەۋلەرمەن جامان سوزدەر جازىسقان، سكرينشوتتارىن وتىرىك گرۋپپاعا جىبەرگەن. بۇل گرۋپپانىڭ ءادمينى بولىپ، ماعان تەلەفون سوعىپ، مەنى قورقىتقان جوعارىداعى ءنومىر 8775-737-48-30 جازۋلى تۇر.

3. 2017 جىلدىڭ 9  تامىزىندا مەنىڭ تولىق مالىمەتىمدى، اتى-ءجونىم مەن بايلانىس تەلەفونىمدارىمدى جازىپ، «Kolesa.kz» اۆتوكولىك ساتۋ سايتىنا مەن بولىپ دوسىمنىڭ «حۋنداي اكتسەنت» ماركالى اۆتوكولىگى ساتىلادى دەپ جالعان جارناما بەرىپتى.

4. 2017 جىلدىڭ 10 تامىزىندا مەنىڭ تولىق مالىمەتىمدى، اتى-ءجونىم مەن بايلانىس تەلەفونىمدارىمدى جازىپ، «Krisha.kz» جىلجىمايتىن مۇلىك ساتۋ سايتىنا مەن بولىپ، قارىنداسىمنىڭ ءۇيى ساتىلادى دەپ، مەنىڭ اتىمنان جالعان جارناما بەرگەن.

5. 2017 جىلدىڭ 10 تامىزىندا الەۋمەتتىك جەلى «فەيسبۋكتا» مەنىڭ تولىق مالىمەتىمدى، اتى-ءجونىم مەن بايلانىس تەلەفونىمدارىمدى جازىپ، فوتولارىمدى قويىپ، مەن بولىپ، مەنىڭ ار-نامىسىما تيەتىن، بەدەلىمدى تۇسىرەتىن جالعان ولەڭ شىعارعان.

6.   2017 جىلدىڭ 10 تامىزىندا مەنىڭ تولىق مالىمەتىمدى، اتى-ءجونىم مەن بايلانىس تەلەفونىمدارىمدى جازىپ، الەۋمەتتىك جەلى «ۆك»-دا، مەن بولىپ، مەنىڭ ار-نامىسىمدى تاپتاپ، قادىرىمدى قورلايتىن «گەيلەر گرۋپپاسىن» اشقان جانە ماعان حابارلاسىڭدار دەپ جازىپتى.

7. 2017 جىلدىڭ 10 تامىزىندا «yvision.kz» سايتىندا: «تالعات كاتاۋوۆ ءسىز كىمسىز، حالىق جاناشىرىسىز با، الدە الاياقسىز با؟» دەگەن اۆتورى جوق، ەش شىندىققا جاناسپايتىن جالعان ماقالا جاريالادى.

بۇل جوعارىدا دالەلمەن كەلتىرگەن جاعدايدى، مەنىڭ  قورلانىپ تۇرعان مەملەكەتتىك تۋدى قايتا جاڭارتۋعا ۇلەس قوسقان سىن-ماقالاما تىكەلەي قاتىستى دەپ ناقتى ايتا الامىن. سەبەبى، مەنى جەك كورەتىندەي، مەنى كورە المايتىنداي جەكە بيزنەسىم جوق، ءدىني ۇيىمدار مەن  قىلمىستىق توپتارعا ەش قاتىسىم جوق. ومىردە ەشكىمنىڭ الا-ءجىبىن اتتاماعان، قاراپايىم قازاقستان رەسپۋبليكاسى ازاماتىمىن.

2016 جىلدىڭ كۇزىندە "Abai.kz" اقپاراتتىق پورتالىنا «ورالدا اسسامبلەيانىڭ تۋى تومەن ءتۇسىرىلدى» اتتى ماقالام شىققاندا دا بەلگىسىز بىرەۋلەر تەلەفون ارقىلى ۇرەي تۋعىزىپ، كەيىن فەيسبۋكتا مەن بولىپ پاراقشا اشىپ، مەنىڭ ارىمدى قورلايتىن، ءار ءتۇرلى ادەپسىز سەكسۋالدىق اڭگىمەلەر جازىپ ەدى. ول جاعداي تۋرالى 2017 جىلدىڭ 6 قاڭتارىندا ورال قالاسى شاعان ءىىب ارىز جازىپ شاعىمدانعان بولاتىنمىن. بىراق، ەشقانداي ناتيجە بولمادى جانە ەشقانداي جازباشا جاۋاپ بەرمەدى. ەندى سوڭعى جاعداي تۋرالى تاعى دا شاعان ءىىب-نە 2017 جىلدىڭ 11 تامىز كۇنى ارىز جازدىم. الايدا، تاعى دا ەش ناتيجە بەرمەيتىنە كوزىم تولىق جەتىپ وتىر. سول سەبەپتى، "Abai.kz" اقپاراتتىق پورتالى ارقىلى سىزدەردەن كومەك سۇراۋعا ءماجبۇر بولىپ وتىرمىن.

قازاقستان رەسپۋبليكاسى كونستيتۋتسياسىندا: «قازاقستان رەسپۋبليكاسىنىڭ ەڭ قىمبات قازىناسى - ادام جانە ادامنىڭ ءومىرى، قۇقىقتارى مەن بوستاندىقتارى» دەلىنگەن. كونستيتۋتسيالىق قۇقىعىمدى پايدالانا وتىرىپ، مەنىڭ ادامدىق ابىرويى مەن قادiر-قاسيەتiمدى تەلەكوممۋنيكاتسيالار، جەلىلەرى ارقىلى  ادەپسiز تۇردە كەمسiتىپ وتىرعان بەلگىسىز ادامدى تاۋىپ، قازاقستان رەسپۋبليكاسىنىڭ قىلمىستىق كودەكسىنىڭ بابتارىنا ساي جاۋاپكەرشىلىككە تارتۋ ءۇشىن ىقپال ەتىپ، مەنىڭ ارىزىمدا جازىلعان جايدى جوعارى تەحنيكالىق قۇرالدارى ارقىلى ەگجەي-تەگجەيلى تەكسەرۋگە ىقپال ەتۋلەرىڭىزدى سۇرايمىن.

تالعات قاتاۋوۆ، ورال قالاسىنىڭ تۇرعىنى 

Abai.kz