پۋتين ارىپتەسى نازارباەۆتى قۇتتىقتادى. نە ءۇشىن دەسەڭىز، 14-15 قىركۇيەكتە سيرياعا قاتىستى التىنشى حالىقارالىق كەزدەسۋدىڭ تابىستى وتكەن ءۇشىن.

استانا سيريا داعدارىسىن رەتتەۋ ءۇشىن مۇددەلەس ەلدەرگە الاڭ بولىپ وتىرعانى تۋرالى ءبىراز بۇرىن جازدىق. استانا التى جىلدان بەرى ءبىر ءبىرىنىڭ بەت ءجۇزىن كورمەي كەتكەن بيلىك جاقتاستارى (اساد بيلىگىن قولداۋشى توپ) مەن وپپوزيتسيا وكىلدەرىن ءبىر ۇستەلگە وتىرعىزدى. بۇل استانا كەلىسسوزدەرىنىڭ اۋەلگى جەڭىسى ەدى.

الايدا، سيريا جانجالىنىڭ وڭ شەشىمىن تاپپاي كەلە جاتقانىنا ءبىر سەبەپتەن ءپۋتيننىڭ دە قىڭىر-قيسيق ساياساتى سەبەپكەر. سوندىقتان پۋتين استانا پروتسەسسىنە مۇددەلى.

"ۆلاديمير پۋتين نۇرسۇلتان نازارباەۆتى سيرياداعى قاقتىعىستى رەتتەۋ ءۇشىن رەسەي جاعىنان اتقارىلىپ جاتقان شارالار جونىندە حاباردار ەتتى", - دەپ جازادى اقوردانىڭ رەسمي سايتى.

ءسويتىپ، سويلەسىپ وتىرعان ەكى پرەزيدەنت تە استانا پروتسەسىن جالعاستىرۋدىڭ ماڭىزدى ەكەنىن ەرەكشە اتاپ وتكەن.

بۇدان بولەك، پرەزيدەنتتەر الداعى ۋاقىتتا بولاتىن كەزدەسۋلەر كەستەسىن، سونىڭ ىشىندە جوعارى ەۋرازيالىق ەكونوميكالىق كەڭەس پەن تمد-عا مۇشە مەملەكەتتەر باسشىلارىنىڭ كەڭەسىنە دايىندىق بارىسىن قاراستىردى. ەكى ەل كوشباسشىلارى ەكى جاقتى ءوزارا ءىس-قيمىلدىڭ بارلىق ماسەلەلەرى بويىنشا تۇراقتى ديالوگتى جالعاستىرۋعا ۋاعدالاستى.

تەلەفون سوعىپ، سويلەسۋگە يشارا بىلدىرگەن ۆلاديمير پۋتين. ايتا كەتەيىك، وسىعان دەيىن ۆلاديمير پۋتين مەن نۇرسۇلتان نازارباەۆ 14 تامىز كۇنى تەلەفون ارقىلى تىلدەسكەن ەدى.

Abai.kz