سەنبى, 21 قىركۇيەك 2019
كورشىنىڭ كولەڭكەسى 3029 5 پىكىر 27 قىركۇيەك, 2017 ساعات 15:11

تۇرىك مۇعالىمدەرى قازاقستاننان ساياسي باسپانا سۇراي باستادى

ەلباسى نۇرسۇلتان نازارباەۆ ەلىمىزدەگى تۇرىك ليتسەيلەرىن جابۋعا قارسى بولىپ، رەسمي تۇركيا بيلىگىنىڭ بىرنەشە مارتە بەتىن قايتارعانى بەلگىلى. قازاقستاننىڭ جاستارىنا ساپالى ءبىلىم بەرگەن وقۋ ورىندارىنا دەگەن رەسمي استانانىڭ دۇرىس كوزقاراسى ەكى ەل اراسىنداعى ساياسي ماسەلەلەردى كۇردەلەندىرىپ جىبەرۋى مۇمكىن ەكەنى وسىعان دەيىن بىرنەشە رەت ايتىلعان. سول ءسوز راسقا اينالاتىن ءتۇرى بار.

پاۆلودارداعى ء"بىلىم-يننوۆاتسيا" ليتسەي-ينتەرناتىنىڭ (بۇرىنعى قازاق-تۇرىك ليتسەيى) تۇركيادان كەلگەن ەكى مۇعالىمى قازاقستاننان ساياسي باسپانا بەرۋدى سۇرايدى. بۇل تۋرالى Facebook الەۋمەتتىك جەلىسىندە الىبەك سمايىلوۆ دەگەن ازامات حابارلادى.

ونىڭ ايتۋىنشا، وعان دەميرەل وسمان مەن التىنشاش يسا اتتى ەكى تۇركيا ازاماتى ءوتىنىش جاساعان. ولار كوپ جىلدان بەرى قازاقستاندا قىزمەت ەتىپ كەلە جاتىر ەكەن، ولار جىل سايىن وزدەرىنە بەرىلگەن (وتباسىمەن بىرگە) ۆيزالارىن ۇزارتىپ كەلگەن. بيىل سول ۆيزالاردى ۇزارتۋعا شەكتەۋ قويىلعانعا ۇقسايدى.

سوندىقتان دا، ۆيزا الا الماي وتىرعان دەميرەل مەن التىنشاش قازاقستاننان ساياسي باسپانا سۇراپ، كوپ ۋاقىتتان بەرى قازاقستاندا تۇراتىندىقتارىن، ەشقاشان دا بۇل ەلدىڭ زاڭىن بۇزباعاندىقتارىن العا تارتادى.

ارينە، بۇل ەكى تۇرىك ازاماتىنىڭ ءوتىنىشى عانا دەۋگە بولار. بىراق، بۇل ەكى ادامنىڭ ارتىندا قازاقستاندا جۇمىس ىستەپ كەتكەن مىڭداعان مۇعالىمدەر تۇرعان جوق پا؟ ەكى ۇستازعا ساياسي باسپانا بەرسەك، تۇرىك بيلىگى وزىنە جاۋ ساناپ وتىرعان "قىزمەت" ۇيىمىنىڭ بار سەركەلەرى قازاقستانعا اعىلماي ما؟

ەلىمىزدەگى قازاق-تۇرىك ليتسەيلەرىن ساقتاپ قالۋ - وتە دۇرىس شەشىم. قازىر اتاۋى دا، زاتى دا وزگەرگەن ول مەكتەپتەر ساياساتتىڭ قۇرالىنا اينالىپ كەتپەۋى كەرەك. ءبىزدىڭ ايتارىمىز وسى.

كەمەل جانباەۆ

Abai.kz

5 پىكىر