قۇرىلعانىنا شيرەك عاسىر بولىپ جاتقان قازاقستان پوليتسياسىنىڭ وتكەن كەتكەنى ءوز الدىنا بولەك اڭگىمە دەسەك تە، ءتارتىپ ساقشىلارىنىڭ قاربالاسقا تولى بۇگىنگى تىرلىگى دە اۋىز تولتىرىپ ايتۋعا تۇرارلىق. ادەتتە، ەل ءىشى پوليتسيانىڭ قىزمەتىنە قول سوققان ەمەس. بۇل ءبىر ەسەپتەن تۇسىنۋگە بولاتىن كەپ. الايدا، وركەنيەتتى ەلدەردىڭ وزىندە پوليتسيا ساربازدارى تۋرالى ءبىر جاقتى پىكىر جوقتىڭ قاسى. بىرەۋ ماقتايدى، بىرەۋ داتتايدى. سوندىقتان بولسا كەرەك، گولليۆۋد كينووندىرىسى اقش-تىڭ ايبىندى دەتەكتيۆتەرى جونىندە جاعىمدى فيلمدەردى جالعاستى ءتۇسىرىپ كەلەدى. وكىنىشكە قاراي، قازاقستاندىق  كينو رەجيسسەرلەر تاراپىنان بۇل ءىس ءالى قولعا الىنا قويعان جوق. وسىنى سەبەپ ەتە وتىرىپ، ءبىز وبلىس ورتالىقتارىندا اشىلعان جەرگىلىكتى پوليتسيا قىزمەتىنىڭ جۇمىسىنداعى ىلگەرلەۋشىلىكتى باسا كورسەتىپ، شىعارماشىلىق ورتاعا وي سالۋدى ءجون دەپ شەشتىك.  بۇل رەتتە ءبىز  الماتى وبلىستىق ءىىد جەرگىلىكتى پوليتسيا قىزمەتىنىڭ باستىعى، پوليتسيا پولكوۆنيگى م. كۇشتىباەۆتىڭ بەرگەن مالىمەتتەرىنە سۇيەنە وتىرىپ، تومەندەگى جايتتارعا شولۋ جاساپ شىقتىق.

ايماقتا ازايعان قىلمىستاردىڭ ءبىرى – مال ۇرلىعى

«تۇراقتى تۇردە ۇيىمداستىرىلاتىن «قۇقىقتىق ءتارتىپ»، «رەتسيديۆ»، «تۇرمىس» سياقتى قىلمىستىڭ الدىن الۋ شارالارىمەن قاتار، قىزمەت باسشىلىعى اي سايىن قالالىق جانە اۋداندىق دەڭگەيدەگى باسشىلاردىڭ قاتىسۋىمەن جەدەل كەڭەستەر وتكىزىپ تۇرادى. وسىنداي جان-جاقتى جۇمىستاردىڭ ناتيجەسىندە وتكەن جارتى جىلدا وبلىس بويىنشا بارلىق تىركەلگەن قىلمىستاردىڭ سانى 14,1 پايىزعا ازايسا، ونىڭ ىشىندە اۋىر، اسا اۋىر قىلمىستار 5,8 پايىزعا كەمىدى. پايىزعا شاققاندا ازايعان قىلمىستاردىڭ ءبىرى – مال ۇرلىعى. وبلىس اۋماعىندا مال ۇرلىعىنىڭ الدىن الۋ ءۇشىن مەملەكەتتىك ورگانداردىڭ باسشىلارىمەن ۇدايى باس قوسىپ، ناقتى تاپسىرمالار قويا ءبىلۋدىڭ جانە ونىڭ ورىندالۋىن باقىلاۋدىڭ ناتيجەسىندە اتالعان ۇرلىق 16,5 پايىزعا ازايدى. سونىمەن قاتار، قاراقشىلىق 22 پايىزعا، توناۋ 21,8 پايىزعا، بۇزاقىلىق جاساۋ 43,3 پايىزعا كەمىدى»، – دەدى ءوز  سوزىندە پوليتسيا پولكوۆنيگى م. كۇشتىباەۆ.

الماتى وبلىسىندا اتقارىلىپ جاتقان يگى ىستەردىڭ ءبىرى – بيىلعى جىلى وبلىس ورتالىعىندا قوعامدىق كومەكشىلەر جاساعى قۇرىلىپ، جەرگىلىكتى بيۋدجەتتەن 50 ميلليون تەڭگە ءبولىنىپتى. تالدىقورعان قالاسى اكىمشىلىك اۋماعىنىڭ ۇلعايۋىنا بايلانىستى بۇگىندە تالدىقورعان قالاسىندا پوليتسيانىڭ 56 كومەكشىسى قوعامدىق ءتارتىپتى كۇزەتۋدە. قوعامدىق كومەكشىلەر جاساعىن قۇرىپ، ولاردىڭ ءتيىمدى جۇمىس ىستەۋلەرىنىڭ ناتيجەسىندە قالا بويىنشا قوعامدىق ورىنداردا تىركەلەتىن قىلمىس سانى ازايدى. اتاپ ايتقاندا، وتكەن التى اي ىشىندە تالدىقورعان قالاسىندا قوعامدىق ورىنداردا بولاتىن قىلمىستار 30,6 پايىزعا كەمىسە، ونىڭ ىشىندە كوشەدە تىركەلەتىن قىلمىس 40,0 پايىزعا تومەندەگەن.

سونىمەن قاتار، جەرگىلىكتى پوليتسيا قىزمەتى رەتسيديۆتىك قىلمىستار مەن ماس كۇيىندە جاسالاتىن قىلمىستاردىڭ الدىن الۋدا دا ايتارلىقتاي ناتيجەگە قول جەتكىزىپ وتىر. ەسەپتى مەرزىم ىشىندە وبلىس بويىنشا 10173 ادام ەسەپتە تۇرسا، ونىڭ 5495-ءى – بۇرىن سوتتالعاندار. ەسەپتە تۇرعان 3881 ماسكۇنەممەن جانە 564 ناشاقورمەن دە قىلمىستىڭ الدىن الۋ باعىتىندا تۇراقتى جۇمىس جۇرگىزىلگەن. دەي تۇرساق تا، جامبىل جانە ىلە اۋداندارىندا بۇرىن سوتتالعاندار تاراپىنان جاسالعان قىلمىستاردىڭ ءوسۋى بايقالىپ وتىر.

2017 جىلدىڭ 3 شىلدەسىندە ەلباسى «قۇقىق قورعاۋ جۇيەسىن جەتىلدىرۋ تۋرالى بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعان بولاتىن. وسى زاڭ تالاپتارىنا سايكەس قىلمىستىق كودەكستىڭ 2 بابى، ياعني دەنساۋلىققا قاساقانا جەڭىل زيان كەلتىرۋ جانە ۇرىپ-سوعۋعا قاتىستى باپتار اكىمشىلىك قۇقىق بۇزۋشىلىق تۋرالى كودەكسكە كوشىرىلدى. وسىعان وراي، بۇگىندە قۇقىق بۇزۋشىلارمەن اڭگىمە وتكىزىلىپ، قىلمىستىڭ الدىن الۋ جايلى ءتۇسىندىرۋ جۇمىستارى كەڭىنەن جۇرگىزىلۋدە.

قىلمىستىڭ الدىن الۋدا باق-تى پايدالانۋدىڭ ماڭىزى زور

الماتى وبلىسىنىڭ اۋماعىندا ءجيى تىركەلەتىن قىلمىستاردىڭ ءبىرى – بوتەننىڭ مۇلكىن ۇرلاۋ. وتكەن 7 اي ىشىندە پوليتسيانىڭ ۋچاسكەلىك ينسپەكتورلارى تۇرعىندارمەن 771 كەزدەسۋ وتكىزىپ، ۇرلىققا قاتىستى ساقتىق شارالارى جايلى ءتۇسىندىرۋ جۇمىستارىن جۇرگىزگەن. بۇل ورايدا ۇرلىقتى اشۋ جۇمىسىنىڭ دا جاندانا تۇسكەنىن ايتا كەتۋ كەرەك. اتاپ ايتقاندا، ۋچاسكەلىك ينسپەكتورلاردىڭ جەكە ىزدەۋىمەن 2653 قىلمىس اشىلسا، ولاردىڭ قاتىسۋىمەن 3015 قىلمىس اشىلدى. بۇل كورسەتكىشتەردىڭ وتكەن جىلدىڭ وسى مەرزىمىندە تىركەلگەن بوتەننىڭ مۇلكىن ۇرلاۋ كورسەتكىشىمەن سالىستىرعاندا ايتارلىقتاي ايىرماشىلىعى بولماسا دا، ىلگەرى جىلجۋ بار.

جەرگىلىكتى پوليتسياعا جۇكتەلگەن مىندەتتەردىڭ ءبىرى – كامەلەتكە تولماعاندار اراسىنداعى قىلمىستاردىڭ الدىن الۋ. وبلىس اۋماعىندا 743 جالپى ءبىلىم بەرەتىن مەكتەپ ورنالاسسا، ولاردا 323 مەكتەپ پوليتسيا ينسپەكتورلارى جۇمىس ىستەۋدە.

كامەلەتكە تولماعاندار تاراپىنان كەزدەسەتىن قىلمىستاردىڭ دەنى – ولاردىڭ زاڭدى بىلمەۋلەرىنەن بولىپ جاتادى. سوندىقتان دا مەكتەپتەگى پوليتسيا ينسپەكتورلارى جاسوسپىرىمدەر اراسىندا زاڭدى بىلمەۋ قىلمىستىق جاۋاپكەرشىلىكتەن بوساتپايتىنى جايلى ءجيى اڭگىمەلەر وتكىزىپ تۇرادى. وسى ماقساتتا ولار وتكەن التى ايدىڭ ىشىندە 2071 وقۋ ورنىندا بولىپ، 2138 اڭگىمە وتكىزىپتى. جاسوسپىرىمدەر اراسىنداعى قىلمىستىڭ الدىن الۋدا بۇقارالىق اقپارات قۇرالدارىن پايدالانۋدىڭ دا ماڭىزى زور. بۇل اتا-انالار ءۇشىن دە اسا پايدالى. جەرگىلىكتى پوليتسيا قىزمەتكەرلەرى تاراپىنان جارىق كورگەن 128 ماقالانىڭ دا اتالعان سالاداعى قىلمىستىڭ ازايۋىنا تيگىزگەن ىقپالى بارشىلىق.

ەگەر قالالىق جانە اۋداندىق ىشكى ىستەر ورگاندارىنا اتالعان ۋاقىت ىشىندە 2346 ءجاسوسپىرىمنىڭ جەتكىزىلگەنىن ەسكەرسەك اتالعان سالاداعى جۇمىس ءالى دە جانداندىرا ءتۇسۋدى تالاپ ەتەدى. جىل باسىنان بەرى 473 كامەلەتكە تولماعاندار مەن 310 قولايسىز وتباسى ىشكى ىستەر ورگاندارىنىڭ تىركەۋىنە الىندى.

بالالاردىڭ قىلمىسقا بارۋىنا نەگىزىنەن بوس ۋاقىتتارىن دۇرىس پايدالانباي سەندەلىپ ءجۇرۋى دە سەبەپ بولىپ جاتادى. مۇنداي كەلەڭسىزدىكتەردىڭ الدىن الۋ ماقساتىندا وبلىس اۋمعىندا 1381 وقۋشى لاگەرلەرى جۇمىس ىستەيدى. بۇگىنگە دەيىن ىشكى ىستەر ورگاندارىنىڭ ەسەبىندە تۇرعان 200-دەن استام بالا مەن قولايسىز وتباسىندا تاربيەلەنىپ جاتقان 500-دەن استام بالا وسىنداي لاگەرلەردە دەمالىپ قايتتى.

وسىنداي اتقارىلىپ جاتقان يگى ىستەرگە قاراماستان بىرقاتار اۋداندار مەن قالالاردا جاسوسپىرىمدەر قىلمىسى ارتىپ وتىر. سولاردىڭ ىشىندە، اسىرەسە، جامبىل اۋدانىندا وتكەن التى ايدا جاسوسپىرىمدەر تاراپىنان جاسالعان 36 قىلمىس تىركەلدى. وتكەن جىلى اۋدان بويىنشا 5 قىلمىس عانا تىركەلگەن بولاتىن.

جول – يگىلىك... ءارى ول قاۋىپتى

جول قاۋىپسىزدىگىن قامتاماسىز ەتۋ – بۇگىنگى كۇننىڭ باستى تالاپتارىنىڭ ءبىرى. سوندىقتان دا بۇل ماسەلە الماتى وبلىسىنداعى قۇقىق بۇزۋشىلىقتاردىڭ الدىن الۋ جونىندەگى ۆەدومستۆوارالىق كوميسسيا مەن ۇيلەستىرۋ كەڭەسىندە بىرنەشە رەت تالقىلانعان بولاتىن. وسىنداي بىرلەسكەن جۇمىستاردىڭ ناتيجەسىندە قوسىمشا 15 جىلجىمالى «كريس-پ» فوتورادار كەشەنى الىندى. جىلدامدىقتى ارتتىرۋعا توسقاۋىل بولاتىن كەشەننىڭ پايداسى زور ەكەنىن بۇگىنگى وڭ ناتيجەلەردەن كورۋگە بولادى. اتاپ ايتقاندا، جول-كولىك وقيعالارى 4,6 پايىزعا (878-دەن 838-گە دەيىن), ال قازا بولعاندار 3 پايىزعا دەيىن (167-دەن 162-گە دەيىن) ازايدى. وتكەن جىلدىڭ العاشقى جارتى جىلدىعىندا 3 ءىرى جول اپاتى تىركەلسە، بيىل ءبىر عانا اپات تىركەلدى. بۇل ورايدا، الماتى وبلىسىنىڭ اۋماعىنان وتەتىن «الماتى – وسكەمەن» تاس جولىنىڭ جاڭارۋى دا جول-كولىك اپاتىنىڭ ازايۋىنا وڭ ىقپال ەتكەنىن ايتا كەتۋ كەرەك. بۇگىندە اتالعان كۇرە جولدىڭ الماتى جانە تالدىقورعان قالالارىنىڭ اراسىنداعى بولىگى عانا اياقتالدى. مىسالى، وتكەن جىلدىڭ التى ايىندا وسى كۇرە جولدىڭ 46-شى شاقىرىمىنان 78-ءشى شاقىرىمىنا دەيىنگى ارالىعىندا 37 جول-كولىك وقيعاسى تىركەلىپ، 19 ادام قازا بولسا، 75 ادام ءارتۇرلى دەنە جاراقاتىن العان بولاتىن. ۇستىمىزدەگى جىلى 10 جكو تىركەلىپ، 1 ادام قازا بولدى جانە 17 ادام جاراقات الدى.

وسىعان بايلانىستى تاعى ءبىر ايتا كەتەتىن ءجايت – الماتى وبلىسىنىڭ اۋماعىندا الەمگە ايگىلى الاكول بار. اسىرەسە، جاز ايلارىندا ايدىندى الاكولگە كەلۋشىلەر نەگىزىنەن اۆتوكولىكپەن قاتىنايدى. سۋى شيپالى كول اۋماعىندا سالىنىپ جاتقان دەمالىس ورىندارىنىڭ دا سانى جىلدان-جىلعا ارتا تۇسۋدە. سوڭعى ءبىر قۋانىشتى حابار – جاقىن ارادا «تالدىقورعان – وسكەمەن» اۆتوكولىك جولىنىڭ جوندەۋ جۇمىستارى باستالماق. بۇل الاكول جاعالاۋىندا ءتۋريزمدى دامىتۋعا عانا ەمەس، اتالعان اراقاشىقتىقتا بولاتىن جول-كولىك وقيعالارىنىڭ دا ازايۋىنا سەپتىگىن تيگىزبەك.

ۇلتتىق ەكونوميكا مينيسترلىگىنىڭ مالىمەتى بويىنشا، «نۇرلى جول» باعدارلاماسىنىڭ اياسىندا اۆتوجول سالاسىن دامىتۋ باعىتىندا 17 جوبا جۇزەگە اسىرىلۋدا. سونىڭ ىشىنە 312 شاقىرىمدىق «تالدىقورعان-وسكەمەن» جانە ۇزىندىعى 184 شاقىرىم بولاتىن «ءۇشارال-دوستىق» اۆتوجولدارى دا ەنگىزىلىپ وتىر. الاكول ءتۋريزمى ءۇشىن ينفراقۇرىلىمدى دامىتۋ اسا ماڭىزدى. بۇل ءىستى ەلباسىنىڭ تاپسىرماسىنا سايكەس وبلىس اكىمى اماندىق باتالوۆ ەرەكشە نازارعا الىپ كەلەدى.

وبلىس اۋماعىنداعى ەڭ قاۋىپتى جول – «الماتى-كوكپەك-كوكتال» جولى بولىپ تۇر. بۇل جولدا التى ايدا 100 جول-كولىك وقيعاسى تىركەلىپ، 38 ادام قازا بولدى جانە 141 ادام جاراقات الدى.

وبلىس بويىنشا جاياۋ جۇرگىنشىلەردى باسىپ كەتۋ كورسەتكىشىنىڭ 21,2 پايىزى وسى «الماتى-كوكپەك-كوكتال» تاس جولىنىڭ اۋماعىنا تيەسىلى. مۇندا التى ايدىڭ ىشىندە 14 ادامدى كولىك قاعىپ كەتىپ، قازا بولدى. اتالعان اۋماقتا مۇنداي جان تۇرشىگەتىن فاكتىلەردىڭ ءجيى تىركەلۋىنە ەڭ الدىمەن ەلدى مەكەندەردىڭ كۇرە جولعا جاقىن ورنالاسۋى، جول تارابىنىڭ جاعدايى جانە كولىك اعىنىنىڭ كوپتىگى سەبەپ بولىپ وتىر. تاس جولدىڭ بويىندا 17 ەلدى مەكەن بار.

سونىمەن قاتار، بازارلار مەن ساۋدا ۇيلەرىنىڭ، كوڭىل كوتەرەتىن ورىنداردىڭ دا جولعا جاقىن ورنالاسۋى جۇرگىنشىلەر اجالىنا سەبەپ بولۋدا. وسىنداي ادام كوپ جۇرەتىن جەرلەردە نە قورشاۋلار، نە قاۋىپسىز وتپەلى جولدار جوق. قازىرگى تاڭدا «الماتى – كوكپەك – كوكتال» تاس جولىنا قاتارلاس وتەتىن «باتىس ەۋروپا – باتىس قىتاي» اۆتوجولىنىڭ قۇرىلىسى اياقتالۋعا تاياۋ. وسى كۇرە جول پايدالانۋعا بەرىلگەننەن كەيىن اتالعان ۋچاسكەدە جول اپاتى ازايادى دەگەن ءۇمىت مول.

بۇگىندە جپق قاراستى جول-پاترۋلدىك پوليتسيا بولىمشەلەرى حالىقارالىق جانە رەسپۋبليكالىق ماڭىزى بار 2564 شاقىرىم اۆتوجولعا قىزمەت ەتسە، «باتىس ەۋروپا – باتىس قىتاي» اۆتوجولى اياقتالعان سوڭ بۇل ۇزىندىق 286 شاقىرىمعا ۇلعايادى. قىزمەت كورسەتەتىن حالىقارالىق ماڭىزى بار جول اۋماعىنىڭ ارتۋىنا بايلانىستى جول-پاترۋلدىك پوليتسياسى بولىمشەلەرىنىڭ شتات سانىن دا ارتتىرۋعا تۋرا كەلەدى. بۇل جايلى جپق باستىعى، پوليتسيا پولكوۆنيگى م. كۇشتىباەۆ   جان-جاقتى دالەلدەرمەن باياندادى.

وبلىستا كولىك جۇرگىزۋشىلەرىنە سالىنعان اكىمشىلىك ايىپپۇلداردى ءوندىرىپ الۋ جۇمىسى دا جاندانعان. التى ايدىڭ ىشىندە 353 ميلليوننان استام تەڭگەنىڭ اكىمشىلىك ايىپپۇلى ءوندىرىلىپتى، بۇل وتكەن جىلدىڭ وسى مەرزىمىندەگى كورسەتكىشپەن سالىستىرعاندا 50 پايىزعا دەيىن وسكەن.

جەتىسۋ جەرى – تابيعي بايلىعىمەن دە اتى شىققان جازيرالى ولكە. الماتى وبلىسىنىڭ اۋماعىندا نەبىر سيرەك كەزدەسەتىن وسىمدىكتەر مەن جانۋارلاردى قورعاۋ دا جاۋاپتى مىندەتتەردىڭ ءبىرى. وتكەن التى ايدا 962 تابيعاتتى قورعاۋ زاڭدىلىعىن بۇزۋ فاكتىسى تىركەلگەنىن ەسكەرسەك، جەرگىلىكتى پوليتسيا قىزمەتىنە قاراستى تابيعات قورعاۋ پوليتسياسى جۇمىسىنىڭ قانشالىقتى قارقىندى ەكەنىن كورەمىز. ونىڭ ىشىندە 323 فاكتى بويىنشا قىلمىستىق ءىس قوزعالىپ، 639 ادام اكىمشىلىك جاۋاپكەرشىلىككە تارتىلىپتى. تابيعات زاڭدىلىعىن بۇزۋشىلارعا 3 ميلليون تەڭگەدەن استام ايىپپۇل سالىنسا، ونىڭ 2,5 ميلليون تەڭگەسى ءوندىرىلىپ الىنعان. قۇقىق بۇزۋشىلاردان 8 توننادان استام بالىق، 161 كۋبمەتر اعاش تاركىلەنگەن.

وسى جىلدىڭ باسىندا الماتى وبلىسىنىڭ اۋماعىندا دۇنيەجۇزىلىك قىسقى ۋنيۆەرسيادا وتكەنى بەلگىلى. بۇكىل الەم كوز تىككەن ۋنيۆەرسيادانىڭ تىنىشتىعىن كۇزەتۋگە مىڭنان استام پوليتسيا قىزمەتكەرى جۇمىلدىرىلدى. ءتارتىپ ساقشىلارىنىڭ تىنىمسىز جۇمىسى دا ناتيجەلى بولدى. وعان دالەل – دۇنيەجۇزىنىڭ تۇكپىر-تۇكپىرىنەن كەلگەن قوناقتار مەن سپورتشىلاردىڭ قاۋىپسىزدىگى ءوز دارەجەسىندە ساقتالىپ، ءتارتىپ ساقشىلارىنىڭ جۇمىسىنا ەشقانداي شاعىم بولعان جوق.

جەرگىلىكتى پوليتسيا قىزمەتىن قىزمەتتىك كولىكتەرمەن تولىقتاي قامتاماسىز ەتۋ جۇمىستىڭ ناتيجەلى بولۋىنا ىقپال ەتەتىنى داۋسىز. بۇل ورايدا وبلىس اكىمى ا. باتالوۆتىڭ جەرگىلىكتى پوليتسيا قىزمەتىنىڭ ماتەريالدىق-تەحنيكالىق بازاسىن نىعايتۋعا دەگەن قولداۋىن ايتپاي كەتۋگە بولمايدى. 2016 جىلى 60 قىزمەتتىك اۆتوكولىك بولىنسە، 2017 جىلى دا بۇل قولداۋ جالعاسىن تاۋىپ تاعى 47 اۆتوكولىك ءبولىندى. بۇل اۆتوكولىكتەر ۋچاسكەلىك پوليتسيا ينسپەكتورلارى مەن جول-پاترۋلدىك پوليتسياسى قىزمەتتەرىنە بەرىلدى.

جەرگىلىكتى پوليتسيا قىزمەتىنىڭ باستىعى، پوليتسيا پولكوۆنيگى م. كۇشتىباەۆ ءوز سوزىندە قالالار مەن اۋدانداردا تۇرعىلىقتى ءۇيى بىرگە قاراستىرىلعان ۋچاسكەلىك پوليتسيا تىرەكتەرىنىڭ قۇرىلىسى ءجۇرىپ جاتقانىن، وتكەن جىلى وسىنداي 5 ۋچاسكەلىك پوليتسيا تىرەگىنىڭ تالدىقورعان قالاسىندا، ەڭبەكشىقازاق، تالعار، پانفيلوۆ اۋداندارىندا پايدالانۋعا بەرىلگەنىن، بۇگىنگى كۇنى ىلە اۋدانىنا قاراستى ىنتىماق اۋىلىندا، قاراساي، اقسۋ جانە الاكول سياقتى تاعى دا بىرقاتار اۋدانداردا 13 ۋچاسكەلىك پوليتسيا تىرەگى سالىنىپ جاتقانىن جانە 2017 جىلعا وسىنداي 62 ۋچاسكەلىك پوليتسيا تىرەگىن تۇرعىزۋ جوسپارلانىپ وتىرعانىن دا اتاپ ءوتتى.

وبلىس بويىنشا ۋچاسكەلىك پوليتسيا ينسپەكتورلارىنىڭ شتاتتىق سانى – 638. ولاردىڭ ىشىندە تەك 35 ۋچاسكەلىك پوليتسيا ينسپەكتورى عانا قىزمەتتىك پاتەرلەرمەن قامتاماسىز ەتىلگەنىن ەسكەرسەك، بۇل يگى ءىستىڭ تەز ارادا جۇزەگە اسۋىنا ءتارتىپ ساقشىلارىنىڭ قانشالىقتى مۇددەلى ەكەنى ايتپاسا دا تۇسىنىكتى. ويتكەنى، مىناداي نارىقتىق كەزەڭدە تۇراقتى باسپاناسىز ءجۇرۋ قاۋىرت جۇمىستىڭ ورتاسىندا جۇرەتىن پوليتسيا قىزمەتكەرلەرى ءۇشىن قيىن ەكەنى داۋسىز. ال، تۇرعىلىقتى ءۇيى بىرگە قاراستىرىلعان ۋچاسكەلىك پوليتسيا تىرەكتەرىنىڭ سالىنۋى ولاردىڭ جۇمىسىن الاڭسىز اتقارۋلارىنا جانە ۋچاسكەلىك پوليتسيا ينسپەكتورىنىڭ ۇنەمى وزىنە بەكىتىلگەن اكىمشىلىك اۋماقتا بولۋىنا قولايلى جاعداي تۋعىزادى.

تۇيىندەي ايتقاندا، جەتىسۋلىق ساقشىلاردىڭ ناتيجەلى جۇمىسى قازاقستان پوليتسياسىنىڭ شيرەك عاسىرلىق مەرەكەسىنە دەگەن تولىمدى تارتۋ بولدى دەپ سەنىممەن ايتۋعا بولادى. ەلباسىمىز ن. نازارباەۆتىڭ «ۇلت جوسپارى – بەس ينستيتۋتسيونالدىق رەفورمانى جۇزەگە اسىرۋ جونىندەگى 100 ناقتى قادام» جوسپارىنىڭ 30-قادامىندا العا قويىلعان مىندەت – جەرگىلىكتى اتقارۋشى ورگاندارعا جانە جەرگىلىكتى قوعامداستىققا ەسەپ بەرەتىن جەرگىلىكتى پوليتسيا قىزمەتىن قۇرۋ بولاتىن. ەلباسى جۇكتەگەن مىندەتتى جاۋاپكەرشىلىكپەن ورىنداۋ ماقساتىندا قۇرىلعان جپق بۇگىندە ءوزىنىڭ تيىمدىلىگىن ناقتى ناتيجەلەرمەن دالەلدەگەن قىزمەتكە اينالدى.

بەرىك امانحان

Abai.kz