وزبەكستاننىڭ تاۋەلسىز ادام قۇقىعىن قورعاۋشىلارىنىڭ باستاماشىل توبىنىڭ باسشىسى سۋرات يكراموۆتىڭ حابارلاۋىنشا، ميليتسيا قىزمەتكەرلەرىنىڭ ۇيلەرىندە ءتىنتۋ جۇرگىزگەنىن ايتىپ، ءبىر توپ ايەل شاعىمدانعان. ولار حاتتامالاردىڭ كوشىرمەسىن بەرمەستەن، ادامداردى ۇستاپ اكەتكەن. ىشكى ىستەر قىزمەتكەرلەرىنىڭ بارلىعى قاراپايىم كيىممەن كەلگەن.

شاعىمدانعان ايەلدەردىڭ ءبىرى تەرگەۋدە بولعانىن، ودان 2008 جىلدان بەرى ىزدەۋدە جۇرگەن تۋىسى تۋرالى سۇراعانىن ايتتى.

ۇيىندە ءتىنتۋ جۇرگىزىلگەن تاعى ءبىر ايەل ميليتسيا قىزمەتكەرلەرى 23 جاستاعى ۇلى ناسرۋللوحتى ىشكى ىستەر دەپارتامەنتىندە سوققىعا جىققانىن حابارلادى. ايەلدىڭ كۇيەۋى 2001 جىلدان بەرى ءدىني كوزقاراسى ءۇشىن تۇرمەدە وتىر. ءدال وسىنداي ايىپپەن سوتتالعان ونىڭ اعاسى تۇرمەدە ازاپتاۋلار سالدارىنان قايتىس بولعان.

سۋرات يكراموۆتىڭ حابارلاۋىنشا، ۇلتتىق قاۋىپسىزدىك قىزمەتىنىڭ "قارا تىزىمىندەگى" ءدىندار ادامداردىڭ تۋىستارىن ۇستاۋ جالعاسىپ جاتىر.

Abai.kz