XXIII قىسقى وليمپيادالىق ويىنداردىڭ اشىلۋ سالتاناتى ءدال قازىر وڭتۇستىك كورەيدىڭ پحەنچان قالاسىندا ءوتىپ جاتىر. وسى ۋاقىتتا اق وليمپيادانىڭ باستى قاھارماندارى - 92 مەملەكەتتەن كەلگەن 3000 سپورتشى سالتاناتتى شەرۋدى ءجۇرىپ ءوتتى.

بۇل جولعى وليمپيادانىڭ ءباسى بۇرىنعىدان  وزگەرەك بولماق. ولاي دەيتىنىمىز، رەسەيدەن بارعان سپورتشىلار تۋسىز شىقتى. حالىقارالىق وليمپيادا كوميتەتىنىڭ شەشىمى سولاي بولدى. ءتىپتى، داۋدىڭ قىزىپ تۇرعان شاعىندا رەسەي قۇراماسى وليمپيادادان مۇلدە شەتتەتىلەدى دەگەن ءسوز بولعان. كەيىن، دوپينگ سىناماسىنان تازا شىققان سپورتشىلاردى وليمپيادا بايراعىنىڭ استىندا جارىسقا جىبەرۋ تۋرالى شەشىم قابىلداندى.

بۇل بۇل ما، وليمپيادا  ەكى جۇيەگە بولىنگەن ەكى كورەي رەسپۋبليكاسىنىڭ كوماندالارى بىرىگىپ شىقتى. ءبىر تۋدىڭ استىندا شەرۋلەتىپ ءوتتى. ءتىپتى، تريبۋنادا تۇرعان قوس مەملەكەتتىڭ باسشىلارى ءبىر-ءبىرىن قۇتتىقتاپ، جىلى لەبىزدەرىن ءبىلدىرىپ جاتتى.

وتكەن جولى سولتۇستىك كورەيا قۇراماسى پحەنچانعا كەلگەنى تۋرالى حابار الەمدىك باق-تى شارلادى. سولتۇستىك كورەيادان ۇزىن-ىرعاسى 280 ادام كەلگەن. ونىڭ 200-گە جۋىعى جانكۇيەرلەر.  بۇل دەلەگاتسيانىڭ قۇرامىندا 26 تاەكۆونديست پەن 21 جۋرناليست جانە 4 شەنەۋنىك بار. بۇگىن ەكى كورەي ەلى ءبىر تۋدىڭ استىندا بولدى.

بۇل جولعى وليمپيادادا ەكى كورەي ءبىر حوككەي قۇراماسىن جاساقتاپ شىقتى. ايەلدەر اراسىنداعى حوككەي دوداسىندا ءبىر قۇراما جاساقتادى. ونىڭ قۇرامىندا سولتۇستىك كورەيدىڭ 12, وڭتۇستىك كورەيدىڭ 23 سپورتشىسى ەنگەن. كوماندانىڭ اتى - "كورەي".

ءانۇران رەتىندە ەكى كورەيگە ورتاق "اريران" ۇلتتىق ءانى ورىندالادى.

تاعى ءبىر داۋلى ماسەلە - اق وليمپيادانى ۇيىمدستىرۋشىلار جەڭىمپازدار مەن قاتىسۋشى سپورتشىلارعا  كادە-سىي رەتىندە ۇسىنىلاتىن ەڭ سوڭعى نۇسقاداعى "ساۋمسۋنگ" سمارتفونىن رەسەي مەن يران سپورتشىلارىنا بەرۋدەن باس تارتقان. سەبەبى، بۇل مەملەكەتتەرگە قازىر باتىس سانكتسياسى سالىنعان.

بۇل جولعى اق وليمپيادادان قازاقستان سپورتشىلارىنان جەڭىس كۇتەمىز. بۇگىنگى سالتاناتتى شەرۋدە قازاقستان قۇراماسىن شورت-ترەكشى ابزال اجىعاليەۆ باستاپ شىقتى. جالپى 46 سپورتشىمىز دوداعا قاتىسادى.

ءبىز الداعى ۋاقتا كورەيدەگى سپورت دوداسىنان جاڭالىقتاردى ۇزبەي جاريالاپ وتىراتىن بولامىز.

Abai.kz