2016 جىلدىڭ قىركۇيەگىندە جامبىل وبلىسى قازاقستان حالقى اسسامبلەياسى جاڭا دوستىق ۇيىنە قونىستانعان بولاتىن. اراعا ءبىر جىل سالىپ، 2017 جىلدىڭ 18 قىركۇيەگىندە تاراز شاھارىنىڭ ورتالىعىنان ورىن تەپكەن ساۋلەتتى عيماراتتى ەلباسى نۇرسۇلتان ءابىشۇلى نازارباەۆتىڭ ءوزى كورىپ، باعاسىن بەردى.

مۇندا پرەزيدەنت وڭىرلىك ەتنومادەني بىرلەستىكتەر جەتەكشىلەرىمەن جانە بەلسەندى مۇشەلەرىمەن كەزدەستى. كەزدەسۋ بارىسىندا ەلباسى قازىرگى تاڭداعى ەڭ وزەكتى تاقىرىپ «بولاشاققا باعدار: رۋحاني جاڭعىرۋ» ماقالاسىنا  توقتالدى.

«قوعامدى رۋحاني جاڭعىرتۋ ماسەلەسى ەشقاشان ءدال قازىرگىدەي وزەكتى بولعان ەمەس. اقپاراتتىق-ساندىق عاسىردا ءبىر ورىندا تۇرۋعا بولمايدى، زامان تالابىنا ساي جاڭاشىلدىقتاردى قابىلداپ، ءوز-ءوزىمىزدى جەتىلدىرىپ، وزگەرىستەرگە دايىن بولۋىمىز كەرەك. جەكە تۇلعا عانا ەمەس، جالپى قوعام باسەكەگە قابىلەتتى بولۋى ءتيىس».

سونىمەن قاتار، ەلباسى قازاقستان حالقى اسسامبلەياسىنىڭ بىرەگەيلىگىن اتاپ ءوتىپ، لاتىن الىپبيىنە كوشۋدى دە تىلگە تيەك ەتتى.

«مەن ۇنەمى ايتىپ جۇرەمىن، قازاقستاننىڭ دامۋى ەلدەگى بىرلىك پەن تۇراقتىلىققا تىكەلەي بايلانىستى. وسى ورايدا لاتىن الىپبيىنە كوشۋ حالقىمىزدىڭ بىرلىگى مەن تاتۋلىعىن ارتتىرا تۇسەتىنىنە سەنىمىم مول».

وسى سوزدەردەن سوڭ، جامبىل وبلىستىق ماحمۇت قاشعاري اتىنداعى ۇيعىر ەتنومادەني بىرلەستىگىنىڭ جەتەكشىسى مۋحابات تۋردىەۆا ءوز پىكىرىن ورتاعا سالدى.

«قازىر ءسىزدىڭ اسسامبلەيا سەسسياسىندا ايتقان ءبىر ءسوزىڭىز ەسىمە ءتۇسىپ تۇر: «ءبارىمىز ءبىر تىلدە – قازاق تىلىندە سويلەسەك، مەن ءوزىمدى باقىتتى پرەزيدەنت دەپ سانار ەدىم» دەگەن ەدىڭىز. سول ءسوزىڭىز مەنىڭ جۇرەگىمە ۇيالاپ، ءارى قاراي قازاق ءتىلىن مەڭگەرۋگە قاناتتاندىردى. مەن ءوزىمنىڭ وتباسىمدا عانا ەمەس، وبلىستا قازاق ءتىلىن مەڭگەرۋگە ناسيحاتتايتىن جۇمىس جۇرگىزىپ، سول ءۇشىن «ءتىل جاناشىرى» توسبەلگىسىمەن دە ماراپاتتالدىم. ال قازىر لاتىن الىپبيىنە كوشۋگە دە دايىنمىن».

وسىدان سوڭ، نۇرسۇلتان ءابىشۇلى اعىمداعى جىلى «كونە تاراز» تاريحي-ارحەولوگيالىق ساياباعىنداعى قازبا جۇمىستار كەزىندە تابىلعان ارحەولوگيالىق ەسكەرتكىشتەردى تاماشالاپ، «العىس اعاشىنا» ىزگى تىلەگىن قالدىردى.

ەرعالي بەرىكۇلى

Abai.kz