الماتى وبلىسىندا جاڭا اۋدان قۇرىلادى. ول - نارىنقول اۋدانى. الماتى وبلىسىنىڭ اكىمى اماندىق باتالوۆ مىرزا بۇگىن ورتالىق كوممۋنيكاتسيالار قىزمەتىندە ءباسپاسوز جيىنىن وتكىزدى. ءدال سول جيىندا وسى ءبىر جاڭالىقتى جاريا ەتتى.

"وبلىسىمىزدا جاڭا اۋدان قۇرىلاتىنىن قۋانا ايتامىز. ەندى ۇكىمەتتىڭ قاۋلىسى مەن پرەزيدەنتتىڭ شەشىمى شىقسا، اتالعان جاڭالىقتى حالىققا جەتكىزەمىز. ءبىز جۇمىسشى توپپەن نارىنقول اكىمشىلىك اۋدانىنا باردىق. ول جەردەگى جاستاردىڭ دەنى اۋىلدان كەتىپ جاتقانىن، الماتىنىڭ اينالاسىندا جۇمىس جاساپ جۇرگەنىن كوزىمىزبەن كوردىك. ءسويتىپ، نارىنقول اۋدانىن قۇرۋ تۋرالى ۇسىنىس جاسادىق. شەكاراسىن ءبولىپ كورسەتەمىز. قازىر پروتسەدۋرالىق جۇمىستار قالدى. سوسىن شەشىم قابىلدانادى. ول ءۇشىن ارنايى كوميسسيا قۇرىلىپ، نارىنقولداعى مۋنيتسيپالدىق عيماراتتاردىڭ جاعدايىن انىقتايدى. كەلەر جىلدىڭ بيۋدجەتىنە كىرگىزىلەدى دەپ جوسپارلاپ وتىرمىز", - دەدى اماندىق باتالوۆ مىرزا.

ەستەرىڭىزدە بولسا، 2017 جىلدىڭ 10-تامىزى كۇنى  الماتى وبلىستىق ءماسليحاتىندا وسى ماسەلە تالقىلانىپ، ۇكىمەتكە ۇسىنىس جاسالعان بولاتىن. جاڭا اۋداننىڭ جالپى اۋماعى - 711 937 گەكتار جەردى قۇرايدى. رەسپۋبليكالىق ونوماستيكالىق كوميسسيا جاڭا اۋدانعا "نارىنقول" اتاۋىن بەرۋدى ۇسىندى.

Abai.kz