اۋىلداعىلار قوراسىنداعى ازىن-اۋلاق مالىنىڭ ارقاسىندا كۇن كورىپ وتىر. «مالىم جانىمنىڭ ساداعاسى» دەيتىن ناعىز قازاقتار سولار. بىراق جىلى كابينەتتە وتىرعاندار ونى قايدان ءتۇسىنسىن.

كەشە ويىل اۋدانىنداعى برۋتسەللەزگە شالدىققان ءىرى قارانىڭ ەتكە ارزانعا ءوتىپ جاتقانىن ايتتىق. بىراق اكىمدىككە وسى ماسەلەنى تالقىلاۋعا جينالعان شەنەۋنىكتەر «برۋتسەللەز بۇرىنان كەلە جاتقان ىندەت. سونشاما دۇرلىگىپ نە كەرەك؟» دەيدى. نەگە سولار وسى ىندەتتى جوق قىلۋعا قام قىلمايدى؟ مۇنداي سۇراق قويساڭ، كەرسىنشە اۋىل تۇرعىندارىن جازعىرادى. كىم ءوز مالىنان ايرىلعىسى كەلەدى؟ نەگە حالىقپەن ءجوندى جۇمىس ىستەپ، ەتكە وتكەن مالىنىڭ ورنىنا اۋىلداعىلارعا ساۋ مال الىپ بەرمەسكە؟ قازىر برۋتسەللەزبەن اۋىرعان مال ءۇشىن مەملەكەتتەن 30 پايىز وتەماقى بەرەدى ەكەن. ونىڭ اقشاسى مال سالماعىنا بايلانىستى ەسەپتەلەدى. اقپاندا مالدىڭ ارىقتاپ، كۇيى بولمايتىنىن جاۋاپتى ادامدار بىلمەي مە؟ تايوگىزدى ەتكە وتكىزىپ، وتەماقى العان كۇننىڭ وزىندە اقشاسى باسپاق الۋعا جەتپەيدى. حالىق شۋلاماي قايتەدى؟

كەشە ويىل اۋدانىنداعى قاراتال اۋىلىنىڭ تۇرعىندارى ءبىر كۇندە 78 باس ءىرى قاراسىنان ايرىلدى. اشۋلانعان حالىققا باسۋ ايتۋدىڭ ورنىنا اۋىل اكىمى قۇندىز تونىن كيىپ، كولبەڭدەپ ءوز شارۋاسىمەن ءجۇر. اۋدان اكىمى بۇلبۇل كۇزەمباەۆا قاراتالدا برۋتسەللەزگە قاتىستى سحود بولعانىن ايتتى. سحود دەگەن تۇرعىنداردى كلۋبقا جيناپ الىپ، بايانداما وقۋ. ول بولمايدى. نەگە ءۇيدى-ءۇيدى ارالاپ تۇسىندىرمەيدى؟

بىلتىر كوكتەمدە مۇعالجار اۋدانىنىڭ بىرلىك اۋىلىنا باردىق. ونداعىلاردان برۋتسەللەز جۇقتىرعان ەشكىنى 900 تەڭگەگە، شىبىشتى 500 تەڭگەگە، قويدى 5-6 مىڭ تەڭگەگە ەتكە العان. بۇل اقشاعا ۇساق مال تۇرماق قۇستىڭ بالاپانى دا كەلمەيدى.

مارتوك اۋدانىندا «قازاقستاننىڭ 13 جىلدىعى» دەگەن اۋىل بار. ونداعىلاردىڭ دا مالىنان جاپپاي برۋتسەللەز تابىلدى. ال جايىلىمى ءبىر بولسا دا، كورشى جاتقان كاسىپكەردىڭ قوجالىعىنىڭ مالى ساپ-ساۋ بولىپ شىقتى.

وسى برۋتسەللەز اۋىلداردى جاپپاي جويۋ ءۇشىن ادەيى تاراتىن كەسەل ەمەس پە ەكەن دەپ ويلايمىن. سەبەبى، اكىمدەردىڭ ەشقايسىسى باس قاتىرمايدى. قۇر جينالىس. ال مال دارىگەرلەرى ىندەتتى ەمدەۋ ءۇشىن ەمەس، برۋتسەللەز شىققاندا عانا بەلسەندى. بار بىلەتىندەرى «جوق قىلۋ كەرەك!».

جاڭالىق احاش

Facebook-تەگى پاراقشاسىنان