جايناقوۆتىڭ سوزىنشە، قازاقستان ءسىم كونسۋلدىق قىزمەتى كونسۋلدىق قارىم-قاتىناس تۋرالى 1963 جىلعى ۆەنا كەلىسىمىنە، قازاقستاننىڭ قىلمىستىق-پروتسەسسۋالدىق كودەكسىنە جانە شەتەلدىك ازاماتتاردىڭ ۇستالعانى تۋرالى شەت مەملەكەتتەردىڭ ديپلوماتيالىق وكىلدىكتەرىن حاباردار ەتۋ تۋرالى ەرەجەگە سايكەس، قازاقستان اۋماعىندا قىرعىزستان ازاماتتارى ۇستالعانى جايىندا قىرعىزستاننىڭ استاناداعى ەلشىلىگىن 2018 جىلعى 16 اقپاندا رەسمي تۇردە حاباردار ەتكەن.

جۇما كۇنى قىرعىزستان سىرتقى ىستەر مينيسترلىگى بىشكەكتەگى قازاق كونسۋلى ەرلان ابىشەۆكە شۇعىل نوتا تاپسىرىپ، "قازاقستاندا قىرعىزستاننىڭ ەكى ازاماتى ۇستالعانى، ولاردىڭ ءبىرى جوگوركۋ كەنەش (قىرعىزستان پارلامەنتى – رەد.) دەپۋتاتى ەكەنى تۋرالى اقپاراتقا قاتىستى تولىمدى مالىمەت" بەرۋىن سۇراعان.

بۇعان دەيىن قازاقستان باس پروكۋراتۋراسى اقپاننىڭ 15-16 كۇندەرى الماتى، جامبىل، وڭتۇستىك قازاقستان وبلىستارى مەن الماتى قالاسىندا جۇرگىزىلگەن ارنايى وپەراتسيا بارىسىندا زاڭسىز ءىس-ارەكەتتەرگە جانە قىلمىستىق توپقا قاتىسى بولۋى مۇمكىن دەگەن كۇدىكپەن ۇستالعان 29 ادامنىڭ ەكەۋى قىرعىزستان ازاماتتارى دەپ حابارلاعان.

كەيىن بىرقاتار ءباسپاسوز قۇرالدارى قازاقستاندا ۇستالعان قىرعىزستاندىقتاردىڭ ءبىرى – جوگوركۋ كەنەشتەگى "كىرگىزستان" فراكتسياسىنىڭ مۇشەسى داميربەك اسىلبەك ۋلۋ دەگەن اقپارات تاراتقان بولاتىن.

Abai.kz