بۇگىن ماسكەۋ تۇبىندە "ساراتوۆ اۋە جولدارى" كومپانياسىنىڭ جولاۋشى ۇشاعى قۇلاپ، 71 ادامنىڭ قازا تاپقانى حابارلاندى. ان-148 ۇشاعى "دومودەدوۆو" اۋەجايىنان ورسك باعىتىنا ۇشىپ شىعار كەزدە اپاتقا ۇشىراعان. اپات تۋرالى مالىمەتتەر انىقتالىپ جاتىر. بورتتاعى 65 ادام - جولاۋشى، قالعان التى ادامنىڭ ەكيپاج مۇشەسى ەكەنى حابارلاندى. جولاۋشىلار ءتىزىمى بىردەن جاريالانباعانىمەن، ولاردىڭ دەنى ورىنبور وبلىسىنان ەكەندىگى ايتىلادى.

ۇشاق قالدىعى ماسكەۋ تۇبىندەگى رامەنسك اۋدانىندا تابىلىپ، قازىر 150 شامالى قۇتقارۋشى ىزدەستىرۋ جۇمىسىنا تارتىلعان. اپات ورنىنان 50 ادامنىڭ ءمايىت قالدىعى تابىلىپ وتىر. ۇشاق قالدىعى ءبىر كيلومەتر بويىندا شاشىلىپ جاتقانى حابارلانعان.

رەسەي تەلەرنالارىنىڭ مالىمەتىنە قاراعاندا، قۇلاعان ۇشاق 2010 جىلى شىعارىلعان. اپات بولعان جەردەگى قالىڭ قار ىزدەستىرۋ جۇمىسىنا كەدەرگى كەلتىرىپ، قار تازالانا باستاعان.

ەل پرەزيدەنتى ۆلاديمير پۋتين مەن ماسكەۋ مەرى سەرگەي سوبيانين قازا تاپقانداردىڭ جاقىندارى مەن تۋىستارىنا قايعىرىپ كوڭىل ايتاتىنىن جاريالادى.

Abai.kz