جەكسەنبى, 20 قازان 2019
كۇبىرتكە 10325 55 پىكىر 17 قىركۇيەك, 2017 ساعات 12:38

بوقاۋوۆ مەملەكەتتىك ءتىلدى قورعاماعانى ءۇشىن تاريحتا قالادى

كەشەلى بەرى تاۋەلسىز باق پەن الەۋمەتتىك جەلىنىڭ نازارى كەرەكۋگە اۋدى. زاتى تۇرماق اتى ءالى پاۆلودار اتالىپ كەلە جاتقان قالانىڭ تۇرعىنى، بەلگىلى قوعام بەلسەندىسى، ءتىل جاناشىرى رۋزا بەيسەنبايتەگى مەملەكەتتىك تىلدە حابارلاندىرۋ جاساماعانى ءۇشىن ترامۆايدىڭ جولىن جاپپاق بولدى. ال، جەرگىلىكتى اكىم-قارالار بەلسەندىنىڭ اۋزىن جابۋ ءۇشىن قولىنان كەلگەننىڭ ءبارىن جاساپ جاتىر.

وقيعا بىلاي بولعان. رۋزا بەيسەنبايتەگى قالاداعى 7 ترامۆاي كوندۋكتورىنان قازاق تىلىندە حابارلاما جاساۋىن تالاپ ەتكەن. ال، 7 ترامۆايدىڭ جۇرگىزۋشىسى "قازاق ءتىلى نەگە كەرەك؟" دەپ دۇرسە قويا بەرگەن. رۋزا بەيسەنبايتەگى ودان اۋىر سوزدەردى دە ەستىگەنىن ايتادى. بۇعان شىداماعان بەلسەندى ترامۆايدىڭ جولىن جاپپاققا ارەكەتتەنەدى.

رۋزا بەيسەنبايتەگى، قوعام بەلسەندىسى: 

- مەن كەشە نە ىستەرىمدى بىلمەدىم. ترامۆايدىڭ جولىن جاپپاقشى ەدىم، مەنى قازاققا بەلگىلى رىسبەك سارسەنبايۇلى سەكىلدى تۇلعالار رايىمنان قايتاردى. بۇل بۇگىن عانا باستالعان ءىس ەمەس. مەن ىلعي دا پاۆلوداردا وسىنداي ادىلەتسىزدىكتىڭ قۇربانى بولىپ كەلەمىن. 22 قىركۇيەككە قاراي استانادان، الماتىدان مەنى قولدايتىن قوعام بەلسەندىلەرى كەلمەك. وبلىس، قالا اكىمدەرىمەن سولار دا سويلەسىپ، قالاداعى ءتىلدىڭ جايىنا قاتىستى ءوز نارازىلىقتارىن بىلدىرەدى. 

مەنى كۇيدىرىپ وتىرعان ماسەلە مىناۋ. اكىمدىكتەگىلەر "ترامۆايدىڭ جولىن جاپساڭىز، ءسىزدىڭ  ۇستىڭىزدەن قىلمىستىق ءىس قوزعالادى" دەيدى. ال، ەندى "قازاقتىڭ ءتىلى نەگە كەرەك؟" دەپ مەملەكەتتىڭ زاڭىن، مەملەكەتتىڭ ءتىلىن پىسقىرماعان ادامدى، قالا بەردى مەكەمەنى جاۋاپكەرشىلىككە تارتۋعا قاۋقارسىز. مەن ءوزىمنىڭ جەكە باسىمنىڭ ماسەلەسىن ايتىپ وتىرعان جوقپىن. اكىمدىكتەگىلەر مەنى كەكەتىپ: "تاريحتا قالعىڭىز كەلە مە؟" دەدى. مەن ەمەس، ءتىلىن، ءتىنىن قورعاي الماعان پاۆلودار وبلىسىنىڭ اكىمى بولات بوقاۋوۆ، پاۆلودار قالاسىنىڭ اكىمى نۇرجان اشىمبەتوۆ تاريحتا قالادى. وسىنى نەگە تۇسىنبەيدى، ولار. 

اكىمدىكتەگىلەر ماعان تاعى حات جازىڭىز دەيدى. مەن وسى ۋاقىتقا دەيىن كەرەكۋدەگى ءتىل ماسەلەسىنە قاتىستى 52 حات جازعان اداممىن. 53 حاتتى جازۋعا قۇلقىم جوق. ءبارىبىر ەشتەڭە وزگەرمەيدى. 

الماتى، استانانىڭ بەلسەندىلەرى كىرىسپەي، بۇل ماسەلە شەشىلمەيتىنىنە كوز جەتكىزدىم. 

مەنى ترامۆاي مەكەمەسى ەرتەڭگە شاقىرىپ وتىر. وسىدان ءبىراز ۋاقىت بۇرىن وسىنداي ۋاقيعا بولعاندا مەنەن كەشىرىم سۇراعان ەدى دە، ءىستى جىلى جاۋىپ قويا سالعان. بۇل جولى دا انا جۇرگىزۋشىنى قىزمەتتەن الىپ، مەنەن كەشىرىم سۇراماق ويلارى بار سياقتى. ەندى كەشىرىم جاساي المايدى ەكەنمىن. 

مەن رىسبەك سارسەنباي سەكىلدى كىسىلەردىڭ سوزىنە عانا توقتادىم. قازاقستاننىڭ بەلسەندىلەرى وسى جولى پاۆلودارعا كەلىپ، ءوز ويلارىن ورتاعا سالماسا، مەن كەلەر جولى ويىما العان ىستەن تايىنبايمىن. 

رۋزا بەيسەنبايتەگى بىزگە وسىنى ايتتى. باتىر قىزدىڭ جانايقايىنا بوقاۋوۆ پەن اشىمبەتوۆ نە دەر ەكەن؟ سولار باسقارعان ەلدىمەكەندە قاراپايىم ترامۆاي جۇرگىزۋشىنىڭ ءوزى مەملەكەتكە، مەملەكەتتىڭ ساياساتىنا، مەملەكەتتىڭ تىلىنە قارسى. وسى ۋشىققان جارانىڭ بەتىن اشقان رۋزانى ماراپاتتاۋدىڭ ورنىنا قىلمىستىق ءىس قوزعاماق بولىپ جۇرگەن ولاردىڭ نە ويلاعانى بار؟

ءبىز ەرتەڭ بوقاۋوۆتان پىكىر الۋعا تىرىسپاقپىز. ونىڭ دا ايتار ويىن سايتىمىزدا جاريالايتىن بولامىز.

ءشارىپحان قايسار

Abai.kz

55 پىكىر