قازاقتىڭ بەلگىلى ءانشىسى رامازان ستامعازيەۆ ەلۋگە تولدى. بيىل ءانشىنىڭ ونەر الەمىندە جۇرگەنىنە وتىز جىل بولىپتى. Abai.kz اقپاراتتىق پورتالىنىڭ ءتىلشىسى وسى ايتۋلى مەرەكە قارساڭىندا انشىمەن سىرلاسىپ قايتقان ەدى. 

– قالىڭىز قالاي، رامازان اعا؟

– ازىرگە جامان ەمەس، قاناتجان!

– اعا، ەردىڭ جاسى ەلۋگە كەلگەن كەزىڭىزدە العاشقى ساۋالدى ءسال-ءپال قىتىعىڭىزعا تيۋدەن باستاساق، رەنجىمەيسىز بە؟  

– Abai.kz-ءتىڭ فورماتىندا اڭگىمەلەسپەكسىڭ عوي. قالاعانىڭ سول بولسا، ونى دا كورەيىك. جالپى، سەندەردىڭ (جۋرناليستەردىڭ) ىزدەگەندەرىڭ سول قيتىققا تيۋ ارقىلى ادامنىڭ ىشىندەگىسىن سىرتقا اقتارىپ سالۋ عوي. اڭگىمەنى باستاماي تۇرىپ، ساعان 21 قازان كۇنى «رەسپۋبليكا سارايىندا» بولاتىن "كۇزگى اۋەن" اتتى كونتسەرتىمنىڭ بيلەتىن بەرىپ قويايىن. كونتسەرتكە كەلمەي قالىپ، ورنىڭ كەمپىردىڭ اۋزى سەكىلدى ۇڭىرەيىپ قالماسىن.

– مىندەتتى تۇردە كەلەمىن، اعا. ال ەندى سۇراق قىسقاشا بىلاي: رامازاننىڭ نەگە وزىنەن اسقان شاكىرتى جوق؟

– مەنەن اسىپ تۇسەتىن شاكىرتتەرىم كوپ.

– ەندەشە، ولاردى حالىق نەگە بىلمەيدى؟

– بىلمەيتىن سەبەبى ءداستۇرلى انشىلەرگە ۇكىمەت تاراپىنان قولداۋ جوق. تالانتتى انشىلەردى الدىمەن ەلگە كورسەتۋ كەرەك. ول ءۇشىن ۇلكەن ساحناعا شىعار جول اشىق بولۋى كەرەك، تەلەارنالاردان كونتسەرتتەرىن كورسەتۋ كەرەك. قازىر ساحنانى ارزانقول تەاترلار مەن ءتۇرلى شوۋمەندەر جاۋلاپ الدى. ءسىز ماعان ايتىڭىزشى، قايرات بايبوسىنوۆتان كەيىن قاي ءداستۇرلى ءانشىنىڭ كونتسەرتى تولىعىمەن تەلەارنا ارقىلى قازاقستانعا تارادى؟ بۇگىنگى جۇيەنىڭ ءداستۇرلى ونەرگە دەگەن كوزقاراسى ءتۇزۋ ەمەس. بار كىنانى سول جاقتان ىزدەۋ كەرەك.

– ءسىز ايتقان قايرات اعا دا، ءسىز دە راديوعا ءبىر رەت شىعىپ، بار قازاققا وزدەرىڭىزدىڭ قانداي ءانشى ەكەندىكتەرىڭىزدى تانىتقان جوق پا ەدىڭىزدەر؟ ەندى نە كەدەرگى؟

– باسقاعا جاۋاپ بەرە المايمىن. ءوز باسىم ساياساتتىڭ ءداستۇرلى ونەرگە دەگەن سۋىق كوزقاراسىن ەلدەن بۇرىن بايقادىم. سوندىقتان دا «قوس مەكەندى» انشىگە اينالۋعا شەشىم قابىلدادىم. ەسترادا مەن ءداستۇرلى ونەردى قاتار الىپ، ەلگە تانىلۋعا بولاتىن شىعار دەپ ويلادىم. ەسترادالىق اندەردى ايتا ءجۇرىپ، حالىق اندەرىن سىنالاپ ورتاعا كىرگىزگىم كەلدى. بۇل - ءانشى رەتىندەگى مەنىڭ ۇستانعان ساياساتىم بولاتىن. ءداستۇرلى اندەردەن جاستار جالىعا باستاسا، ەستراداعا كوشە قويامىن. سوسىن اقىرىن تولعاۋلارعا تۇسەمىن. ول دا زەرىكتىرسە، كەيىنگى زامان سازگەرلەرىنە كەزەك كەلەدى. وسىلاي وسى ۋاقىتقا دەيىن پۋبليكانى ساياساتپەن ۇستاپ كەلدىم دەسەم دە بولادى. بىراق، جالاڭ ەستراداعا اۋەس بولماعانىمدى جۇرت جاقسى بىلەدى.

قولىنا دومبىرا ۇستاعان قالىڭ قازاقتىڭ ءبارى رامازان ەمەس قوي. سوندىقتان دا، كەيبىر شاكىرتتەرىمىزدىڭ باعى اشىلماي كەلە جاتقانىن مويىندايمىن.

– ماسەلە، مەملەكەتكە، مەملەكەتتىڭ ساياساتىنا كەلىپ تىرەلەدى دەيسىز عوي.

– ارينە، سولاي. جەڭىل اۋەن، داڭعازا مۋزىكاعا بەرىلگەن ەفيرلەردىڭ سۇراۋى جوقتىعىنا كۇيىنەمىن. بىراق، قازىر سەڭ قوزعالدى. الماتىدا ءداستۇرلى ونەردى ناسيحاتتايتىن تەاتر اشىلدى. بيىل قانشاما جىگىتتەر سوندا جۇمىسقا ورنالاستى. جاستاردىڭ كوزى ەندى اشىلا باستادى. بۇكىل قازاق ونەرىنىڭ باسى سول ورتالىقتا توعىساتىن بولدى. قازاقتار تۇسىرگەن فيلمدەر كورسەتىلىپ جاتىر، بايقاۋلار وتكىزىلىپ جاتىر، قولونەر شەبەرلەرىنىڭ كورمەلەرى ۇيىمداستىرىلىپ جاتىر.

وزبەكستانعا، تۇركىمەنستانعا، قىتايعا، رەسەيگە، كەز-كەلگەن ەلگە بارىڭىز، ەڭ ءبىرىنشى ۇلتتىق ونەرگە كوڭىل بولىنەدى. قىتاي اتام-زامانعى ۇلتتىق تەاترلارىن جىلدا ميللياردتاپ قارجى ءبولىپ ساقتاپ كەلەدى. ۇلتتىق دۇنيەلەرىن قاستەرلەپ، الدىمەن سونىڭ جاعدايىن جاسايدى. ءبىزدىڭ قازاق ونەرى وسىنداي قامقورلىقتى كورمەي كەلەدى. سوندىقتان دا سىزدەر «ستامعازيەۆتەن كەيىن ءداستۇرلى ءان ايتاتىن كىمدەر بار؟» دەپ سۇراپ وتىرسىزدار. مۇنداي سۇراق بولماۋى ءۇشىن دە ۇلتتىق ونەرگە مەملەكەتتىڭ كوزقاراسى تۇزەلۋى كەرەك. ءبىزدى وكشەلەپ كەلە جاتقان جاستار بار. ولاردى كورسەتەتىن، تانىتاتىن مەحانيزم جوق. تەلەارنالارداعى ءبىرلى-جارىم باعدارلاما مەن قازاق راديوسى ول جاستاردىڭ جولىن اشىپ جىبەرەدى دەگەنگە ءوز باسىم سەنبەيمىن.

– بالكىم كىنا حالىقتا شىعار. ءداستۇرلى ءاندى تىڭدايتىن قۇلاق جوق شىعار.

–  بىز جالپى قازاقتى داڭعازا مادەنيەتپەن ۋلاپ تاستادىق. مادەنيەتتىڭ ولشەمىن ەستراداداعى سەلتەڭباي انشىلەرمەن ولشەيتىن بولدى. تەلەديداردى قوسىپ قالساڭ، نە تالعامى، نە تالانتى جوق التى ءانشى جۇرەدى. سول التى انشىدەن باسقانى كورە المايتىن حالىققا دا وبال. جۇرت سولاردىڭ اۋزىنان شىققانىن سىڭىرە بەرگەن سوڭ، دۇباراعا اينالماعاندا قايتەدى. «ەل» پروديۋسەرلىك ورتالىعى جىلدا استاناعا بارىپ، جىرشىلاردى جىرلاتادى. ءبىر داستاننىڭ ءوزىن ەكى-ءۇش كۇن جىرلايتىن ونەرپازدار بار. قانشاما كۇيشىلىك مەكتەپتەر بار. سونىڭ ءبارىن ناسيحاتتاي الماي وتىرمىز. يدەولوگيا جوق. قانشاما جاقۇتتارىمىز توتتانىپ جاتىر. جاقسى دۇنيەلەردى جازىپ الىپ، ساقتاپ قويۋ، كەيىنگى ۇرپاققا اماناتتاۋ جوق. ءبىزدىڭ ماڭدايالدى ونەر قايراتكەرلەرى "ۇيەلەپ" ۇيلەرىندە جاتىر. نە مەملەكەتكە، نە قوعامعا قاجەتى جوق، ولاردىڭ...

– بۇل ءولىارا كەزەڭ قانشا ۋاقىتقا سوزىلادى دەپ ويلايسىز؟

– بىلمەيمىن. مەنىڭشە ۇلتتىق ونەرگە ۇلكەن رەفورما جاساۋ كەرەك. قازىر تانىمالدىققا يە بولۋعا الەۋمەتتىك جەلىلەردىڭ سەپتىگى ءتيىپ جاتىر. حالىق قانداي ءانشى بار ەكەنىن بىلە باستادى. داۋىسى جاقسى انشىلەردى ەل ىزدەي باستادى.

– باستاپقى سۇراققا قايتا ورالعىم كەلىپ وتىر. ستامعازيەۆ وزىنەن كەيىنگى شاكىرتتەرىن ستامعازيەۆتىڭ كوشىرمەسى جاساپ جىبەردى دەپ جاتادى. بۇعان نە دەيسىز؟

– ول زاڭدىلىق! مەن دە ءبىر كەزدەرى قايرات بايبوسىنوۆتىڭ كوشىرمەسى بولعانمىن.

"رامازاننىڭ قايرات بايبوسىنوۆتىڭ كوشىرمەسى بولعان كەزى"

– ونداي كوشىرمەلىك ونەردى ورگە جۇزگىزبەيدى ەمەس پە؟

– كوشىرمە بولعىسى كەلمەگەن ءانشى قالىپتى بۇزىپ شىعادى. مىسالى، مەن قايراتتىڭ كوشىرمەسى بولىپ قالعان جوقپىن عوي. ون جىل بويى قايرات اعانىڭ كوشىرمەسى بولىپ ءجۇردىم. دومبىرانى قاعىسىن، داۋىس ىرعاعىنا دەيىن اينىتپاي سالاتىنمىن. ساحناداعى ءجۇرىسى، تۇرىسى، كيگەن كيىمى، ۇكى تاعۋى ءبارىن-ءبارىن كوشىردىم. اۋىل-اۋىلدى ارالاپ ءان تاۋىپ الامىن. «قايرات اعاڭ سياقتى ايتادى ەكەنسىڭ» دەگەن ءار سوزگە قۋاناتىنمىن. وسىلاي ەلىكتەۋ ارقىلى وزىمدە بار كەمشىلىكتى جويىپ، جاقسى سيپاتتاردى بويىما ءسىڭىردىم. ءبىر كۇنى قايرات اعام: «سەن كوپيا بولىپ جۇرە بەرەسىڭ بە؟ كوپيا بولعانىڭمەن قايرات بولا المايسىڭ. ەندى ەكى ارانى كەسسەڭشى. سەنى رامازان ەتەتىن نەڭ بار؟» دەدى. مەن سونان كەيىن باسقاشا ىزدەنۋ جولىنا ءتۇستىم. قايرات اعانى «تيىپ» تاستاپ، جانىبەك كارمەنوۆتى، جۇسىپبەك ەلەبەكوۆتى نىساناعا الا باستادىم. ماناربەك ەرجانوۆ، قالي بايجانوۆ، بايعابىل جىلقىباەۆ، قوسىمجان باباقوۆ، كەنەن ازىرباەۆتاردى تىڭداپ، سولارعا ەلىكتەۋدى باستادىم. ءسويتىپ ءجۇرىپ، قايرات اعا سالعان ۇلكەن جولدان دارالانىپ، ءوز سوقپاعىما ءتۇستىم.

– قايرات اعا ءسىزدى تۋرا جولعا سالىپتى. ءسىز نەگە شاكىرتتەرىڭىزگە رامازان بولا المايتىنىن ايتپايسىز؟

– مەن ىلعي دا ولارعا قايرات اعاداي جول كورسەتىپ كەلەمىن. قانشا ايتقانمەن شاكىرت ۇستازعا ەلىكتەيدى ەكەن. ولاردىڭ دا مەنى بۇزىپ-جارىپ شىعار كۇنى بولارىنا سەنگىم كەلەدى.

– شاكىرتتەرىڭىزدىڭ بويىنان قانداي قاسيەت كورە الماي ءجۇرسىز؟

– ءبىزدىڭ كەزىمىزدە ءان ۇيرەنۋ وتە قيىن بولاتىن. قۇلاعىمىز ىلعي راديوعا تۇرىك جۇرەتىن. قايرات بايبوسىنوۆ اعامىزدىڭ اۋزىنا قاراپ وتىراتىنبىز. ءار ايتقان ءانىن سول مەزەتتە جاتتاپ الاتىنبىز. دومبىرانى تارتقاندا ءتورت شاكىرتى ءتورت جاعىنان قاراپ وتىراتىنبىز. «سەن ساعانى، سەن ورتانى، سەن باس جاعىن قاراپ وتىر» دەپ ءبىر-بىرىمىزگە تاپسىرىپ، ساباق بىتكەن سوڭ، سونىڭ ءبارىن قۇراپ، ءاندى ۇيرەنەتىن ەدىك. جالعىز ماگنيتافونمەن جالعىز كاسسەتاعا جازىپ العان ءاندى ون-ون بەس رەت قويعاننان كەيىن داۋىس سىزىلا باستايدى. سوندا دا سول جازىلعان ءاندى كوزدىڭ قاراشىعىنداي ساقتاۋشى ەدىك. ەستىگەن ءار اۋەندى دەر كەزىندە تەز-تەز ميعا توقىپ الاتىن ەدىك. انگە سونشالىق قۇمار، سونشالىق اشقۇرساق ەدىك. جانىبەك كارمەنوۆ اعانى ءبىر تىڭداپ، قايرات اعانى ەكى تىڭداپ، ءان ۇيرەنۋگە جانتالاساتىنبىز. سونىڭ ارقاسى بولار، بىزبەن وقىعان جىگىتتەردىڭ ءبارى قازىر ونەر سالاسىنان الىس كەتكەن جوق.  ال، قازىر ءبارى باسقاشا. قازاقتىڭ مىڭ ءانى مەن مىڭ كۇيى جازىلعان انتولوگيا بار. ينتەرنەتتى اشساڭ، ءان تولىپ تۇر. حرەستوماتيا دەيسىڭ بە، باسقا دەيسىڭ بە، كىتاپتان كوپ دۇنيە جوق. الدىڭدا اس تولىپ تۇرسا، تابەتىڭ قاشىپ نە جەرىڭدى بىلمەي قالاسىڭ عوي. ءبىزدىڭ شاكىرتتەردە سونداي توقتىق بار. اۋزىنا شايناپ بەرىپ، يەگىن قوزعاپ، جۇتقىزىپ جىبەرمەسەڭ، ءاندى بويىنا سىڭىرە المايدى.

مەن شاكىرتتەرىمدى ىلعي دا تەاترلارعا جىبەرەمىن. ارتىستەر 4-5 مينۋتتىڭ ىشىندە كۇلدىرىپ تە، جىلاتىپ تا ۇلگەرەدى. ءداستۇرلى انشىگە اكتەرلىك شەبەرلىك مىندەتتى تۇردە كەرەك. سولاردىڭ شەبەرلىگىن ۇيرەنسە دەيمىن. اكادەميادا اكتەرلىك شەبەرلىك دەگەن ارنايى ساباق وتەمىز. سول وقىعاندارىن، تەاترعا بارىپ پراكتيكادا كورسىن دەيمىن.

ءار بالانىڭ تابيعاتى بولەك. ارقايسىمەن جەكە جۇمىس جاسايمىن. ءبىر بالا انگە مىقتى بولسا، دومبىراعا جوق بولادى. دومبىراعا قولىن جۇگىرتۋ ءۇشىن از تەر توكپەيمىز. ەندى ءبىرىنىڭ ءتىل تازالىعىمەن جۇمىس ىستەۋگە تۋرا كەلەدى. كەيبىر ارىپتەردى دۇرىس ايتقىزۋ ءۇشىن ارنايى ءدارىس الۋلارىنا تۋرا كەلەدى. ءبىر شاكىرتتى 5 جىل دەگەندە ارەڭ قاشاپ شىعاسىز. 10 شاكىرتتىڭ ەكەۋى ءانشى بولىپ شىقسا، سونىڭ ءوزى جەتىستىك. 100 شاكىرت وقۋ بىتىرسە، ونىڭ بارىنە ساحنا دايىن تۇرعان جوق. قالعاندارى ونەرتانۋشى رەتىندە عىلىممەن اينالىسىپ، قازاقتىڭ جوعىن جوقتاپ جۇرەدى. ەندى بىرەۋلەرى ۇستازدىق ەتۋدى تاڭدايدى.

مەن شاكىرتتەرىمە اۋىلعا، تۋعان جەرىنە بارۋلارىنا كەڭەس بەرەمىن. ماسەلەن، قىتايدان كەلگەن امان اۋباكىرۇلى دەگەن جىگىت تۋعان جەرىنە بارىپ، كۇيتىڭ دەگەن قالادا ءوز مەكتەبىن اشتى. قازىر سول جەردە ەكى جۇزدەن استام بالا ءداستۇرلى انشىلىك ونەردى ۇيرەنىپ جاتىر. ءتىپتى، قازىر سول شاكىرتىمنىڭ شاكىرتتەرى مەنىڭ الدىمدا وتىر. قىتايدان، موڭعوليادان جىلت ەتكەن ءبىر بالا كورىنسە، سونىڭ جولىن اشۋعا تىرىسامىن.

– ەل اراسىنا بارىپ ءان جيناۋ ماسەلەسى قولعا الىنباي كەلەدى.

– تەمىربەك جۇرگەنوۆ اتىنداعى قازاق ۇلتتىق ونەر اكادەمياسى ء"داستۇرلى مۋزىكالىق ونەر" كافەدراسى ەكى جىل قاتارىنان موڭعولياعا ەكسپەديتسيا ۇيىمداستىردى. قورجىندارى توق كەلدى. كافەدرانىڭ جانىنان قۇرىلعان لابوراتوريامىز بار. سوندا نوتاعا ءتۇسىرىپ، زەرتتەپ، كىتاپ ەتىپ شىعارىپ قويدىق. ال، جەكەلەگەن انشىلەر وزدەرى ءۇشىن ەل ارالاپ، قازاقتىڭ جاۋھارلارىن جيناپ جۇرەتىنىن ەلدىڭ ءبارى بىلەدى. ال، مەملەكەت تاراپىنان ەكسپەديتسيالار ۇيىمداستىرىلىپ جاتىر دەگەندى ەستىگەن ەمەسپىن.

– ونەردە جۇرگەنىڭىزگە وتىز جىل بولدى. وتىز جىلدا نە ءبىتىردىڭىز؟

– تۇك تە بىتىرگەن جوقپىن. قازاقتىڭ ءانىن ايتتىم.

تۇرسىنجان شاپاي مەن رامازان ستامعازيەۆ

– ءسىزدى رامازان ەتكەن تۇرسىنجان شاپايدىڭ اندەرى دەگەن پىكىرلەردى ەستيمىز.

–  مۇمكىن. بىراق، ءبىر عانا انمەن تانىمال بولدىم دەي المايمىن. تۇرسىنجان اعانىڭ «داريعا-داۋرەن»، «ارمان» سەكىلدى اندەرى مەنى قازاققا تانىتقانىن ەشكىم جوققا شىعارمايدى. رامازان دەسە – «داريعا-داۋرەن»، «داريعا-داۋرەن» دەسە – رامازان ەسكە تۇسەدى» دەپ جاتادى. بۇل ءان – مەنىڭ باعىما بايلانعان ءان. مەنىڭ باعىمدى وسى ءان اشتى، ەكىنشى جاعىنان ءاننىڭ دە باعىن مەن اشقان بولۋىم كەرەك. «داريعا-داۋرەندى» قابىلدامايتىن ورتاعا، «ارمان» كەرەك. بىرەۋلەردىڭ جانىنا «ساۋلە عۇمىر» جاقىن. «اي-ساۋلەمدى تىڭداپ، دەرتىمنەن ايىقتىم» دەگەندەر دە بولعان.  جالپى، تۇرسىنجان شاپاي ەكەۋمىزدىڭ شىعارماشىلىق وداعىمىز حالىققا بەرەرىن تولىق بەرىپ بولدى دەپ ويلايمىن.

– تۇرسىنجان شاپايداي سازگەرگە ءسىزدى جاقىنداتقان قانداي كۇش؟

– قازاقى ءۇن، مۋزىكاداعى قازاقى بوياۋ مەنى تۇرسىنجان اندەرىنە بايلاپ قويدى. ءوزىنىڭ ايتۋىنا قاراعاندا ول كىسىنىڭ اكەسى دە مىقتى ورىنداۋشى بولعانعا ۇقسايدى. «اعا، مۇنداي اۋەننىڭ ءبارىن بويىڭىزعا قالاي ءسىڭىردىڭىز؟» دەگەنىمدە اكەسىنەن كوپ دۇنيە ۇيرەنگەنىن ايتىپ ەدى. اكەي جادى مىقتى، ابايدى جاتقا بىلەتىن كىسى بولىپتى. اعامىز سول كىسىنى تىڭداپ ءجۇرىپ، سازگەر تۇرسىنجان شاپايعا اينالدى. اندەرىندەگى قازاقى بوياۋدىڭ تامىرى قانىندا، تەگىندە جاتىر دەپ ويلايمىن.

ءبىر كەزدەرى «ابايدى ساعىنۋ» دەگەن تسيكلدى فيلم تۇسىرمەك بولعاندا، تۇرسىنجان اعا ابايدىڭ جەتى ولەڭىنە ءان جازدى. اباي سوزىنە ءان جازۋ ءۇشىن ابايدى تولىق تانۋ كەرەك. سىدىق مۇحامەدجانوۆ پەن ءابىلاحات ەسباەۆتان كەيىن ابايدى تانىپ-ءبىلىپ، ونىڭ سوزىنە ءان جازعان ءبىر ادام بار بولسا، ول – تۇرسىنجان اعامىز دەپ بىلەمىن. مەن سول جەتى ءاندى دە ءبىر ەستىگەننەن-اق عاشىق بولىپ، اتتاي قالاپ قورجىنىما سالىپ الدىم. ەندى وسى اندەردىڭ ءتورت-بەسەۋىنىڭ باسىن قوسىپ، بەينەبايان تۇسىرگىم كەلەدى.

– ونەرپازدىڭ ارتىنان اڭىز ەرە جۇرەتىنى بار. ءسىزدىڭ ارتىڭىزدان ەرگەن اڭىزدار جايلى ايتىپ بەرسەڭىز.

– اڭىزدى قايتەسىڭ. ومىردە بولعان ءبىر وقيعانى ايتىپ بەرەيىن. بىردە ماعان اپپاق ساقالدى، ىقشام سپورتتىق كيىم كيگەن، قولىندا تاسپيىعى بار ءبىر جىگىت-اعاسى كەلدى. تۇرمەدە جەتى جىلىن وتكەرىپ ورالىپتى. «اباقتىدان شىققانىما ءبىر اپتا عانا بولدى. تۇرمەدەگى بەس ءجۇز جىگىتتىڭ اتىنان سىيلىق اكەلىپ ەدىم» دەدى. ءسويتتى دە، قولدان جاسالعان پىشاق تارتۋ ەتتى. «مۇنداي سىيلىق الاتىنداي نە ىستەپ قويدىم؟» دەپ ەدىم: «سەنىڭ ورىنداۋىڭداعى تۇرسىنجان شاپايدىڭ اندەرىن تىڭداعاندا قاپاستاعى رۋحىمىز ازات بولىپ، تاستان ورىلگەن ءتورت قابىرعا كەڭىپ سالا بەرەتىن. «ۆوليانىڭ» ءدامىن سەنىڭ انىڭنەن تاتقانداي بولدىق. سەنىڭ اندەرىڭدى تىڭداعان كەزدە جانىم «ۆوليادا» جۇرگەندەي بولاتىن. سول ءبىر ءساتتى سەزىمدى باستان كەشۋ ءۇشىن ءبىز بارلىعىمىز «داريعا-داۋرەندى»، «ارماندى» تىڭدايتىن ەدىك. بىرىنشىدەن، اللانىڭ، ەكىنشىدەن، وسى اندەردىڭ ارقاسىندا رۋحاني ەركىندىك دەگەننىڭ قانداي بولاتىنىن بىلدىك. سول ءۇشىن راحمەت ايتۋعا كەلدىم» دەدى.

– تاسپيىق ۇستاعان ءدىندار ادامنىڭ بۇل قىلىعى تاڭدانۋعا تۇرارلىق ەكەن. ال، ءسىزدىڭ كەيبىر ارىپتەستەرىڭىز ۇلتتىق ونەردى ىسىرىپ قويىپ، تاقۋا ءدىندار، ميسسيونەر بولىپ كەتكەن جوق پا قازىر؟

– تاڭداعان جولى سول بولسا، جانىنا ميسسيونەرلىك جاقىن بولسا، سولاي ءومىر سۇرگىسى كەلسە،  وزدەرى ءبىلسىن. ءدىن مەن ونەردى شاتاستىرىپ، بويىڭدا بار ونەردى باسقا ماقساتقا پايدالانۋ دەگەندى ءوز باسىم تۇسىنە المايمىن. قايرات اعا: «سەندەر وزدەرىڭنىڭ وڭ جامباستارىڭا كەلەتىن ءان ىزدەڭدەر. كەيىن ءان سەندەردى ءوزى ىزدەپ تاۋىپ الادى» دەيتىن. سول ءسوز شىندىق ەكەن. قازىر كوپ سازگەرلەر وزدەرى كەلىپ، اندەرىن ۇسىنىپ جاتادى. ءانىمدى ايت، تويىڭدى دۇركىرەتىپ وتكىزىپ بەرەمىن، بۇكىل جاعدايىڭدى جاسايمىن» دەگەن سياقتى ۋادەلەرىن ءۇيىپ توگەدى. مەن دۇنيە ءۇشىن ونداي ورتاڭقول اندەرگە ساتىلعان ەمەسپىن. وسىدان-اق، قولىمنان ونەردى ءدىن، ساياسات جولىندا ساۋدالاۋ كەلمەيتىنىن تۇسىنەرسىز دەپ ويلايمىن.

– اڭگىمەڭىزگە راحمەت

سۇحباتتاسقان قانات ابىلقايىر

سۋرەتتە: قانات ابىلقايىر، رامازان ستامعازيەۆ، قانات تىلەۋحان

Abai.kz