بۇعان دەيىن قوستانايعا قاراي وڭتۇستىك وڭىردەن كوش قوزعالعانىن جازعانبىز. ونىڭ بىردەن جاپپاي سيپات الۋى وڭاي ەمەس، ارينە. الايدا قازىردىڭ وزىندە وسىندا 30 وتباسى ات باسىن تىرەدى. بۇلار نەگىزىنەن وبلىسىمىزدىڭ وڭتۇستىك ءوڭىرى بولىپ سانالاتىن اۋليەكول جانە جىتىقارا سەكىلدى اۋداندارىنا ورنالاستىرىلدى. ال قارابالىق، فەدوروۆ ءتارىزدى سولتۇستىك تۇستارى ازىرگە يگەرىلمەي جاتىر. دەگەنمەن مۇندا دا يگى وزگەرىستىڭ نىشانى بايقالادى.

وتكەن جىلدىڭ سوڭىنا تامان تۇرعىندارى تۇگەلگە دەرلىك باسقا ۇلتتار قۇرايتىن فەدوروۆ اۋدانىنىڭ كوسترياكوۆ اتتى شارۋاشىلىعىنا شىرايلى شىمكەنت قالاسىنان ءبىر جاس وتباسى كوشىپ كەلدى. بۇل ساپارعا قايرات ورازوۆ پەن جۇلدىز سەيدۋللا اتتى تەپسە تەمىر ۇزەتىن جاستاعى جاس جۇبايلار تاۋەكەل ەتىپتى. ولار شىمكەنتتەن شىعاردا قازان ايىندا كۇن وتىز گرادۋس ىستىق بولسا، مۇندا ولاردى قىستىڭ قارا سۋىعى مەن بورانى قارسى الدى.

– ءبىزدىڭ جاقتا قىس بولمايدى عوي. سۋىعى ارى كەتسە، مىنا قازىرگى سىزدەردەگىدەي، تەك ىلعالى باسىم. سوندىقتان سۋىقتاۋ كورىنەدى. ال بۇل جاقتا قىس تۇسكەندە 30 گرادۋس ايازعا دەيىن باراتىن كورىنەدى. الايدا ءبىز وعان ساقاداي-ساي دايىنبىز. ازىرلىگىمىز ويداعىداي، – دەيدى قايرات سەنىمدى تۇردە.

مىنەكەي سولتۇستىككە قاراي كوشۋگە بەل بۋعان ازاماتتىڭ قانداي دا قيىندىققا تاس ءتۇيىن دايىندىعى ءبىزدى دە ءتانتى ەتتى.

قايرات پەن جۇلدىز تولعاناي مەن التىناي اتتى ەگىز قىز بالانى تاربيەلەپ، ءوسىرىپ وتىر. شىمكەنتتە ولار اتا-انالارىنىڭ قولىندا تۇرىپتى. تۇراقتى جۇمىس تابىلا قويماعان. پاتەر ماسەلەسى دە شەشىلۋى دە ەكىتالاي دۇنيەگە اينالعان. سوسىن وسى جاققا بەت الۋعا بەل بۋىپتى. مۇنداعى تۇرمىس جاعدايلارىنا ريزا. العان ۇيلەرى ورتالىق جىلۋ جۇيەسىنە قوسىلعان. جۇلدىز مۇندا فەلدشەر بولىپ ورنالاستى. تۇرعىندار دا ريزا. بۇرىنعى مامان وسىدان ءبىر جىل بۇرىن وزگە جاققا كەتىپ قالىپ، تۇرعىندار وعان زارىعىپ وتىرعان-دى. قايرات بولسا وسىنداعى جاۋاپكەرشىلىگى شەكتەۋلى سەرىكتەستىككە جۇرگىزۋشى بولىپ  قابىلداندى. قىزدارى وسىنداعى بالا-باقشا قابىلداعان.

فەدوروۆ اۋدانىنا كوشىپ كەلگەن وسى جالعىز وتباسى الداعى تىرشىلىككە مۇقيات دايىندالۋدا. ەندى سيىر ساتىپ الىپ، جەكە شارۋاشىلىعىن دا دوڭگەلەتپەك. اماندىق بولسا، كوشىمىز دە مولايىپ، قايراتتاردىڭ دا قاتارى كوبەيمەك. ويتكەنى بيىلعى جىلدان باستاپ، بەس جىل ىشىندە وبلىسىمىزعا 10 مىڭ وتباسى قونىس اۋداراتىن بولادى. قوستانايدى بەتكە الىپ، كوشىڭدى تۇزە، قازاق بالاسى!

جايبەرگەن بولاتوۆ

Abai.kz